O SOO-JEONG o se faufautua i se kolisi i Korea i Saute, na ia faaaogā i lana vasega ni vitiō mai i le upega tafaʻilagi o le jw.org. Na ia faapea mai: “E mataʻina le auala na tali mai ai tamaiti o le vasega i le vitiō What’s a Real Friend? Ina ua uma ona latou matamata i le vitiō, na latou faapea mai, ʻE lē o le auala lea na matou mafaufau muamua ai e faatatau i faauōga. E ese le manaia o lenei auala!’ Ua faapea mai nisi, e latou te faaaogāina lenei upega tafaʻilagi i so o se taimi e latou te manaʻomia ai se fautuaga.” Na toe faaopoopo mai Soo-jeong: “Na ou faalaeiauina le toʻatele o isi faiaʻoga e faaaogā lenei vitiō, ma ua latou fiafia e faaaogā lenei meafaigaluega aogā i a latou vasega.”

Na aogā foʻi le isi vitiō o ata tusi Tetee Atu i Ē Fia Malolosi ae Aua le Faamisa! i le toʻatele o tamaiti aʻoga i Korea i Saute. Na faaali e se faiaʻoga e galue i le faalapotopotoga o le Juvenile Violence Prevention Foundation lenei vitiō i lana vasega atoa. Na ia faapea mai: “Na fiafia le toʻatele o talavou i lenei vitiō ona o le manaia o le auala e tusia ai ata. O le isi aogā o lenei vitiō, ua faaalia mai ai auala e feagai ai ma sauāga faapea foʻi auala e ʻalofia ai.” Na talosagaina e le faalapotopotoga se faatagaga e faaaogā ai lenei vitiō i a latou mataupu i le tele o aʻoga tulaga lua, ma na taliaina lenā talosaga. E oo lava i leoleo ua latou faaaogāina vitiō mai i le upega tafaʻilagi o le jw.org.

Pe afai e te leʻi tagaʻi i lenei upega tafaʻilagi, aiseā e te lē faia ai loa faapea? E faigofie ona faaaogā, ma e maua fua mea uma e kopiina mai ai e pei o tala faalogologo ma vitiō, faapea foʻi le Tusi Paia ma le tele o isi lomiga.