E tai pei le telefoni o se meafaigaluega e ola i le eletise. E telē lona aogā, ae e iai foʻi lona lamatiaga, e fua i le auala e faaaogā ai. E faapefea ona aʻoaʻo lau fanau i le faaaogāina ma le atamai o le telefoni? O se faataʻitaʻiga, o le ā le tele o le taimi o le aso, e te faatagaina ai i latou e faaaogā le telefoni? a

•  Mea e tatau ona e iloa

•  Mea e mafai ona e faia

•  “O se matua alofa e na te faia ni tulafono”

•   E iai lamatiaga o le telefoni i le tagata o loo faaaogāina. I le mataupu “Fanau ma Telefoni—Vaega 1: Pe e Tatau Ona Iai se Telefoni a Laʻu Tama?” O loo taʻua ai, o le telefoni e mafai ai e lau tama ona iloa mea uma lava o loo i le Initaneti, e aofia ai mea lelei ma mea leaga.

   “E faigofie lava ona galo iā i tatou, e mafai e le telefoni ona tuu a tatou fanau i lamatiaga mai i tagata leaga ma manatu lē lelei.”—Brenda.

•   E manaʻomia e fanau le taʻitaʻiga. Ua masani lelei talavou i le faatekinolosi, ae o le toʻatele o tagata matutua o loo tau faamasani i ai. Peitaʻi, e lē faapea ai e lē iloa e mātua se mea e faatatau i le faatekinolosi, ma e sili atu le iloa o fanau i le auala ma le taimi e faaaogā ai a latou telefoni.

   E moni, atonu e sili atu le iloa o fanau i le faaaogāina o telefoni, ae lē faapea ai o le a latou iloa ai le auala e faaaogā ai ma le atamai. E tusa po o le ā le tele o le tomai o fanau i le faatekinolosi, ae latou te manaʻomia lava le taʻitaʻiga a mātua ina ia faaaogā le telefoni i se auala aogā.

   “O le avatu o se telefoni feaveaʻi i lau tama e aunoa ma le toleni muamua i le auala e faaaogā ai e tai pei o le tuu atu iai o le ki o se taavale, saofaʻi i le nofoa o le ave taavale, faaola ma e faapea atu, ʻAve ma le faaeteete,’ ae e leʻi iai se taimi na aʻo ai lana aveave.”—Seth.

•   Ia e iloa polokalame o le telefoni a lau tama. E tatau ona e masani lelei i polokalame o le telefoni ina ia mafai ona e fesoasoani i lau tama i le auala e faaaogā lelei ai lana telefoni. O se faaaʻoaʻoga:

   Pe e iai se polokalame o le telefoni e mafai ona seti ai le taimi faatulagaina e faaaogā ai?

   Pe e te iloa e mafai ona seti le telefoni ina ia aua neʻi faaaogā ai isi polokalame e lē manaʻomia?

   O le tele o lou iloa o le telefoni a lau tama, o le a tele ai foʻi mea e mafai ona e fesoasoani atu ai iā te ia ina ia faaaogā lelei lana telefoni.

   Mataupu silisili o le Tusi Paia: “O le tagata poto, e tupu lona malosi.”—Faataoto 24:5.

•   Faia ni tulafono. Filifili mea e fai ma mea e lē faia. O se faaaʻoaʻoga:

   Pe e te faatagaina lau tama e faaaogā lana telefoni i le taimi e aai ai i le pō, po o le taimi foʻi e asiasi atu ai i aiga ma uō?

   Pe e tatau ona iai i lau fanau a latou telefoni pe a momoe i le pō?

   O ā polokalame o le telefoni e te faatagaina ona faaaogā?

   O le ā le tele o le taimi e te faataga e faaaogā ai le telefoni?

   Pe e mafai ona e faatulaga se taimi e faaaogā ai le telefoni?

   Ia iloa au tulafono ma ia e nofo sauni e avatu faasalaga pe a solia na tulafono.

   Mataupu silisili o le Tusi Paia: “Aua le taofia le aʻoaʻiga i le tama.”—Faataoto 23:13.

•   Ia fai ma siaki lana telefoni. Ia e iloa le auala e tatala ai lana telefoni, siaki le faaaogāina o le telefoni e aofia ai feʻau tusitusia, o ata ma polokalame o loo ia faaaogāina.

   “Na ma fai i la ma tama teine o le a fai ma siaki lana telefoni ae e lē faailoaina atu le taimi e siaki ai. O le a faaitiitia le taimi e na te faaaogāina ai le telefoni pe afai na te lē o faaaogāina tatau.”—Lorraine.

   E iai i mātua le aiā tatau e iloa ai le auala e faaaogā ai le telefoni feaveaʻi a le la tama.

   Mataupu silisili o le Tusi Paia: “E mafai ona iloa le tama i lana amio pe e lelei ma tonu ana mea e fai.”—Faataoto 20:11.

•   Aʻoaʻo ia iloa le tāua o tapulaa. Ia fesoasoani i lau tama ia iloa le mea saʻo e fai. Aiseā e tāua ai le faia faapea? Pe afai e nanā e se tamaitiiti le faia o se mea mai ona mātua, e na te maua a le auala e faia ai e tusa pe fai ma siaki e ona mātua lana telefoni. b

   Ia toleni lau tama i uiga lelei e pei o le faamaoni, pulea lelei o ia lava, ma ia iloa o lana tiute tauave le tali atu i auga o ana gaoioiga. O se tamaitiiti e lelei ana tapulaa tauamio, e sili atu ona atamai le auala e na te faaaogāina ai le telefoni.

   Mataupu silisili o le Tusi Paia: O “tagata matutua ua faaaogā o latou mafaufau e iloa le mea saʻo ma le mea sesē ina ua aʻoaʻoina.”—Eperu 5:14.