Pe ā o le 3,500 tausaga ua mavae a o toeitiiti ulu atu Isaraelu i le nuu folafolaina, na fetalai atu le Atua o le a ia puipuia i latou mai i “maʻi leaga” na aafia ai tagata Aikupito. (Teu. 7:15) O se tasi o auala na ia faia ai faapea, o le tuuina atu iā i latou o faatonuga auʻiliʻili e faatatau i le tausia o le tumamā. Na ia tuuina atu foʻi faatonuga i auala e ʻalofia ai le aafia i faamaʻi ma taofia ai le pipisi atu o faamaʻi. O se faaaʻoaʻoga:

•   Na aofia i tulafono na avatu iā Isaraelu le tāʻeele mamā ma le tatāina o lavalava.—Levi. 15:4-27.

•   Na fetalai le Atua: “E tatau ona iai se nofoaga faapitoa mo oe i tua o le togālauapi, ma e tatau ona e alu i ai. E tatau ona iai se tamaʻi suō faatasi ma au mea faigaluega, pe a e faatū i fafo, ia eli se pū i lau suō ma liliu ma tanu ai ou otaotavale.”—Teu. 23:12, 13.

•   O tagata na aafia i faamaʻi pipisi e nonofo ese mai i isi tagata mo se taimi. Ao leʻi toe foʻi i o latou aiga, e tatau ona tatā mamā o latou ofu ma tāʻeele mamā i le vai ina ia “mamā” ai i latou.—Levi. 14:8, 9.

•   O soo se tagata na paʻi i se tino oti na tatau ona nofo ese mai i isi tagata.—Levi. 5:2, 3; Nu. 19:16.

 O Tulafono na tuuina atu iā Isaraelu i le tausiaina o le soifua mālōlōina ma le tumamā, na atagia mai ai le maualuga o le aʻoaʻoina o tagata Isaraelu i mea tau faafomaʻi, lea e leʻi leva ona iloa e saienitisi.

 Ae na taatele i isi vaega o le lalolagi auala lē saʻo na tausia ai le tumamā. O se faaaʻoaʻoga:

•   O vai ma meaʻai na faaleagaina ma isi ituaiga o otaota, na faatupu ai se siʻomaga matuā lē mamā, lea na avea ma se tasi o māfuaaga o le mamaʻi o le toʻatele o tagata ma le feoti o le tele o pepe.

•   Na itiiti pe leai foʻi se iloa o fomaʻi anamua e faatatau i siama e tutupu ai faamaʻi. Na faaaogā e tagata Aikupito “togafitiga” e pei o toto o pili, otaotavale o kati (pelican), isumu mate, feʻauvai ma falaoa pologā. Na taatele foʻi lo latou faaaogāina o otaotavale o tagata ma meaola, i a latou togafitiga faafomaʻi.

•   Na mamaʻi tagata Aikupito anamua mai le tele o anufe na maua i vai o le Naila, ma vai na faasūsū ai a latou faatoʻaga ia na aafia i siama. Na feoti foʻi le tele o pepe i Aikupito ona le manava tatā lea na māfua mai i meaʻai na faaleagaina i siama.

 Ae na maua e tagata Isaraelu aogā ma na matuā mālōlōina i latou nai lo o tagata o isi atunuu, ona na latou mulimuli i tapulaa na faavae mai i tulafono a le Atua.