Le Auala na Faasaoina ai le Tusi Paia Seʻia Oo Mai i Aso Nei

O le faasaoina mai o le Tusi Paia atoa i o tatou aso, o se vavega. Na māeʻa ona tusia i le silia ma le 1,900 tausaga ua mavae. Na tusia i luga o mea e anagofie, o pepa e faia i le ū ma kome ma paʻu o manu, ma o uluaʻi gagana na tusia ai, e lē o toe toʻatele nisi o tautatala ai. Na taumafai foʻi tamāloloa e taualoa e pei o tupu ma taʻitaʻi lotu, e tafiesea le Tusi Paia.

NA FAAPEFEA ona faasao mai lenei tusi mataʻina mai le tele o tausaga, ma avea ma tusi aupito i taatele? Seʻi tagaʻi i vala nei e lua.

O le Tele o Kopi na Faasaoina ai Tusitusiga

Na puipuia e tagata Isaraelu uluaʻi tusitusiga o le Tusi Paia, ma na latou puipuia ma faasaoina uluaʻi tusi taai ma faia nisi kopi se tele. O se faataʻitaʻiga, na faatonuina tupu o Isaraelu e fai se kopi “o lenei tulafono i se tusi ai lenā tusi o i luma o le ʻau faitaulaga o sa Levī.”—Teuteronome 17:18.

E toʻatele tagata Isaraelu na fiafia e faitau le Tusi Paia, auā na latou iloa o Afioga ia a le Atua. Na matuā faaeteete lava le auala na kopi ai nei tusi, lea na faatinoina e tusiupu atamamai. O se tasi o na tusiupu e mataʻu i le Atua, o lona suafa o Esera ma o se “tusiupu poto foʻi o ia i le tulafono a Mose, na tuuina mai e Ieova le Atua o Isaraelu.” (Esera 7:6) O tagata Masoreta na kopiina Tusitusiga Eperu, po o le “Feagaiga Tuai,” mai le senituri lona 6 i le senituri lona 10 T.A., na latou faitauina mataʻitusi i mataupu ina ia aua neʻi sesē. Ona sa kopiina i se auala faaeteete ma le saʻo, na faamautinoa ai le saʻo aʻiaʻi ma le faasaoina o le Tusi Paia, e ui i taumafaiga faifai soo a fili e faaleaga le Tusi Paia.

O se faataʻitaʻiga, i le 168 T.L.M., na taumafai ai le taʻitaʻi Suria o Atioko IV e faaleagaina kopi uma o Tusitusiga Eperu na maua i Palesitina. Na faapea mai se talafaasolopito a Iutaia: “O so o se tusi lava o le tulafono na latou maua, na saei ma susunuina.” Na faapea mai le The Jewish Encyclopedia: “O i latou na tofia e faatinoina nei mea e matuā sauā i latou . . . Pe a umia se tusi e paia . . . o le a faasala i le oti.” Ae na sao mai kopi o le Tusi Paia i tagata Iutaia i Palesitina ma isi na aumau i isi atunuu.

E leʻi leva ona māeʻa le tusiaina o Tusitusiga Eleni, po o le “Feagaiga Fou,” ae faateleina loa kopi o a latou tusi faagaeeina, valoaga, ma talafaasolopito na faia. O se faataʻitaʻiga, na tusia e Ioane lana Evagelia a lē i Efeso, pe latalata foʻi i Efeso. Peitaʻi, na maua se vaega o lenā Evagelia, o se vaega o se kopi lea e faapea mai le ʻaupopoto na faia e itiiti ifo i le 50 tausaga talu ona ia tusia lana tusi, lea na maua i le faitau selau o maila le mamao i Aikupito. Na faaalia mai i nei mea na maua, na iai kopi faagaeeina a Kerisiano i atunuu mamao ia e leʻi leva ona tusia.

Ona o le tele o Tusi Paia ua tufaina atu, ua fesoasoani ai i le faasaoina o le tele o kopi i senituri ina ua mavae vaitaimi o Keriso. O se faaaʻoaʻoga, i le vaveao o Fepuari 23, 303 T.A., na molimauina ai e le Emeperoa Roma o Diocletian, a o talepe e ana fitafita le faitotoʻa o se falesā ma susunu kopi o le Tusi Paia. Atonu na manatu Diocletian e mafai ona ia aveesea le faa-Kerisiano e ala i le faaleaga o a latou tusitusiga paia. I le aso na sosoo ai, na ia faatonuina uma tagata i Roma, e susunu uma kopi o le Tusi Paia i nofoaga faitele. Peitaʻi, e iai kopi na sao, ma na toe faia nisi kopi. E lē gata i lea, o se vaega tele o ni kopi se lua  o le Tusi Paia Eleni atonu na fai ina ua māeʻa sauāga a Diocletian, o loo iai lava seʻia oo mai i le asō. O le tasi kopi o loo i Roma; a o le isi kopi o loo i le Faletusi i Peretania i Lonetona, Egelani.

E ui e leai se uluaʻi vaega o le Tusi Paia ua mauaina, ae faitau afe kopi o le Tusi Paia atoa po o ni ona vaega na tusilima, na mafai ona faasaoina seʻia oo mai le asō. E matuā leva lava nisi kopi. Pe na suia le feʻau na iai i uluaʻi tusi a o kopiina? Na faapea mai W. H. Green e tusa ma Tusitusiga Eperu: “E mafai ona tatou faapea atu ma le mautinoa, e leai se isi tusi ua leva na mafai ona kopiina i se auala e saʻo aʻiaʻi.” Na faapea mai Sir Frederic Kenyon o se tagata iloga e faatatau i Tusitusiga Eleni: “O le va na tusia ai uluaʻi tusi ma uluaʻi faamaoniga o le sao mai o na uluaʻi kopi, e lē o toe tāua, ma o nisi masalosaloga i le saʻo o le Tusi Paia e pei ona tusia muamua ai, ua aveesea nei. Ua faamaonia nei le moni ma le faamaoni o tusi o le Feagaiga Fou.” Na ia toe faapea mai: “Ua mafai nei ona tatou matuā mautinoa i le faamaoni o tusi o le Tusi Paia. . . . E lē mafai ona tatou mautinoa faapena i se tusi mai anamuā a le lalolagi.”

Faaliliuga o le Tusi Paia

O le vala lona lua ua avea ai le Tusi Paia ma tusi e aupito i taatele, o le maua lea i le tele o gagana. E ōgatusa lenei manatu ma le finagalo o le Atua, ina ia iloa ma tapuaʻi atu tagata o atunuu uma iā te ia i le “agaga ma le upu moni.”—Ioane 4:23, 24; Mika 4:2.

O le faaliliuga muamua o le Tusi Paia Eperu, o le Septuagint i le gagana Eleni. Na faia lenei faaliliuga mo tagata Iutaia e tautatala i le gagana Eleni, o ē na nonofo i fafo atu o Palesitina, ma sa māeʻa lenei faaliliuga i le pe ā ma le toe lua senituri amata le auaunaga a Iesu i le lalolagi. O le Tusi Paia atoa, lea e aofia ai ma le Tusi Paia Eleni, na faaliliu i le tele o gagana i nai senituri mulimuli ane ina ua māeʻa ona faaliliuina. Mulimuli ane, nai lo le taumafai malosi o tupu ma faifeʻau e tufa atu le Tusi Paia i le toʻatele o tagata, na tuufaafeagai a latou gaoioiga na fai. Na latou taumafai e taofiofia tagata i le pogisa faaleagaga, e ala i le taofia o le faaliliuina o le Afioga a le Atua i gagana e masani ai tagata.

Ona o le lē usiusitaʻi atu i Lotu ma le malo, na lamatia ai ola o ni tamāloloa totoa i le faaliliuina o le Tusi Paia i le gagana e malamalama ai tagata. O se faataʻitaʻiga, i le 1530, na faia ai e Viliamu Tiniteli mai Egelani, o lē na aʻoaʻoina i Oxford, se isi kopi o le Penetatuka, o tusi muamua e lima o Tusitusiga Eperu. E ui i teteega, ae na avea o ia ma tagata muamua na faaliliuina le Tusi Paia mai le gagana Eperu i le faa-Peretania. O Tiniteli foʻi le faaliliu faa-Peretania muamua na faaaogāina le suafa o Ieova. O se tagata poto i le Tusi Paia mai Sepania o Casiodoro de Reina, sa lamatia foʻi lona ola mai tagata tetee Katoliko, a o ia taumafai e faaliliu se tasi o uluaʻi Tusi Paia i le faa-Sipaniolo. Na ia malaga i Egelani, Siamani, Falani, Holani, ma Suisilani a o ia taumafai e faauma lana faaliliuga. *

I aso nei ua faateleina gagana eseese ua faaliliuina i ai le Tusi Paia, ma e faitau miliona kopi ua lomia. O le faasaoina o le Tusi Paia ma avea ma tusi e aupito i taatele i aso nei, ua faamaonia ai le moni o upu faagaeeina a le aposetolo o Peteru: “E magumagu le mutia ma e toʻulu ese ona fuga, a o le afioga a Ieova, e tumau lea e faavavau.”—1 Peteru 1:24, 25.

[Faaopoopoga i lalo]

 [Pusa/Ata i le itulau 30]

O LĒ FEA LE FAALILIUGA E TATAU ONA OU FAITAU I AI?

E anoanoaʻi gagana e tele a latou faaliliuga o le Tusi Paia. O nisi faaliliuga, latou te faaaogā le gagana e faigatā ma toe maotua ona faaupuga. O nisi faaliliuga, ua faafaigofie, ma toe faaupu ina ia faigofie ona faitau, nai lo le saʻo aʻiaʻi. A o nisi ua faaliliuina i le upu i le upu.

O le faaliliuga faa-Peretania o le Tusi Paia o le Lalolagi Fou, na lomia e Molimau a Ieova, ma na sauniunia saʻo mai i uluaʻi gagana ma e lē o faailoaina mai le komiti na galulue ai. O lenei faaliliuga ua faaaogā e faaliliu ai Tusi Paia i le pe a ma le 60 isi gagana. Peitaʻi, o i latou o loo faaliliuina le Tusi Paia i na gagana, e latou te faia se faatusatusaga tele i le uluaʻi gagana na faaaogā. O le sini a le faaliliuga o le Lalolagi Fou, ia faaliliu i le upu i le upu pe afai e lē o natia ai le uiga moni. O loo taumafai le ʻaufaaliliu e faaliliu le Tusi Paia ina ia malamalamagofie i le ʻaufaitau i aso nei, e pei ona iai le ʻaufaitau i taimi o le Tusi Paia.

Ua iloiloina e nisi tagata e atamamai i gagana faaliliuga o le Tusi Paia i aso nei, e aofia ai ma le Lalolagi Fou, mo ni mea e lē saʻo ma faaituʻau. O se tasi o i latou na o Jason David BeDuhn o se sui polofesa i mataupu tau tapuaʻiga i le Iunivesite o Northern Arizona i Amerika. I le 2003 na ia lomia ai se tusi e 200 itulau e faatatau i “Tusi Paia e iva lea e sili ona faaaogā e tagata i le faa-Peretania.” * Na aofia i ana suʻesuʻega mau o le Tusi Paia ia e tele ina feteenaʻi ai tagata popoto, auā o i inā “lea e tele ai ina faaituʻau ai le faaliliuga.” I fuaiupu taʻitasi, na ia faatusatusa ai le mau i le gagana Eleni ma faaliliuga faa-Peretania taʻitasi, ma na ia vaai pe na iai ni taumafaiga faaituʻau e suia le uiga. O le ā le iʻuga o ana suʻesuʻega?

Na faapea mai BeDuhn e manatu tagata lautele ma nisi e atamamai i le Tusi Paia, o le eseesega i le faaliliuga o le Lalolagi Fou (NW) ona o le faaituʻau o ā latou ʻaufaaliliu. Peitaʻi, na ia taʻua faapea: “O le tele lava o eseesega ona o le saʻo tele o le NW i le pipii atu i uluaʻi faaupuga, ma le faia ma le faautauta.” E ui e lē ioe BeDuhn i isi faaupuga o le Lalolagi Fou, ae na ia faapea mai “e pito i saʻo le faaliliuga lenei nai lo isi faaliliuga na faia i ai faatusatusaga.” Ua ia faapea mai e “mataʻina tele” lenei faaliliuga.

E tai faapena foʻi le manatu o Dr. Benjamin Kedar o se tagata poto i le gagana Eperu i Isaraelu, e faatatau i le Tusi Paia o le Lalolagi Fou. Na ia faapea mai i le 1989: “E atagia mai i lenei galuega ni taumafaiga faamaoni e maua ai le malamalamaga saʻo o mau. . . . Ou te leʻi maua lava i le Tusi Paia o le Lalolagi Fou se manatu faaituʻau ina ia suia ai le uiga o se mau.”

Ia fesili ifo iā te oe lava: ‘O le ā loʻu sini i le faitauina o le Tusi Paia? Pe ou te manaʻo i le faigofie ona faitau ae lē saʻo? Po o oʻu manaʻo e faitau manatu ua tusia e atagia mai ai uluaʻi upu faagaeeina na tusia ai?’ (2 Peteru 1:20, 21) E fuafua le faaliliuga e te faaaogā i lou sini.

[Faaopoopoga i lalo]

[Ata]

E tele gagana e maua ai le faaliliuga o le “Tusi Paia o le Lalolagi Fou”

[Ata i le itulau 28, 29]

Tusitusiga faa-Masoreta

[Ata i le itulau 29]

Se vaega o tusitusiga o loo iai i le Luka 12:7, “. . . aua neʻi outou fefefe; e sili atu ona tāua outou nai lo tamaʻi manulele e tele”

[Ē Ana le Ata i le itulau 29]

Foreground page: National Library of Russia, St. Petersburg; lona lua ma le lona tolu: Bibelmuseum, Münster; background: © The Trustees of the Chester Beatty Library, Dublin