E masani ona faaaogā le faaupuga “Samaria Agalelei” e faamatala ai se tasi e fesoasoani i tagata o loo puapuagatia. E maua mai lenei faaupuga i se talafaatusa a Iesu, lea o loo faaalia ai o se tuaoi lelei e fesoasoani ma le alofa mutimutivale i isi, e tusa lava pe eseese o latou talaaga po o atunuu. a

I lenei mataupu

•  O le ā le talafaatusa i le “Samaria Agalelei”?

•  Aiseā na faamatala ai e Iesu lenei talafaatusa?

•  O le ā le lesona mai i le talafaatusa?

•  O ai tagata Samaria?

•  Po o le tala i le “Samaria Agalelei” o se mea moni lava na tupu?

 O sina otootoga puupuu lenei o le tala na faamatala e Iesu: Na malaga se tagata Iutaia mai i Ierusalema e agaʻi i Ieriko. A o iai i le ala, na fāoa e tagata ana mea, fasi faamoʻamoʻa, ma tuua o ia ma le manatu ua oti.

 Na pasi ane se faitaulaga Iutaia i le mea o taoto ai le tamāloa ua faamanuʻalia, ma na pasi ane foʻi ma se taʻitaʻi lotu Iutaia i se taimi mulimuli ane. E ui lava na tutusa uma atunuu na ō mai ai ma le tamāloa ua faamanuʻalia, ae e leai ma se tasi o i laʻua na tū e fesoasoani i le tamāloa.

 Mulimuli ane, na agaʻi mai se tamāloa mai i se isi atunuu. O ia o se tagata Samaria. (Luka 10:33; 17:16-18) Ona o lona alofa mutimutivale, na togafitia ai e le tagata Samaria manuʻa o le tamāloa. Na ia aveina foʻi le tamāloa ua faamanuʻalia i se faletalimālō, ma tausi o ia i le pō atoa. I le aso na sosoo ai, na ia totogiina le tagata e ana le faletalimālō ina ia tausi i le tamāloa, ma ofo e totogi so o se tupe e toe faaalu mo le tamāloa.—Luka 10:30-35.

 Na faamatala atu e Iesu le tala i se tamāloa na manatu o ona tuaoi, e na o tagata lava mai i lona atunuu ma lana tapuaʻiga. Na manaʻo Iesu e aʻoaʻoina e le tamāloa se lesona tāua, e manaʻomia ona ia iloa e lautele le uiga o le upu tuaoi, e aofia ai isi e ese mai i tagata Iutaia. (Luka 10:36, 37) Na faaaofia lenei tala i le Tusi Paia ina ia aogā i so o se tasi o loo manaʻo e faafiafia le finagalo o le Atua.—2 Timoteo 3:16, 17.

 O loo aʻoaʻoina i le tala, e faaalia e se tuaoi lelei le alofa mutimutivale e ala i gaoioiga. E tali atu o ia i manaʻoga o se tagata o loo mafatia, po o le ā lava le talaaga, lanu, po o le atunuu o lenā tagata. O se tuaoi e alofa moni, e na te faia mea lelei i isi e pei ona ia manaʻo e fai atu iā te ia.—Mataio 7:12.

 Na nonofo tagata Samaria i laueleele i le itu i mātū o Iutaia. Na aofia ai ē na tupuga mai ina ua fefaaipoipoaʻi tagata Iutaia ma tagata e lē o ni Iutaia.

 E oo ane i le uluaʻi senituri T.A., ua faavaeina e tagata Samaria la latou lava tapuaʻiga. Na latou taliaina uluaʻi tusi e lima o Tusitusiga Eperu, ae na tele ina latou teena isi tusi o Tusitusiga Paia.

 O le toʻatele o tagata Iutaia i aso o Iesu, na latou ʻinoʻino i tagata Samaria ma faamamao ese mai iā i latou. (Ioane 4:9) Na faaaogā e isi tagata Iutaia le upu “Samaria” e taufaifai ai i le isi tagata.—Ioane 8:48.

 E lē o faailoa mai i le Tusi Paia pe na tupu moni lava le talafaatusa i le tagata Samaria. Peitaʻi, na masani ona faaaogā e Iesu tū ma aga ma nofoaga ua lausilafia e tagata i ana aʻoaʻoga, ina ia malamalamagofie lana ʻaufaalogologo i le manatu o loo ia aʻoaʻoina.

 O le tele o faamatalaga auʻiliʻili o le tala, e saʻo e tusa ai ma faamaumauga i le talafaasolopito. O se faaaʻoaʻoga:

•   O le auala mai i Ierusalema e agaʻi i Ieriko e silia ma le 20 kilomita (12 maila) le mamao, ma e faaifoifo i lalo i le 1 kilomita (0.6 maila). Ua faamatala ma le saʻo e le tala, o le tagata na faimalaga atu i Ieriko, “na alu ifo mai i Ierusalema.”—Luka 10:30.

•   O le auala lea na masani ona uia e faitaulaga ma le ʻau sa Levī sa nonofo i Ieriko, a o malaga i Ierusalema.

•   Na masani ona lalafi tagata faomea i le auala e faatalitali ina ia osofaʻi ē o loo malaga, aemaise ē o loo malaga na o i latou.