Māfuaaga e Faatuatuaina ai le Tusi Paia

3. Tusitusiga e Lē Feteenaʻi

Seʻi faapea e fesili atu i ni tamāloloa e 40 e eseese o latou tulaga e tusia se tusi, ma e tofu i latou ma le vaega e tusia. E tele atunuu e ō mai ai nei tusitala, ma latou te lē masani foʻi. E lē iloa e isi mea na tusia e isi. Pe e te faatalitalia lenā tusi e lē feteenaʻi ona manatu?

E FAAPENA le Tusi Paia. * I le tusiaina i se siʻomaga e ese mai e pei ona taʻua i luga, e matuā lē feteenaʻi lava ma loloto le feʻau o loo iai.

Tulaga e mataʻina ai.

Na tusia le Tusi Paia i le umi pe ā ma le 1,600 tausaga, mai le 1513 T.L.M. seʻia oo atu i le 98 T.A. O le toʻatele o tusitala lea e tusa e 40, e faitau senituri le va o taimi na latou soifua ai. E eseese a latou galuega. O nisi e faifaiva, o leoleo mamoe nisi po o ni tupu, ae fomaʻi le isi.

O se feʻau e lē feteenaʻi.

E tasi le matua autū na tusia e tusitala o le Tusi Paia: o le faamaonia o le tonu o le pule a le Atua e pulea ai tagata, ma le faataunuuina o lona finagalo e ala i le faaaogā o lona Malo i le lagi. O loo amata mai lenā matua i le Kenese, ma faalauaʻitele atu i tusi o loo sosoo ai, ma o lona tumutumuga o loo i le Faaaliga.—Tagaʻi i le mataupu “O le ā e Faatatau i ai le Tusi Paia?” itulau e 19.

Ioeina o faamatalaga.

Sa ioe faatasi tusitala o le Tusi Paia e oo lava i faamatalaga laiti, ae e latou te leʻi taumafai e faaōgatusa a latou faamatalaga ma isi tusitala. O se faataʻitaʻiga. Na faapea mai le tusitala o le Tusi Paia o Ioane, ina ua ō atu se motu o tagata e faalogologo iā Iesu, na fesili patino Iesu iā Filipo, po o fea le mea e faatau ai ni falaoa mo tagata. (Ioane 6:1-5) I le tala a Luka, na ia faapea mai na tupu lenei mea o latalata i le aai o Petesaita. I le amataga o lana tusi, na faapea mai Ioane e sau Filipo mai Petesaita. (Luka 9:10; Ioane 1:44) Na fetalai atu Iesu i se tamāloa na latalata ane le mea e sau ai. E lē feteenaʻi manatu, e leai se faanaunauga e faapea e faatutusa manatu. *

Māfuaaga talafeagai e eseese ai.

E iai ni nai eseesega i nisi tala, pe tatou te lē faatalitalia ea lenā mea? Seʻi faapea na vāai nisi i se solitulafono na fai. Pe a faapea e tutusa uma a latou faamatalaga ma upu, pe e te lē masalosalo na latou ioe faatasi i lenā mea? O lea la, o mea na tusia e isi e eseese laʻitiiti ona o le eseesega o la latou vaaiga i mea. E faapena foʻi tusitala o le Tusi Paia.

Tagaʻi i le faataʻitaʻiga lenei. Pe na ofu Iesu i se ofu violē i le aso o lona maliu, e pei ona tusia e Mareko ma Ioane i a la tusi? (Mareko 15:17; Ioane 19:2) Pe e mūmū e pei ona faamatalaina e Mataio? (Mataio 27:28) O le mea moni, e saʻo uma na lanu. E iai vaega mūmū i le lanu violē. E fuafua i le vaaiga a le tagata na vaai i ai, e mafai ona suia le lanu o le ofu pe a sui le itu e susulu atu ai le malamalama. *

O le lē feteenaʻi o manatu o tusitala o le Tusi Paia, e aofia ai ma le tutusa o latou manatu ia e leʻi muaʻi fuafuaina, ua atili faamaonia ai le talitonuina o a latou tusitusiga.

[Faaopoopoga i lalo]

[Faamatalaga faaopoopo i le itulau 25]

Pe e violē pe mūmū le ofu o Iesu?