Na ia faapea mai: “O le a siitaua atu isi atunuu i isi atunuu, ma isi malo i isi malo. O le a iai foʻi mafuiʻe tetele, o oge ma faamaʻi i lea mea ma lea mea.” (Luka 21:10, 11) E tai pei o tositosi ia e faia aʻe ai le tulagālima o se tasi, o le tutupu uma o nei mea o le a faailoa mai ai e lē mafai ona sesē le faailoga. E pei lava ona faamaonia se tasi i lona tulagālima, o le tutupu uma la o nei mea i le taimi e tasi, e faailoa mai ai ʻua latalata le Malo o le Atua.’ Po ua tutupu uma nei faailoga i se taimi se tasi ma i le lalolagi atoa? Ia mātau faamaoniga nei.

1. TAUA

I le 1914, o le taua muamua lea i le talafaasolopito ua aafia ai le toʻatele o tagata nai lo o se isi lava taua. E masani ona taʻua e tusitala o le talafaasolopito le tausaga 1914, o se tausaga na matuā suia atoatoa ai le tulaga o mea i le lalolagi, ona o le taua muamua lava lea a le lalolagi. O le taua lenei na faaaogā uma ai tanetau na iai, pomu e toʻulu ifo mai i vaalele, fana taavili, kasa oona ma isi auupega e oti ai. Na sosoo atu ai ma le taua lona lua a le lalolagi lea na faatoʻā maua ai meatau atomika. O loo faaauau pea ona tau e tagata taua mai i lea vaipanoa i lea vaipanoa talu mai le 1914. O na taua ua fasiotia ai le faitau miliona o tagata.

2. MAFUIʻE

Na taʻua e le Encyclopædia Britannica i tausaga taʻitasi, e pe ā ma le 100 mafuiʻe malolosi e mafai ona iai ni ona “aafiaga tugā.” Pe a fua i faamaumauga a le Geological Survey i Amerika talu mai le 1900, na taʻua ai e 16 mafuiʻe malolosi e latou te faatalitalia i so o se tausaga. O nisi ua manatu e lē toe iai ni mafuiʻe, ae ua iloa e saienitisi le tele o isi mafuiʻe, ona o le lelei o le faatekinolosi. Peitaʻi, o le mea moni o mafuiʻe ua faapogaia ai mafatiaga ma maʻimau ai soifua o tagata, ma o se mea e leʻi tupu muamua lava.

 3. UTIUTI O MEATAUMAFA

Ua lē lava meaʻai i le lalolagi atoa ona o taua, faiga piʻopiʻo, paʻū le tamaoaiga ma le faaleagaina o mea totō. I le lipoti a le World Food Programme’s i le 2018, na taʻua ai: “E 821 miliona i latou i le lalolagi atoa o loo fia aai, ae 124 miliona i latou ua matuā leai lava ni meaʻai.” O le lē lava o meaʻai ua iʻu atu ai i le maliliu o le 3.1 miliona o tamaiti i tausaga taʻitasi. I le 2011, o le māfuaaga lava foʻi lea o le maliliu ai o le 45 pasene o tamaiti i le lalolagi atoa.

4. FAAMAʻI MA FAAMAʻI OTI

Na taʻua e le Faalapotopotoga o le Soifua Mālōlōina i le Lalolagi: “Ua mātaulia le senituri lona 21 i le tele o faamaʻi mataʻutia. O faamaʻi ua leva lea ua toe maua e pei o le maʻi manava (cholera), faamaʻi oti ma le fiva samasama, ae ua iai foʻi ma faamaʻi fou e pei o le SARS, o faamaʻi pipisi mataʻutia e pei o le MERS, Ebola ma le Zika.” O le faamaʻi pipisi mataʻutia lata mai nei o le KOVITI-19. E ui i le alualu i luma o le atamai o fomaʻi ma saienitisi e faatatau i faamaʻi, ae e lē o mafai ona latou aumaia se vaifofō mo faamaʻi eseese.

5. LE GALUEGA TALAʻI I LE LALOLAGI ATOA

Na toe taʻua e Iesu se isi vaega o le faailoga ina ua ia faapea mai: “O le a talaʻiina atu foʻi lenei tala lelei o le Malo i le lalolagi atoa e fai ma molimau i atunuu uma, ona oo mai ai lea o le iʻuga.” (Mataio 24:14) A o feagai ai le lalolagi ma faafitauli matuiā, e silia ma le valu miliona tagata mai i atunuu uma, o loo talaʻia le tala lelei o le Malo o le Atua i atunuu e 240 ma e silia i le 1,000 gagana. O se mea e leʻi tupu muamua lava i le talafaasolopito o tagata.

Ua tatou vaaia le tutupu i aso nei o mea ia na faailoa mai e Iesu e fai ma faailoga. Aiseā e tatau ai ona tatou iloa nei mea? Talu ai na fetalai Iesu: “Pe a outou vāai ua tutupu nei mea, ia outou iloa ua latalata mai le Malo o le Atua.”—Luka 21:31.

O faailoga ia na faailoa mai e Iesu faatasi ai ma faasologa o mea e tutupu o loo i le Tusi Paia, ua fesoasoani iā i tatou e malamalama ai i le Malo o le Atua, lea na ia faatūina i le lagi i le 1914. a O le taimi lenā na ia tofia ai lona Alo o Iesu Keriso e fai ma Tupu. (Salamo 2:2, 4, 6-9) Pe a pulea e le Malo o le Atua le lalolagi, o le a ia aveesea pulega faatautavā uma ma faafoʻisia le lalolagi, e avea ma parataiso e nonofo ai tagata e faavavau.

Ua toe o se aga ona faataunuuina lea o upu o le tatalo lea na aʻoaʻo mai e Iesu: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) O ā mea ua faataunuuina e le Malo o le Atua talu mai lona faavaeina i le 1914? Ma o le ā e tatou te tulimataʻia pe a aveesea atoatoa e le Malo o le Atua pulega faaletagata?