E iai itu e lelei ai, ma itu e lē lelei ai taaloga mo oe. E faalagolago lava i le ituaiga o taaloga, o le auala e te taalo ai, ma le tele o lou taimi e alu ai.

•  O ā itu e lelei ai?

•  O ā itu lē lelei?

•  Tala a isi talavou

 O le taalo i se taaloga e mafai ona fesoasoani e maua ai le soifua mālōlōina. Ua taʻua i le Tusi Paia, e ʻaogā le faamalositino.’ (1 Timoteo 4:8) Ua faapea mai le talavou o Ryan: “O le taalo e fesoasoani e faamalosi ai le tino. E sili atu nai lo o le nofonofo i totonu o le fale ma taalo i taaloga vitiō.”

 O le taalo i se taaloga, e faaauiluma ai le galulue faatasi ma isi ma le amio pulea. O loo faaaogāina i le Tusi Paia se talafaatusa e faatatau i taaloga, e aʻoaʻo mai ai se lesona tāua. Ua faapea mai: “E tamomoʻe tagata uma o loo i le tuuga, ae e toʻatasi lava na te maua le faailoga.” Ua toe faapea atili mai: “O tagata uma e auai i se tauvaga, e tatau ona amio pulea i latou i mea uma lava.” (1 Korinito 9:​24, 25) O le ā le lesona? E manaʻomia le amio pulea ma le galulue faatasi ma isi, ina ia mafai ai ona usitaʻia tulafono o se taaloga. E ioe se talavou e igoa iā Abigail i lenā manatu. Ua faapea mai o ia: “O le taalo i se taaloga, ua aʻoaʻoina ai aʻu ina ia fesootaʻi lelei ma galulue faatasi ma isi.”

 O le taalo i se taaloga e atiaʻe ai ni faauōga. O taaloga e mafai ona aufaatasia ai tagata. Ua faapea mai se tama talavou e igoa iā Jordan, “E toeitiiti lava o taaloga uma, e faia faatauvaga. Ae pe afai e tou te taumafai e taaalo i se auala fiafia, e mafai ona avea ma auala e maua ai ni uō.”

 Ituaiga o taaloga o loo e taalo ai. Ua faapea mai le Tusi Paia: “E suʻesuʻe e Ieova o lē e amiotonu atoa ma lē e amioleaga, e inosia lava e Ia le tagata e fiafia i le faasauā.”​—Salamo 11:5.

 O nisi taaloga e matuā sauā. O se faataʻitaʻiga, na faapea mai se teine e igoa iā Lauren: “O le auga lava o fusuaga, o le taumafai lea ia tau tuʻi i lau paga. E tatou te ʻalofia le fufusu ma isi, ona o i tatou o ni Kerisiano. Afai la o le tulaga lenā, aiseā la o le a tatou fiafia ai e matamata i fusuaga o loo sauāina ai isi?”

 Ia mafaufau i ai: Pe e te taʻutonuina lou taalo po o le matamata i ata sauā, ona e te manatu e lē taitai ona e faia na gaoioiga sauā? Afai o lea, ia manatua o loo fetalai Ieova i le Salamo 11:5 e faapea, e na te inosia i latou e “fiafia i le faasauā,” ae e lē faapea na o ē o loo faia faiga sauā.

 Le auala e te taalo ai. Ua faapea mai le Tusi Paia: “Ia aua lava neʻi faia se mea ma le finauvale po o le faasausili, ae ia faia ma le lotomaulalo, i le manatu ua sili isi iā te oe.”​—Filipi 2:3.

 O le mea moni, o so o se taaloga lava e fai ʻau, e iai lava le agaga faatautavā. Ae o le iai i se tasi o le uiga fia manumalo, o le a lē maua ai le fiafia i se taaloga. Fai mai le talavou o Brian: “E faigofie lava ona iai i se tasi le agaga fia faatautavā. O le tele lava e te lelei ai i se taaloga, o le tele foʻi lenā e manaʻomia ai ona e lotomaulalo.”

 Ia mafaufau i ai: Ua taʻutino mai le talavou o Chris: “E fai matou soka i vaiaso uma, ma e lē misi ai lava ma se ʻau lavevea.” Ia fesili ifo: ʻO ā māfuaaga e tele ai ina matou lavevea? O ā ni mea e mafai ona ou faia e faaitiitia ai le lavea i taaloga?’

 Le tele o lou taimi e taalo ai. Ua faapea mai le Tusi Paia: ʻIa faamautinoa o mea e sili ona tāua.’​—Filipi 1:​10.

 Ia faamuamua mea e sili ona tāua; e tatau ona faamuamua mea faaleagaga. O le tele o taaloga e alu ai le tele o le taimi, e tusa po o loo e taalo po o loo e matamata foʻi. Ua taʻua e le tamaʻitaʻi o Daria e faapea: “E masani ona ma feeseeseaʻi ma loʻu tinā i le tele o loʻu taimi e alu i le matamata i taaloga, ae lē faaaogā le taimi i nisi mea e sili atu ona aogā.”

 Ia mafaufau i ai: Pe e te faalogo i fautuaga a ou mātua e faatatau i mea e ao ona e faamuamua? Ua faapea mai se teine e igoa iā Trina: “Pe a fai ma matou masani ma nai oʻu tei le matamata i taaloga ae lē faia mea e sili ona tāua, e faamanatu mai e loʻu tinā, o tagata taaalo lea o loo matou matamata i ai, e maua lava o latou totogi e tusa pe e matou te matamata i ai pe e leai. Ona fesili mai lea: ʻA o ai la e totogia outou?’ O le uiga o lana tala: E lelei tagata taaalo o la ua iai a latou galuega. Ae pe afai e lē faia a matou meaaʻoga ma isi mea e tatau ona fai, o le a leai la se mea e tausi ai matou i le lumanaʻi. Sa taʻu saʻo mai e lo matou tinā, e lē tatau ona avea le taalo po o le matamata i taaloga, ma mea e sili ona tāua i o matou olaga.”