Na ou fanau i le 1948 i se tamaʻi nuu i le itu i saute i sisifo o Nigeria. O le tausaga foʻi lenā na papatiso ai le uso laʻitiiti o loʻu tamā o Moustapha, ma loʻu uso matua o Wahabi. I le iva o oʻu tausaga, na maliu ai loʻu tamā ma na ou matuā mafatia ai lava. Na fai mai Wahabi, e matou te toe feiloaʻi ma lo matou tamā pe a toetū mai. O lenā manatu faamāfanafanaloto, na uunaʻia ai aʻu e suʻesuʻe le Tusi Paia ma ou papatiso ai i le 1963. Na papatiso foʻi isi oʻu uso e toʻatolu.

I le 1965, na ou alu ai i Lagos i le isi oʻu uso matua o Wilson, ma na ou fiafia e faifaimea faatasi ma isi paeonia sauatoa i le faapotopotoga a Igbobi. O lo latou olioli ma le maelega na uunaʻia ai aʻu e paeonia. O lea, iā Ianuari i le 1968 na amata ai loa laʻu paeonia.

Na faamaopoopo e se uso e auauna i le Peteli o Albert Olugbebi se faatasiga faapitoa ma le ʻautalavou, e talanoa mai ai e faatatau i le manaʻoga mo ni paeonia faapito i le itu i mātū o Nigeria. Ou te manatua lava lana faamatalaga faalaeiau: “O lenā e te talavou, ia faaaogā lou taimi ma le malosi e auauna ai iā Ieova. O loo tele pea galuega e mafai ona e faia.” O loʻu naunau tele e faaaʻoaʻo i le agaga tauofo o le perofeta o Isaia, na faatumu  ai loa laʻu pepa talosaga e avea o se paeonia faapito.—Isa. 6:8.

Iā Me i le 1968, na tofia ai aʻu e auauna o se paeonia faapito i le aai o Kano i le itu i mātū o Nigeria. O le taimi lea o loo faia fetauaʻiga i totonu o Nigeria mai i le 1967 e oo i le 1970. Na matuā mafatia tagata ma e tele ola na maʻimau ai. Na oo atu na fetauaʻiga i le itu i sasaʻe o Nigeria. Na talanoa mai se tasi uso e aua neʻi oʻu alu. E ui lava e lelei le uunaʻiga na ia faia ai faapea, ae na ou tali atu: “Ou te talisapaia lou manatu mamafa iā te aʻu, ae pe afai o le finagalo o Ieova ou te auauna i lenei vaipanoa, ou te mautinoa o le a ia faatasi ma aʻu.”

Na matuā faatamaʻia le aai o Kano ona o fetauaʻiga. Pe a matou ō i le talaʻiga, e iai taimi e matou te tau atu ai i tino o tagata oti na fasiotia i fetauaʻiga. E tele faapotopotoga sa iai i Kano, ae o le toʻatele o uso ua sosola. E lē atoa se toʻa 15 o tagata talaʻi na totoe ai, ma na latou lagona le fefefe ma le lotovaivai. Peitaʻi, na latou matuā fiafia ina ua matou taunuu atu ma isi paeonia faapito e toʻalima. Na matou faalaeiau iā i latou ma na latou lagona ai le faafouina. Na matou fesoasoani foʻi iā i latou e toe faamaopoopo sauniga ma le galuega talaʻi, ma toe amata ona lafo lipoti o le auaunaga i le fanua ma ota o lomiga i le lālā.

Na amata ona matou aʻoaʻoina ma isi paeonia faapito le gagana Hausa. Na talileleia i matou e le toʻatele o tagata, ina ua matou talaʻi atu le feʻau o le Malo i lenā gagana. Peitaʻi, e leʻi fiafia tagata o le lotu autū i Kano i la matou talaʻiga. O lea, na matou talaʻi ai i se auala faautauta. I se tasi taimi, na tuli ai i maʻua ma laʻu paga e se tamāloa na sau ma se sapelu. Ae o le mea e faafetai ai, e na te leʻi maua i maʻua ona e sili atu lo ma saoasaoa nai lo o ia. E ui na lamatia o matou ola, ae ona o Ieova na matou ʻnonofo ai ma le saogalemu,’ ma na faatupulaʻia pea le fuainumera o tagata talaʻi. (Sala. 4:8) I aso nei, e silia ma le 500 tagata talaʻi o loo auauna i faapotopotoga e 11 i Kano.

Iā Aokuso i le 1968, na tofia ai i matou ma isi paeonia faapito e toʻalua e galulue i Niamey, le  laumua o Niger. Na matou iloa mulimuli ane o Niger i Aferika i Sisifo, o se tasi lea o vaipanoa e sili ona vevela i le lalolagi. E lē gata i le vevela o le atunuu, ae na manaʻomia foʻi ona matou aʻoaʻoina le faa-Falani, o le gagana autū lea na tautatala ai tagata. E ui i na luʻi, ae na matou maufaatuatuaina Ieova ma amata ona talaʻi i Niamey faatasi ai ma ni nai tagata talaʻi sa nonofo i inā. E leʻi umi ae toetoe o tagata uma i Niamey o ē e mafai ona faitau, na latou mauaina se kopi o le tusi, O Le Upu Moni E Taʻitaʻia Ai i le Ola Faavavau. Na iai foʻi tagata na ō atu e mananaʻo i ni a latou tusi.

Na matou iloa ane, e leʻi fiafia le faigāmalo i Molimau a Ieova. Iā Iulai i le 1969, na faia ai le fonotaga matagaluega muamua i le atunuu, ma e pe ā ma le toʻa 20 i matou na auai ai. Na matou tulimataʻia le papatisoga o tagata talaʻi fou e toʻalua. Peitaʻi, i le aso muamua o le fonotaga na ō atu ai leoleo ma taofi le polokalame. Na latou ave i matou ma isi paeonia faapito ma le ovasia o le matagaluega i le ofisa o leoleo. Ina ua uma ona tuʻifesili i matou, na latou faatonuina i matou e toe ō atu i le aso na sosoo ai. Na matou iloa e iai se mea e ono tupu. O lea, na faatulaga ai le faia o le lauga o le papatisoga i le fale o se uso, ona fai faalilolilo lea o le papatisoga i se vaitafe.

I ni nai vaiaso mulimuli ane ai, na faatonuina ai i matou ma isi paeonia faapito e toʻalima e le Matagaluega o le Lotoifale (Ministry of the Interior), ina ia ō ese ma le atunuu. E na o le lua aso na tuu mai e matou te tapena ese ai, ma e saʻili e i matou lava le auala e ō ese ai. Na matou usitaʻia lenā faatonuga ma matou ō loa i le ofisa o le lālā i Nigeria, lea na maua mai ai o matou tofiga fou.

Na tofia aʻu i le nuu o Orisunbare ma e lē toʻatele se ʻautalaʻi i inā. Na ou fiafia e galulue faatasi ma i latou i le talaʻiga ma le faia o suʻesuʻega faale-Tusi Paia. Ae ina ua mavae masina e ono, na valaaulia aʻu e le ofisa o le lālā e toe foʻi i Niger na o aʻu. Na faateʻia aʻu i le taimi muamua ma na ou lagona le popole. Peitaʻi, na ou matuā naunau lava e toe feiloaʻi ma le ʻauuso i Niger.

I le aso lona lua talu ona ou taunuu i Niamey, na ma feiloaʻi ai ma se tagata faipisinisi mai i Nigeria. Na ia iloa o aʻu o se Molimau a Ieova ma na ia fia malamalama i le Tusi Paia. O lea, na ou faia ai lana suʻesuʻega ma na papatiso ina ua tuu lana ulaula ma le inu tele. Na ou fiafia ona na faia soʻu sao i le faatupulaʻia o tagata na aʻoaʻoina le upu moni i Niger. O le taimi muamua na ou taunuu ai i Niger e toʻa 31 Molimau a Ieova na iai, ae ou te alu ese ua toʻa 69.

Iā Tesema i le 1977, na ou toe foʻi ai i Nigeria mo se toleniga na faia mo le tolu vaiaso. I le vaiaso mulimuli o lenā toleniga na aumai ai e Malcolm Vigo, o le sooupu o le Komiti o le Lālā se tusi mai i le lālā a Sierra Leone. Na manaʻomia se uso e lelei le soifua mālōlōina, ma o se paeonia  nofofua e tautala i le faa-Peretania ma le faa-Falani, ina ia auauna o se ovasia o le matagaluega i Guinea. Na faailoa mai e le uso o Malcolm o le toleniga sa faia e sauniunia ai aʻu mo lenā faaeaga, ma na ia faamanino mai foʻi e lē faigofie lenā tofiga. Na ia fautua mai, “Ia mafaufau muamua a o leʻi faia sau faaiʻuga.” Ae na vave ona ou tali atu, “Afai o le finagalo lea o Ieova o le a ou alu.”

Na ou malaga i Sierra Leone ma feiloaʻi ai ma uso i le ofisa o le lālā. Na faapea mai se tasi o sui o le Komiti o le Lālā, “E matou te lē o iloa le tulaga o loo iai uso ma tuafāfine i Guinea.” Na gafa le lālā ma le vaaia o le galuega talaʻi i Guinea, ae e leʻi mafai ona maua se fesootaʻiga ma tagata talaʻi ona o fevaevaeaʻiga i le faigāmalo a Guinea. E ui i le tele o taumafaiga a le lālā e auina atu se uso e asiasi i uso ma tuafāfine i inā, ae e leʻi mafai ona faia faapea. O lea, na talosagaina ai aʻu e le ofisa o le lālā ou te alu i Conakry le laumua o Guinea, ina ia taumafai pe maua soʻu pemita nofomau.

Ina ua ou taunuu i Conakry, na ou alu loa i le amepasa o Nigeria ma faamatala i ai ou te fia talaʻi i Guinea. Na ia ʻaiʻoi mai e lē tatau ona ou nofo ina neʻi faafalepuipuiina aʻu pe oo atu foʻi i se isi tulaga e sili ona leaga. Na ia faapea mai, “Toe foʻi i Nigeria e talaʻi ai.” Ae na ou tali atu, “Ou te manaʻo lava ou te nofo.” O lea, na ia tusi atu ai i le Minisita o le Matagaluega o le Lotoifale a Guinea mo se fesoasoani, ma o le mea lenā na faia e le minisita.

Mulimuli ane, na ou toe foʻi i le ofisa o le lālā i Sierra Leone, ma faailoa i uso le faaiʻuga a le minisita. Na latou alalaga fiafia ona o le auala ua faamanuia ai e Ieova aʻu taumafaiga. O lea, ua mafai nei ona ou nofomau i Guinea.

E mai i le 1978 e oo i le 1989, na ou galue ai i le galuega femalagaaʻi i Guinea ma Sierra Leone, ae ou galue o se ovasia matagaluega suitulaga i Liberia. I le taimi muamua, na tele lava ina ou maʻi, ma na iai taimi na ou maʻi ai a o oʻu galue i nuu maotua. Peitaʻi, na faia e le ʻauuso le mea sili e ave ai aʻu i le falemaʻi.

I se tasi taimi, na ou maʻi tigāina ai i le malalia, ma na maua ni anufe i totonu o loʻu gaʻau. Ina ua ou toe malosi, na ou iloa ane sa talanoa uso po o fea e tanu ai aʻu, ona na latou manatu o le a ou oti. E ui lava i na tulaga faigatā, ae e leʻi iai lava se taimi na ou mafaufau ai e tuua laʻu auaunaga. Na ou mautinoa pea e na o Ieova lava e aumaia le saogalemu moni, auā e mafai ona ia faatutūina mai i tatou pe a maliliu.

I le 1988, na ou feiloaʻi ai iā Dorcas, o se tuafafine paeonia e lotomaulalo ma taʻumatuaina faaleagaga. Na ma faaipoipo ma galulue faatasi i le galuega femalagaaʻi. O ia o se avā e lotoalofa ma faataulaga. E 25 kilomita (15 maila) le mamao e ma te savavali ai i faapotopotoga ma ave ma ato. Ae pe a mamao le vaipanoa e iai se faapotopotoga, e ma te taumafai lava e suʻe se auala ina  ia oo ai i lenā faapotopotoga, e tusa lava po o le ā le palapalā ma le tetelē o omoomo o auala.

E ese le lototele o Dorcas. O se faataʻitaʻiga, e iai taimi e ma te uia ai vaitafe e tele ai korokotaila. O se tasi taimi na ma malaga ai mo le lima aso, ma na ma faaaogāina ni paopao e sopoʻia ai se vaitafe ona ua malepe le auala laupapa. Na paʻū Dorcas i le vai a o taumafai e oso ese mai i le paopao. E leai se isi o maʻua e iloa aau, ma e tele korokotaila na iai i le vaitafe. Ae o le mea e faafetai ai, na ō mai ni tama talavou ma laveaʻi o ia. Na iai taimi na ma miti ai i le mea na tupu ma lagona ai le fefe. Peitaʻi, e leʻi taofia ai i maʻua mai i le faaauau pea i le galuega femalagaaʻi.

I le amataga o le 1992, na matuā faateʻia i maʻua ina ua iloa ane ua tō Dorcas. Po o le mutaaga lea o le ma auaunaga faataimi atoa? Na ma mafaufau “ua foaʻi mai e Ieova se meaalofa!” O lea, na ma filifili ai e faaigoa le ma tama teine o Jahgift. Ina ua mavae le fā tausaga ae fanau le isi ma tama, o Eric. O le mea moni o le ma fanau o ni meaalofa mai iā Ieova. Na auauna Jahgift mo sina taimi i le ofisa faaliliu i Conakry, ma ua avea Eric o se auauna o le faiva.

E ui lava na iai le taimi na lē toe avea ai Dorcas o se paeonia faapito, ae na faaauau pea ona paeonia sauatoa ma tausia aʻe le ma fanau. O le fesoasoani a Ieova na ou faaauau ai pea i le auaunaga faataimi atoa. Ina ua matutua le ma fanau, na mafai ona toe auauna Dorcas o se paeonia faapito. O loo ma auauna nei o ni misionare i le fanua i Conakry.

Po o fea lava na tofia i ai aʻu e Ieova, na ou alu lava. E ma te lagona lava ma Dorcas lana puipuiga ma lana faamanuia. O le maufaatuatuaina o Ieova ua ma lē soona popole ai i faafitauli, o loo pagatia ai i latou e tuu atoa lo latou faatuatuaga i meafaitino. Ua ma aʻoaʻoina mai i mea na tutupu, o le puna o le saogalemu moni o Ieova ʻle Atua lo ma faaolataga.’ (1 No. 16:35) Ou te mautinoa o le a “puipuia” i latou uma e maufaatuatuaina Ieova, “e pei ona puipuia e se tasi o mea tāua i se ato.”—1 Samu. 25:29.