O tagata e maualuluga a latou tapulaa tau amio e manino iā i latou le mea saʻo ma le mea sesē. E lē faalagolago le saʻo ma le sesē i o latou faalogona i se taimi patino. Nai lo lea, e faalagolago i mataupu silisili e taʻitaʻia i latou, e tusa lava pe e lē o iloa mai e isi.

Ua siʻomia tamaiti i manatu sesē e faatatau i le mea saʻo ma le mea sesē, atonu e ala mai i tamaiti e aʻoʻoga faatasi, o pese e faalogologo ai ma ata tifaga, faapea polokalame e latou te matamata ai i le televise. E telē se aafiaga o na manatu sesē i mafaufauga o le tamaitiiti i le mea saʻo ma le mea sesē.

E moni lenā manatu, aemaise lava i le taimi o le talavou. Ua taʻua i le tusi Beyond the Big Talk e faapea, “e manaʻomia ona [latou] malamalama, e toʻatele tagata o le a uunaʻia i latou e amioaʻi i se auala e faafiafia ai isi, ma e manaʻomia foʻi ona latou iloa faia filifiliga e fua i o latou lava tapulaa tau amio, e tusa pe e lē fiafia mai ai a latou uō.” E manino mai, e manaʻomia ona toleni le fanau i nei mea a o leʻi avea ma talavou.

Faataatia ni tapulaa tau amio.

MATAUPU SILISILI FAALE-TUSI PAIA: ʻO tagata matutua . . . ua faaaogā o latou mafaufau e iloa le mea saʻo ma le mea sesē.’​—Eperu 5:14.

• Faaaogā upu e faaeseese ai le lelei ma le leaga. Ia mātau mea e tutupu i aso faisoo ma ia taʻu atu le eseesega: “O le gaoioiga lea e faamaoni ae o le gaoioiga lea e lē faamaoni.” “O le gaoioiga lea e agalelei ae o le gaoioiga lea e lē alofa.” O le faia faapea, o le a iloa ai e lau fanau mea lelei e tatau ona latou faia ma mea leaga e lē tatau ona latou faia.

• Faamatala le māfuaaga o au tapulaa tau amio. O se faataʻitaʻiga, ia fesili atu: Aiseā e tāua ai le tautala saʻo? E faapefea i le pepelo ona faaleagaina ai faauōga? Aiseā e leaga ai le gaoi? Ia faaaogā ni māfuaaga e fefulifulisaʻi ai ma lau fanau, ina ia latou iloa ai le mea saʻo ma le mea sesē.

• Faamatilatila le aogā o le mulimuli i tapulaa tau amio. E mafai ona e faapea atu: “Pe a e faamaoni, o le a talitonuina oe e isi,” po o le “Pe a e agalelei i isi, o le a fiafia mai tagata iā te oe.”

 Ia faamautinoa o loo ola lou aiga e tusa ma tapulaa tau amio.

MATAUPU SILISILI FAALE-TUSI PAIA: “Ia suʻesuʻe ifo pea iā te outou po o faapeʻī outou.”​—2 Korinito 13:5.

• O na tapulaa tau amio e tatau ona avea ma vala tāua o le olaga i le aiga, ina ia mafai ai ona e faapea atu:

  • “E leai se tasi o le matou aiga e pepelo.”

  • “E matou te lē sauā i isi pe avaavau atu foʻi iā i latou.”

  • “E matou te lē fai atu ni upu faatigā.”

O le a iloa e lau fanau o tapulaa tau amio ua lē na o ni tulafono e manaʻomia ona tausia, ae o se mea e iloga ai le aiga.

• Ia iloilo pea ma le fanau tapulaa tau amio a le aiga. Faaaogā mea e tutupu i le olaga i aso faisoo e aʻoaʻo ai ni lesona. E mafai ona faatusatusa mea o loo tutupu i le aʻoga po o mea o loo faasalalauina i le televise ma au tapulaa. Ona fesili lea i lau fanau: “O le ā lau gaoioiga e fai pe ana faapea o oe?” “O le ā se auala e ono tali atu ai le tatou aiga i na tulaga?”

Faamatilatila tapulaa tau amio.

MATAUPU SILISILI FAALE-TUSI PAIA: “Ia taofimau i se lotofuatiaifo lelei.”​—1 Peteru 3:16.

• Faamālō atu mo le faaalia o amioga lelei. Pe a faaalia e lou alo amioga lelei, ia faamālō atu ma faamatala i ai le māfuaaga e tāua ai lana gaoioiga na fai. O se faataʻitaʻiga, e mafai ona e faapea atu: “Ona o lou faamaoni ua ou matuā fiafia lava iā te oe.” Pe afai foʻi e faailoa mai e lau tama se mea sesē na ia faia, ia faamālō muamua i ai a o leʻi avatu se faasaʻoga.

• Faasaʻo ni amioga lē lelei. Ia fesoasoani i lau fanau e talia āuga o a latou gaoioiga. E tatau ona iloa e le fanau po o le ā lana mea sesē na fai, ma pe faapefea i lana gaoioiga ona ese mai i tapulaa tau amio a le aiga. O nisi mātua ua mumusu e faasaʻo gaoioiga lē lelei a latou fanau, ae o le talanoa i na mea ma lou alo, o le a mafai ai ona ia iloa le tāua o le faia o le mea saʻo.