Mātau nisi o lipoti lata mai e faatatau i nisi o taʻitaʻi lotu lauiloa faapea le taua i Ukraine:

•   “Ua matuā gūgū le taʻitaʻi o le Lotu Orthodox i Rusia, o Patriarch Kirill, e faatatau i osofaʻiga a Rusia o loo faia nei. . . . Ua faaauau ona faasalalau atu e lana Lotu tala taufaaleaga e faatatau iā Ukraine, ma ua faaaogā e Putin na tala ina ia taʻutonuina ai le taua.”—EUobserver, Mati 7, 2022.

•   “Ua matuā taʻutonuina e [Patriarch Kirill] le osofaʻia e Rusia o Ukraine, ona e manatu o se osofaʻiga e tetee atu ai i le agasala.”—AP News, Mati 8, 2022.

•   “I le Aso Gafua, na faamanuia ai e Metropolitan Epiphanius I o Kyiv, o le taʻitaʻi o le Lotu Orthodox i Ukraine, o latou tagata o loo ʻtau faasaga iā Rusia’ . . . Na [ia] taʻua foʻi e lē o se agasala le fasiotia o fitafita Rusia.”—Jerusalem Post, Mati 16, 2022.

•   “E matou [le Tuufaatasiga o Lotu ma Faalapotopotoga Faalelotu i Ukraine (UCCRO)] te lagolagoina le vaegaʻau a Ukraine ma tagata uma o loo tau ina ia puipuia lo matou atunuu. E matou te faamanuia i a latou taumafaiga uma ina ia puipuia Ukraine mai i le fili, ma tatalo mo i latou.”—Faamatalaga a le UCCRO, a Fepuari 24, 2022.

 O le ā sou manatu? Pe e tatau i lotu o loo faapea mai e usitaʻi iā Iesu Keriso, ona faalaeiau o latou tagata tapuaʻi ina ia auai i taua? O le ā se manatu o le Tusi Paia?

Le talafaasolopito o lotu ma taua

 Ua faailoa mai i le talafaasolopito, e masani ona faaauiluma ma taʻutonuina e lotu faigātaua, ae i le taimi e tasi, ua latou faapea mai o loo latou tausia le filemu. Mo le faitau sefulu o tausaga, ua faalialia ai i lumāmea e Molimau a Ieova le faafiaamiotonu o na lotu. Iloilo nisi o faaaʻoaʻoga o loo taʻua i a matou lomiga.

•   I le mataupu “The Crusades—A ʻTragic Illusion’,” o loo faailoa mai ai o le Lotu Katoliko Roma na māfua ai se fasiotiga tagata mataʻutia, lea na faia i le suafa o le Atua ma Keriso.

•   I le mataupu “The Catholic Church in Africa,” o loo faamatala ai se faataʻitaʻiga o le lē taulau o lotu i le taofia o faigātaua i le vā o ituaiga, ma le fasiotia pe soloiesea o se ituaiga.

•   I le mataupu “Pe Tuuaʻia Lotu Ona o Faiga Sauā ma Taua?,” “Religion’s Role in Man’s Wars,” ma le “Religion Takes Sides,” o loo faamatala ai le lagolagoina e taʻitaʻi lotu mai i le lotu Katoliko, Orthodox ma le Porotesano o itu taua uma e lua o le tele o taua.

Pe e tatau i lotu Kerisiano ona lagolagoina taua?

 Aʻoaʻoga a Iesu: “Ia e alofa atu i lou tuaoi e pei o oe lava iā te oe.” (Mataio 22:39) “Ia alolofa atu pea i o outou fili.”—Mataio 5:44-47.

 Fetalaiga a Iesu: “O loʻu malo e lē mai le lalolagi lenei. Ana mai le lalolagi nei loʻu malo, semanū ua tau aʻu auauna.” (Ioane 18:36) “O i latou uma e tago i le pelu, e faaumatia i le pelu.”—Mataio 26:47-52.

 Ia mātau: Pe afai e oo lava iā Iesu, e leʻi tau Kerisiano ina ia puipuia o ia, pe e tatau la i Kerisiano ona tau mo se isi lava māfuaaga? Faitau i le mataupu “Pe e Talafeagai Taua ma le Faa-Kerisiano?” ina ia iloa ai le auala na mulimulituʻi ai uluaʻi Kerisiano i faaaʻoaʻoga ma aʻoaʻoga a Iesu.

O le ā o le a tupu i lotu e lagolagoina taua?

 Ua aʻoaʻo mai i le Tusi Paia e teena e le Atua lotu e faapea mai e mulimuli iā Iesu, ae e lē o usitaʻi i ana aʻoaʻoga.—Mataio 7:21-23; Tito 1:16.

•   Ua faailoa mai i le tusi o Faaaliga, o le a faasalaina e le Atua na lotu ona o le faamaligiina o le toto o “tagata uma ua fasiotia i le lalolagi.” (Faaaliga 18:21, 24) Ina ia iloa le māfuaaga, faitau i le mataupu “O le ā e Faasino Atu i ai Papelonia le Aai Tele?”

•   Ua faailoa mai e Iesu, o le a faaumatia lotu uma ua teena e le Atua ona o a latou galuega leaga, e pei lava ona “tātuu i lalo ma lafo i le afi” se laau ua pala ma e lē fua mai. (Mataio 7:15-20) Faitau i le mataupu “Ua i Faitotoʻa le Iʻuga o Lotu Sesē!” ina ia iloa ai le mea o le a tupu.

Ata mai i le itu agavale i le itu taumatau: Ata mai i le Sefa Karacan/Anadolu Agency/Getty Images; Maxym Marusenko/NurPhoto via Getty Images