Maganu masaalaanchu Abirihaamira, sirchisi giddo mittu “baattote aana noo manni [baalunkura]” atoote abbannota kulinosi. (Kalaqama 22:18) Hakku Abirihaami sirchi wido ikkinohu ayeti?

Mitu 2,000 diri albaanni Maganu, Abirihaami sircho ikkinohura Yesuusira dhagge ikkitanno maalale loosanno wolqa uyinosi. Tini maalale, Maganu Abirihaamira uyino maasso dagate iillitannohu Yesuusi widoonni ikkinota buuxissino.—Galatiyu Sokka 3:14.

Yesuusi loosinoti addi addi maalale, Maganu mannu ooso maassiꞌrate doodhinohu iso ikkinota bande anfanni gede kaaꞌlitino; qoleno tini maalale Maganu isi widoonni mannu ooso hegerera maassiꞌrannohu hiittoonniitiro leellishshino. Hanni Yesuusi loosino maalale baxissanno akattasi giddo mite luphi assite leellishshanno gara laꞌno.

Shooshanqe—Yesuusi dhiwantinore hursino.

Mitte hige, dhiigu amadinosi manchi Yesuusa hursannosi gede huucciꞌrino. Yesuusino iso amade, “Baxoommohena huri” yiita manchu bayichonko hurino.—Maarqoosi 1:40-42.

Shaqqille—Yesuusi hudiꞌrino manna itisino.

Yesuusi mannu hudiꞌrara dihasiꞌranno. Isi shiima daabbonna shiima qulxuꞌme maalaletenni batidhanno gede asse lowo kume ikkanno mannira itisino; konne assinohuno mitte hige calla diꞌꞌikkino. (Maatewoosi 14:17-21; 15:32-38) Baalunku itte duubbu gedensaanni lowo sagale gattino.

Mararro—Yesuusi reyitinore kayisino.

Yesuusi, afidhinoha mitto beetto shiidhe xissiisidhinotanna wolu towaatannosehu nookki gunnitte “lae marare” beettose reyotenni kayisino.—Luqaasi 7:12-15.