O le igoa Eleni mo le tusi o le Tusi Paia o le Faaaliga, A·po·kaʹly·psis (apokalipise), o lona uiga o le “Toese o le ufiufi” po o le “Faaali mai.” Ua faailoa mai i lea igoa le uiga o le Faaaliga, o le faailoa mai o ni mea sa natia ma ni mea o le a tutupu ae ua leva ona tusia i le Tusi Paia. O le tele o valoaga o loo i le tusi o Faaaliga, o le a faataunuuina.

Aotelega o le tusi o Faaaliga

•   Faatomuaga.​—Faaaliga 1:​1-9.

•   O feʻau mai iā Iesu i faapotopotoga e fitu.​—Faaaliga 1:10–​3:​22.

•   Se vaaiga o le Atua i lona nofoālii i le lagi.​—Faaaliga 4:1-​11.

•   Se faasologa o vaaiga, e sosoo le tasi ma le isi:

  •   O faamaufaailoga e fitu.​—Faaaliga 5:1–​8:6.

  •   O pū e fitu, o pū mulimuli e tolu ua faailoa mai ai auēga e tolu.​—Faaaliga 8:7–​14:20.

  •   O ipu e fitu, o loo iai i ipu taʻitasi se mala o loo faaāta mai ai se faamasinoga a le Atua o le a liligiina mai i luga o le lalolagi.​—Faaaliga 15:1–​16:21.

  •   Vaaiga o le faaumatiaga o fili o le Atua.​—Faaaliga 17:1-​20:10.

  •   Vaaiga o faamanuiaga mai i le Atua mo le lagi ma le lalolagi.​—Faaaliga 20:11-​22:5.

•   Faaiʻuga.​—Faaaliga 22:6-​21.

O auala e malamalama ai i le tusi o Faaaliga

1.   E iai aafiaga lelei o lenei tusi, mo ē e auauna i le Atua ae e lē faamataʻu pe faafefe ai i latou. E ui lava e manatu le toʻatele o le upu “apokalipise” e faasino atu i se mala mataʻutia, ae e amata ma faaiʻu le tusi o Faaaliga i le faapea mai e maua le fiafia e i latou e faitau, malamalama, ma faatatauina le feʻau o loo iai.​—Faaaliga 1:3; 22:7.

2.   O loo faaaogā i le tusi o Faaaliga le tele o “faailoga” i se auala faafaatusa.​—Faaaliga 1:1.

3.   E tele vala ma faailoga tāua i le tusi o Faaaliga o loo faailoa mai i isi tusi o le Tusi Paia:

   •   O Ieova “o le Atua moni i le lagi” ma o Lē na foafoaina mea uma lava.​—Teuteronome 4:​39; Salamo 103:19; Faaaliga 4:​11; 15:3.

   •   O Iesu Keriso “o le Tamaʻi Mamoe a le Atua.”​—Ioane 1:​29; Faaaliga 5:6; 14:1.

   •   O Satani le Tiapolo o le fili o le Atua.​—Kenese 3:​14, 15; Ioane 8:​44; Faaaliga 12:9.

   •   O Papelonia le Aai Tele e pei o Papelonia anamua (Papelu), o se fili o Ieova le Atua ma ona tagata ma o se puna o aʻoaʻoga pepelo a lotu.​—Kenese 11:​2-9; Isaia 13:​1, 11; Faaaliga 17:​4-6; 18:​4, 20.

   •   “O le sami,” o tagata amioleaga ia e tetee atu i le Atua.​—Isaia 57:20; Faaaliga 13:1; 21:1.

   •   O mea sa faaaogā i le faleʻie paia anamua mo le tapuaʻiga i le Atua, e aofia ai le atolaau o le feagaiga, le sami tioata (faatanoa e fufulu ai vae ma lima), molī, taulaga o mea manogi, ma se fata e osi ai taulaga.​—Esoto 25:10, 17, 18; 40:24-32; Faaaliga 4:​5, 6; 5:8; 8:3; 11:19.

   •   O manufeʻai ia e faaāta mai ai malo faaletagata.​—Tanielu 7:​1-8, 17-​26; Faaaliga 13:​2, 11; 17:3.

   •   O numera e faaaogā i se auala faafaatusa.​—Faaaliga 1:​20; 8:​13; 13:18; 21:16.

4.   E faatatau atu vaaiga i “le aso o le Alii,” lea na amata ina ua faavae le malo o le Atua i le 1914 ma amata ona pule Iesu o se Tupu. (Faaaliga 1:​10) O lea, e tatou te faatalitalia le faataunuuga atoatoa o le Faaaliga i o tatou aso.

5.   E tutusa vala e tatou te manaʻomia ina ia malamalama ai i le tusi o Faaaliga, ma vala e manaʻomia ina ia fesoasoani iā i tatou e malamalama ai i le Tusi Paia atoa, e aofia ai le atamai mai i le Atua ma le fesoasoani mai iā i latou ua malamalama i le tusi o Faaaliga.​—Galuega 8:​26-​39; Iakopo 1:5.