O isi tagata e tele le ʻava malosi e latou te taumafaina pe a matuā popole, lagona le tuua toʻatasi pe e leai foʻi ni mea e fai. Po ua sili atu le ʻava malosi o loo e taumafaina nai lo o le mea sa masani ai? Afai o lea, e faapefea ona faamautinoa e te lē o inu tele po o pulea oe e le ʻava malosi? Ia iloilo faamatalaga aogā nei e fesoasoani iā te oe e pulea ai le ʻava malosi.

•  Le uiga o le faaaogāina o le ʻava malosi i se auala talafeagai

•  Auala e iloa ai ua pulea oe e le ʻava malosi

•  Auala e lima e fesoasoani iā te oe e pulea ai le ʻava malosi

 Le manatu o le Tusi Paia: “Aua neʻi avea oe o sē e inu tele i le uaina.”—Faataoto 23:20.

 Ia mātau: E lē o faasā i le Tusi Paia le taumafaina o le ʻava malosi. (Failauga 9:7) Peitaʻi o loo faaeseese mai ai le faaaogāina o le ʻava malosi i se auala talafeagai, le inu tele ma le onā. (Luka 21:34; Efeso 5:18; Tito 2:3) E tusa pe e te lē onā, ae o le inu tele e te ono faia ai filifiliga lē lelei ma aafia ai lou soifua mālōlōina po o lau faiā ma isi.—Faataoto 23:29, 30.

 E faaaogā e faigāmalo tapulaa faatulagaina e iloa ai le tele o le ʻava malosi e taumafaina e se tasi i le aso e tasi po o le vaiaso. O le faia faapea, e latou te iloa ai le eseesega o le faaaogāina o le ʻava malosi i se auala talafeagai ma le inu tele. a E eseese le tele o le ʻava malosi e mafai ona tagofia e tagata taʻitoʻatasi, ma e iai taimi e sili ai le aua le inu. Ua taʻua e le Faalapotopotoga o Soifua Mālōlōina a le Lalolagi:

 “E iai taimi e ono lē talafeagai ai le taumafaina o le ʻava malosi—mo se faataʻitaʻiga:

•   Pe a aveina pe faatonutonuina masini.

•   Pe a maʻitaga pe failele.

•   Pe afai o loo inuina ni fualaau e lē talafeagai ai ona taumafaina le ʻava malosi.

•   Pe a iai ni maʻi patino e lē talafeagai ai ona taumafaina le ʻava malosi.

•   Pe a lē mafai ona e pulea le ʻava malosi.”

 Le manatu o le Tusi Paia: “Ia tatou suʻesuʻe i o tatou ala ma saʻiliʻili i ai.”—Auega 3:40.

 Ia mātau: E mafai ona puipuia oe mai i aafiaga o le ʻava malosi pe a fai ma iloilo le tele e te taumafaina ai le ʻava malosi, ma fai suiga pe a manaʻomia. Ia mātau auala o loo mulimuli mai e ono iloa ai ua pulea oe e le ʻava malosi.

•   Ua faalagolago lou fiafia i le ʻava malosi. E te manatu e tatau ona inu le ʻava malosi ina ia aveesea ai le popole pe ina ia manaia ai se evaevaga. E te faaaogā foʻi le ʻava malosi e onosaia ai ou faafitauli.

•   Ua sili atu lau inu i le taimi nei nai lo o le mea sa iai muamua. Ua malolosi atu pasene o le ʻava malosi ua e inuina, ma ua umi atu le taimi ona faatoʻā e faalogoina lea o le malosi o le ʻava malosi.

•   Ua iai faafitauli ona o lou masaniga o le inu ʻava malosi, i lou aiga ma le galuega. Mo se faataʻitaʻiga, ua tele tupe ua e faaaluina i le ʻava malosi nai lo o le mea e te gafatia.

•   E te faia ni filifiliga e lē saogalemu, e pei o le aveina o le taavale, taʻele i se vai po le sami pe faatonutonuina se masini.

•   Ua fautuaina oe e isi i le ʻava malosi. Pe a latou fautuaina oe, e vave ona e lē fiafia. E te taumafai foʻi e nanā lau inu mai i isi, pe pepelo e faatatau i le tele e te inu ai.

•   E faigatā ona e tuua le inu. Ua e taumafai e faaitiitia pe tuu lau inu ae lē mafai.

 1. Ia iai se fuafuaga.

 Le manatu o le Tusi Paia: “O fuafuaga a le tagata toʻaga e manuia ai o ia.”—Faataoto 21:5.

 Faataʻitaʻi: Ia filifili aso o le vaiaso e te taumafaina ai le ʻava malosi. Ia fuafua se tapulaa talafeagai o le tele e te taumafaina ai le ʻava malosi i na aso. Ia faatulaga ni aso se lua pe sili atu o le vaiaso e te lē taumafaina ai le ʻava malosi.

 Ua faapea mai se faalapotopotoga i U.K e aʻoaʻoina tagata e faatatau i le ʻava malosi: “O le fai ma faamisi o le taumafaina o le ʻava malosi, o le auala sili lea e ʻalofia ai le pulea o oe e le ʻava malosi.”

 2. Ia gaoioi e ōgatusa ma lau fuafuaga.

 Le manatu o le Tusi Paia: “Ia outou faauma ai le mea na outou amataina.”—2 Korinito 8:11, NWT.

 Faataʻitaʻi: Ia mātau po o le ā le pasene o le ʻava malosi ina ia ʻalofia le soona inu. Ia vaai ni meainu e lē o iai se ʻava malosi e suitulaga i le pia, uaina po o le ʻava malosi.

 Ua taʻua e le U.S. National Institute on Alcohol Abuse and Alcoholism e faapea: “O nai suiga lāiti e mafai ona fesoasoani tele i le faaitiitia o faafitauli ona o le ʻava malosi.”

 3. Ia tausisi i au faaiʻuga.

 Le manatu o le Tusi Paia: “Ia avea la outou upu o le Ioe, ia Ioe, ma le Leai, ia Leai.”—Iakopo 5:12.

 Faataʻitaʻi: Ia nofosauni e fai atu “Leai” i se auala faaaloalo ma maumauaʻi pe a ofo atu e se tasi se ʻava malosi ae e lē ōgatusa ma lau fuafuaga.

 Ua faapea mai le U.S. National Institute on Alcohol Abuse and Alcoholism, “O le vave ona e teena o lenā ofo, o le faaitiitia foʻi lenā o le avanoa e te lolo atu ai.”

 4. Ia uaʻi i le aogā o au faaiʻuga.

 Le manatu o le Tusi Paia: “E sili ona lelei le faaiʻuga o se mataupu nai lo o lona amataga.”—Failauga 7:8.

 Faataʻitaʻi: Ia fai se lisi o māfuaaga e te manaʻo ai e pulea le ʻava malosi. Ia faaaofia ai mea e pei o le faateleina o le taimi e moe ai, faaleleia o le soifua mālōlōina, tulaga tau tamaoaiga ma faiā ma isi. Pe a tou talanoa ma isi e faatatau i lau filifiliga, ia uaʻi atu i aogā nai lo o luʻi.

 5. Ia talosaga i le Atua mo se fesoasoani.

 Le manatu o le Tusi Paia: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Filipi 4:13.

 Faataʻitaʻi: Pe afai e te lē mautonu i le auala e pulea ai le ʻava malosi, ia tatalo i le Atua mo se fesoasoani. Ia talosaga mo le malosi ma le amio pulea. b Ia faaalu se taimi e iloilo ai le atamai aogā o loo i lana Afioga le Tusi Paia. O lana fesoasoani e mafai ai ona e pulea le taumafaina o le ʻava malosi.