E PE ā ma le 800 tausaga ua mavae na folau atu ai ni ituaiga o tagata Maori mo le faitau afe o maila ma nofoia Niu Sila. O i inā na latou maua ai se laueleele e matuā ese mai i atumotu o le Polenisia na latou tuua. O lenei laueleele e maugā ma aisā, e iai vaipuna vevela ma e toʻulu ai le kiona. Pe tusa ma le lima selau tausaga mulimuli ane, ae taunuu atu isi ituaiga o tagata mai i le atu Europa. O le toʻatele o tagata Niu Sila i aso nei, e latou te faaaogā aganuu na tupuga mai i se vaega o tagata Siamani sa nofoia Peretania (Anglo-Saxon) ma tagata Polenisia. E toetoe 90 pasene o le faitau aofaʻi o tagata Niu Sila, e nonofo i aai. E lauiloa le aai o Ueligitone o le laumua pito i sili ona latalata i le itu i saute o le lalolagi.

 E ui ina mamao ese Niu Sila mai i isi atunuu o le lalolagi, ae i tausaga taʻitasi e oo atu i le tolu miliona turisi e asiasi atu i ai, ona o vaaiga eseese ma matagofie i lea atunuu.

E tele ituaiga o meaola eseese ma laau o le vaomatua i Niu Sila, ma e sili atu ona tele ituaiga o manulele e lē mafai ona felelei e maua ai nai lo o se isi lava vaipanoa o le lalolagi. E maua ai foʻi le meaola e taʻua o le tuatara, lea e foliga e pei o se pili ma e mafai ona oo atu i le 100 tausaga le umi e ola ai. E pau meaola o loo iai pea talu mai le taimi na faatoʻā nofoia ai lea laueleele, o ni nai ituaiga o peʻa ma isi meaola tetelē o le sami, e aofia ai tafolā ma mumua (dolphins).

Ua toeitiiti 120 tausaga o faia le galuega a Molimau a Ieova i Niu Sila. E latou te aʻoaʻoina le Tusi Paia i gagana a itiiti mai e 19, e aofia ai gagana o le atu Polenisia e pei o le gagana Niue, Rarotoga, Samoa, ma Toga.