Xaa geeshsha noo birxichuwara, ‘Maganu ayeti?’ yitanno xaꞌmora dawaro afiꞌrootto. Umihunni, Maganu suꞌmi Yihowa ikkinotanna qaru akatisi baxille ikkinota Qullaawu Maxaafinni ronsoommo. Hakkiinni Maganu mannu oosora yee konni albaanni assinorenna albillitte assannore laꞌnoommo. Maganu daafira rosattohu lowo coyi no; ikkollana ‘Maganu daafira afaꞌya maaho kaaꞌlitannoe?’ yite hedattoha ikkara dandaanno.

Yihowa ‘isiwa gamba yiittoro, isino atewa gamba yeemmo’ yee qaale eino. (1 Duduwo 28:9) Hanni Magano hasiꞌrakkinna isi daafira affanni haꞌrakki mayi elto afiꞌratto gede assitannohero hedi; Yihowa ledo ‘jaalooma’ kalaqiꞌra dandaatto. (Faarso 25:14) Togoo jaalooma kalaqiꞌrakki maaho kaaꞌlitannohe?

Addu hagiirre afiꞌratto. Qullaawu Maxaafi giddo Yihowa “hagiirraamo Maganooti” yinoonni. (1 Ximootewoosi 1:11, NW) Isiwa shiqqi yaatenna isi faale haꞌrate sharramakki addu hagiirre afiꞌratto gede kaaꞌlitannohe; tini surretenna bisu fayyimma afiꞌratto gede assitannohe. (Faarso 33:12) Qoleno gawajjanno assootiwiinni xeertiꞌratto daafira, danchu rosi heeꞌrannohehuranna wolootu ledo dancha aante heedhannohehura hagiirraamo ikkatto. Konnira faarsaasinchu “Anera kayinni Maganunniwa gamba yaa woyyitannoe” yiinoti halaale ikkitinota umikki heeshshonni wodanchatto.—Faarso 73:28.

Towaanyonna agarooshshe afiꞌratto. Yihowa soqqamaasinesira, “illeꞌya ate aana woreemmo” yee qaale eino. (Faarso 32:8) Konnira Yihowa mittu mittunku soqqamaanchisira hedanno; hattono mitto mittonka towaatannonsa. (Faarso 139:1, 2) Yihowa ledo jaalooma kalaqiꞌrittoro isi woꞌmante yannara ledokki noota huwatatto.

Hagiirsiissanno hexxo. Maganu Yihowa xaa yannara hagiirru noo heeshsho heeꞌratto gede calla ikkikkinni albillittete hagiirsiissanno hexxo heedhannohe gede assino. (Isayaasi 48:17, 18) Qullaawu Maxaafi togo yaanno: “Hegere heeshshono, ati callu halaalaancho Magano ikkoottotanna soottoha Yesuusa Kiristoosa afate.” (Yohaannisi 17:3) Maganu aanno hexxo, tenne qarru woꞌmino alame giddo heeꞌneenna, “milli miliqqi yaannokkihu addaxxinanni mokkollichi” gede ikkitannonke.—Ibiraawoota 6:19.

Xaa geeshsha laꞌnummoti, Maganu daafira afankenna isi ledo jaalooꞌmanke uyitannonke horo giddo boodetella. Tenne hajo daafira ledde rosate Yihowa Farciꞌraasine hasaawisa woy jw.org yinanni webisayitenke daaꞌꞌata dandaatto.