SEERU bukukkaamanna lemboola Yihowara kakkalo assine shiqishiˈra dandiinannita kulanno. Kakkalote daafira kulanno seeri tenne lamenta cea duucha woyite mitteenni kulanno; qoleno lamente giddo mitte hoogguro mitte kakkalo assine shiqishiˈra dandiinanni. (Lew. 1:14; 12:8; 14:30) Tini Israeelete manna kaaˈlitinohu hiittoonniiti? Umihunni bukukkaama afiˈra qarra ikkitanno yanna no. Mayira?

Bukukkaama gobbatenni gobba hadhanno ceaati; tini cea Israeelete gobbara heedhannohu iibbillu yannaraati. Diru kiiro tini cea Birru aganira iibbille hasidhanni wodiidi gobba higge hadhanno; hakkiinni Badheessu woggara agurte Israeelete gobba higganno. (Farf. 2:11, 12; Erm. 8:7) Hakko daafira, hundi waro Israeelete dagara hawadu woggara kakkalo assite shiqishidhanno bukukkaama afiˈra qarra ikkitannonsa.

Lembooli kayinni duucha woyite gobbatenni gobba dihaˈranno; hakko daafira diro woˈma Israeelete gobbara heeˈranno. Qoleno lemboola mine cea dandiinanni. (Yohaannisi 2:14, 16te ledo heewisiisi.) Bayibil Pilanti Endi Animalsi yinanni maxaafi yaanno gara ikkiro, “Baalante Paalestiinu qachuwaranna katammara mannu lemboola ceanno. Mittu mittunku manchira lembooli galanno mini noosi woy minisi girgiddira tini cea galtanno xullo fushshanno.”—Isayaasi 60:8te ledo heewisiisi.

Yihowa Israeele tenne diro woˈma gobbansara heedhanno cea kakkalo assite shiqishidhanno gede fajjasi, isi baxillaanchonna mannisi qarri leellannosi Magano ikkinota leellishshanno.