O le telē o le malamalamaga o Erasmus i le gagana Eleni ma le gagana Latina, na mafai ona ia faatusatusa ai faaliliuga Latina o le Tusi Paia, e pei o le Vulgate i le gagana Latina ma uluaʻi manusikulipi Eleni o Tusitusiga Paia Eleni, lea e masani ona taʻua o le Feagaiga Fou. Na ia talitonu e tāua le poto mai i le Tusi Paia. O le māfuaaga lea, na ia manatu ai e tatau ona faaliliuina Tusitusiga Paia i gagana sa tautatala ai tagata i lenā taimi.

Na faaauiluma e Erasmus le toefuataʻiina o le Lotu Katoliko, talu ai na ia talitonu e tatau ona aafia le olaga atoa i le faa-Kerisiano, ae lē na o se mea e tau ina fai. O le iʻuga, ina ua amata ona tetee ē na toefuataʻiina le lotu ma finau e fai ni suiga i totonu o le Lotu o Roma, na masalomia ai loa Erasmus e le lotu Katoliko.

Na faaalialia e Erasmus i ana tusitusiga faiga matagā a taʻitaʻi lotu, o latou olaga faalialiavale, ma le lagolagoina e pope o faigātaua. Na ese o ia mai i taʻitaʻi lotu amio piʻopiʻo o ē na faaaogā tū a le lotu e maua ai a latou mea mai i tagata, e pei o le taʻutino o agasala, tapuaʻi i sagato, anapogi, ma malaga i nofoaga paia. E na te leʻi lagolagoina foʻi isi tū a le lotu e pei o le totogi o patele e tatalo mo le faamagaloina o agasala a tagata ua maliliu, ma le faasā ona faaipoipo o nisi o ē mautofiga i le lotu.

I le 1516, na lolomi ai e Erasmus lana lomiga muamua o le Feagaiga Fou i le gagana Eleni, o le uluaʻi lomiga muamua lea o Tusitusiga Paia Eleni ua lomiaina. Na aofia i galuega a Erasmus faamatalaga faaopoopo faapea lana faaliliuga o Tusitusiga Paia Eleni i le gagana Latina, lea e ese mai i le Vulgate. A o faagasolo taimi, na toe teuteuina ai lana faaliliuga, ma maua mai ai se faaliliuga e matuā ese mai i le faaliliuga Latina o le Vulgate.

O se tasi o eseesega sa iai o le 1 Ioane 5:7. Ina ia lagolagoina le aʻoaʻoga o le Tolutasi lea e lē faavaeina i le Tusi Paia, sa faaopoopo ai i le Vulgate ni faaupuga sesē e taʻua o le comma Johanneum. E faitauina faapea: “O loo i le lagi le Tamā, le Upu, ma le Agaga Paia: o nei vaega e tolu e tasi i latou.” Peitaʻi, e leʻi tuuina e Erasmus na faaupuga i ana lomiga muamua e lua o le Feagaiga Fou, talu ai e leʻi maua na faaupuga i manusikulipi Eleni na ia faaaogāina. Ae i se taimi mulimuli ane, na faamalosia o ia e le Lotu e tuu na faaupuga i totonu o lana lomiga lona tolu o le Feagaiga Fou.

O le toe faaleleia o le faaliliuga a Erasmus o le Feagaiga Fou i le gagana Eleni, na mafai ona maua ai ni faaliliuga e sili ona lelei i isi gagana i Europa. Na faaaogā e Martin Luther, William Tyndale, Antonio Brucioli, ma Francisco de Enzinas nei lomiga e faaliliu ai Tusitusiga Paia Eleni i le gagana Siamani, Peretania, Italia, ma le gagana Sepania.

Na soifua Erasmus i le vaitaimi na fevaevaeaʻi ai lotu, ma na manatu Ē na Toefuataʻiina le lotu Porotesano na matuā aogā lana faaliliuga o le Tusitusiga Paia Eleni. Na manatu nisi iā Erasmus o sē na toefuataʻiina le lotu, ae na faatoʻā iloa le mea moni ina ua toefuataʻiina le lotu. E leʻi fia faia sana vaega i finauga sa faia e faatatau i mataupu faalotu. O le mea e mataʻina ai, i le silia i le 100 tausaga ua mavae, na tusi le faitofā o David Schaff e faatatau iā Erasmus, “na maliu o ia ae leʻi toe iai sana vaega i lotu. E leʻi taʻua e le Katoliko o ia o so latou sui, ma e faapena foʻi i le Lotu Porotesano.”