E leai, e lē o lotu uma e tutusa. Ua i le Tusi Paia le tele o faaaʻoaʻoga o lotu e lē fiafia iai le finagalo o le Atua, ia ua vaevaeina i ni vaega autū se lua.

Vaega 1: Tapuaʻi i atua sesē

 Ua faamatala e le Tusi Paia le tapuaʻi i atua sesē i faaupuga e pei o “o se mea e faatauvaa” ma e “leai ni aogā.” (Ieremia 10:​3-5; 16:19, 20) Na faatonuina e Ieova a le Atua le nuu o Isaraelu: “Aua neʻi fai mo oe ni atua ese e faasagatau mai iā te aʻu.” (Esoto 20:3, 23; 23:24) Ina ua tapuaʻi Isaraelu i isi atua, “ona matuā toʻasā ai lea o Ieova.”​—Numera 25:3; Levitiko 20:2; Faamasino 2:​13, 14.

 E toʻasa foʻi Ieova iā latou e tapuaʻi i ē ua taʻua o “atua.” (1 Korinito 8:​5, 6; Kalatia 4:8) Na ia faatonuina i latou o ē mananaʻo e tapuaʻi iā te ia ina ia aua neʻi toe faifaimea faatasi ma i latou o i tapuaʻiga sesē, ua ia fetalai: “Ia ō ese ai mai iā i latou, ma ia outou vavaeese.” (2 Korinito 6:​14-​17) Pe afai e tutusa lotu uma ma taʻitaʻi atu tagata i le Atua, aiseā la ua aumaia ai e le Atua lenei poloaʻiga?

Vaega 2: Tapuaʻi i le Atua moni i le auala e na te lē faamaonia

 I nisi taimi, sa tapuaʻi ai tagata Isaraelu i le Atua e ala i le faaaogāina o talitonuga ma faiga faalotu mai i tapuaʻiga i atua sesē, peitaʻi na teena e Ieova na taumafaiga ua faafefiloi ai le tapuaʻiga moni ma lotu sesē. (Esoto 32:8; Teuteronome 12:​2-4) Na taʻusalaina e Iesu taʻitaʻi lotu i ona aso ona o le auala na latou tapuaʻi ai i le Atua; na latou faaalialia i lumamea o i latou o ni tagata lotu, peitaʻi na faagutugutulua ma “manatu māmā i mataupu matuā tāua o le Tulafono, e pei o le faia o mea tonu, o le alofa mutimutivale, ma le faamaoni.”​—Mataio 23:23.

 I aso foʻi nei, e na o le tapuaʻiga e faavae i le upu moni e taʻitaʻia tagata i le Atua. O loo maua lenei upu moni i le Tusi Paia. (Ioane 4:​24; 17:17; 2 Timoteo 3:​16, 17) O tapuaʻiga e feteenaʻi ana aʻoaʻoga ma le Tusi Paia, e na te taʻitaʻia ese tagata mai i le Atua. O le tele o aʻoaʻoga e manatu tagata e maua i le Tusi Paia, e aofia ai le Tasitolu, le ola pea o le tagata pe a oti ma faapuapuagatia ai e faavavau, e sau mai iā i latou e tapuaʻi i atua sesē. O tapuaʻiga e faaauilumaina na aʻoaʻoga e “lē aogā” auā ua suia tapulaa a le Atua i tū faalelotu.​—Mareko 7:​7, 8.

 E inosia e le Atua faiga faagutugutulua faalelotu. (Tito 1:​16) Ina ia fesoasoani i tagata e māfana atu i le Atua, e tatau ona aafia ai o latou olaga a e lē na o le tausisi i sauniga faalelotu. O se faaaʻoaʻoga:“Afai e manatu se tasi iā te ia lava o sē e toʻaga i le tapuaʻiga ae lē pulea lona laulaufaiva, ua faasesēina e ia lona lava loto, ua lē aogā la lana tapuaʻiga. O le tapuaʻiga lenei e mamā ma lē taʻuleagaina i le silafaga a le Atua lo tatou Tamā: ia tausi i tamaiti ua mātua oti ma fafine ua oti a latou tane i taimi o o latou puapuaga, ma ia puipuia le tagata lava ia neʻi pisia mai i le lalolagi.” (Iakopo 1:​26, 27; faaopoopoga pito i lalo) Ua faaaogā e le King James Version le faaupuga “tapuaʻiga mamā” mo lenei tapuaʻiga mamā lē faagutugutulua.