Po o le a Faaiʻuina ea Faiga Faatupu Faalavelave?
Pe a uma se osofaʻiga faatupu faalavelave, e masani ona tatou fesili ifo: ʻPe e manatu mamafa mai le Atua? Aiseā ua tutupu ai nei mea? Po o le a faaiʻuina ea faiga faatupu faalavelave? a E faapefea ona ou fesagaʻia oʻu faalogona fefe o loo iai? O loo maua i le Tusi Paia tali faamalieloto i nei fesili.
O ā faalogona o le Atua e faatatau i faiga faatupu faalavelave?
E ʻinoʻino le Atua i le sauā ma faiga faatupu faalavelave. (Salamo 11:5; Faataoto 6:16, 17) O Iesu o le sui o le Atua, na ia aʻoaʻia foʻi ona soo ina ua latou gaoioi i se auala sauā. (Mataio 26:50-52) E ui e faapea mai nisi o loo latou faia nei mea i le suafa o le Atua, ae e lē finagalo malie le Atua i mea o loo latou faia. O le mea moni, e lē faafofoga foʻi o ia i a latou tatalo.—Isaia 1:15.
E manatu mamafa mai le Atua iā i latou uma e mafatia, e aofia ai i latou na aafia i osofaʻiga faatupu faalavelave. (Salamo 31:7; 1 Peteru 5:7) Ua faailoa mai foʻi i le Tusi Paia o le a gaoioi le Atua e faaiʻuina faiga sauā.—Isaia 60:18.
Le māfuaaga autū o faiga faatupu faalavelave
Ua faailoa mai i le Tusi Paia le māfuaaga autū o faiga faatupu faalavelave: “Ua pule ai le tagata i le isi tagata ma ua matuā afāina ai o ia.” (Failauga 8:9) A o faagasolo taimi, ua faaaogā e tagata e iai le pule faiga faatupu faalavelave e faapologa ai isi. O le iʻuga, ua faaaogā e isi faiga faatupu faalavelave e tali atu ai i na faiga.—Failauga 7:7.
Le iʻuga o faiga faatupu faalavelave
Ua folafola mai e le Atua o le a ia aveesea le fefe ma faiga sauā ma faatumauina le filemu i le lalolagi. (Isaia 32:18; Mika 4:3, 4) O le a ia:
Tafiesea le māfuaaga autū o faiga faatupu faalavelave. O le a suia e le Atua pulega a tagata i lana pulega i le lalolagi aoao. O Iesu Keriso le Pule o lenei Malo, e tonu le auala o le a ia feutagaʻi ai ma tagata uma, ma o le a ia aveesea foʻi pulega ma faiga sauā. (Salamo 72:2, 14) I lenā taimi, e lē toe iai se tasi e faia ni faiga faatupu faalavelave. E ʻmatuā faafiafiaina foʻi tagata ona o le tele o le filemu.’—Salamo 37:10, 11.
Aveesea aafiaga uma o faiga faatupu faalavelave. O le a faamālōlōina e le Atua tagata mai i aafiaga o faiga faatupu faalavelave, e tusa po o aafiaga i le itu faaletino po o le itu tau faalogona. (Isaia 65:17; Faaaliga 21:3, 4) Ua ia folafola mai foʻi e na te toe faatutūina ē ua maliliu, ma toe faafoʻisia i latou i se lalolagi filemu.—Ioane 5:28, 29.
Ua aumaia e le Tusi Paia iā i tatou māfuaaga lelei e tatou te talitonu ai, ua toe o se aga ona gaoioi lea o le Atua. Peitaʻi, e tatou te ono taumānatu, ʻAiseā ua lē faamutaina ai loa e le Atua faiga faatupu faalavelave?’ Ina ia tali lenā fesili, maimoa i le vitiō Aiseā ua Lē Taofia ai e le Atua Mafatiaga?
a O “faiga faatupu faalavelave” e masani ona faasino atu i le faaaogā o faiga taufaamataʻu, po o faiga sauā e faafefe ai tagata ina ia faia ai suiga i faiga faapolotiki, faalotu, po o tulaga lautele. Peitaʻi, e teena e nisi le manatu i se gaoioiga patino o se faiga faatupu faalavelave.
E te Ono Fiafia Foʻi
ISI MATAUPU
Auala e Pulea ai le Popole
O ā fautuaga aogā ma mau i le Tusi Paia e fesoasoani iā te oe e ʻalofia ai le soona popole naʻuā?
ISI MATAUPU
O se Faamoemoe Moni mo se Lumanaʻi Manuia
Aiseā e ese ai folafolaga o loo taʻua i le Tusi Paia mai i folafolaga e faia e tagata?
TALIINA O FESILI FAALE-TUSI PAIA
O le ā le Malo o le Atua?
Iloilo pe aiseā e silisili ai le pulega a le Atua nai lo isi pulega uma faaletagata.
LE OLOMATAMATA
O le ā o le a Faataunuuina e le Malo o le Atua?
Na silafia lelei e Iesu e na o le Malo o le Atua le faigāmalo e mafai ona foʻia faafitauli o le lalolagi. O ā mea ua faataunuuina e lenā Malo lea e faamalosia ai lo tatou mautinoa?
ISI MATAUPU
Po o le a i ai i le Lalolagi se Faamasinogatonu?
O loo faaalia e le Tusi Paia, e mai i le Atua le faamasinoga tonu, e tutusa iā te ia le tāua o tagata uma.
A'OA'OGA FAALE-TUSI PAIA
Aiseā ua Lē Taofia ai e le Atua Mafatiaga?
E toʻatele o loo tuufesili pe aiseā ua faatumulia ai le lalolagi i feitagaʻi ma mafatiaga. Ua aumaia e le Tusi Paia tali faamalieloto ma faamāfanafanaina ai.
