UA TELE tausaga o faapea mai tagata faitio i le Tusi Paia, e lē moni le tupu o Pelesara lea o loo i le tusi o Tanielu. (Tani. 5:1) Na māfua ona latou manatu faapea, ona e leʻi maua e tagata na suʻesuʻeina toega mea mai i le eleele ni faamaoniga e iloa ai na soifua moni o ia. Peitaʻi, na suia lenā manatu i le 1854. Aiseā?

I le tausaga 1854, na suʻesuʻe ai e le Konesula Peretania e igoa iā J. G. Taylor nisi o mea na faaleagaina i le aai o Uro anamua, lea o loo i le itu i saute o Iraq i aso nei. O i inā na iai se olo tele, na maua ai e Taylor ni ipu omea laumiumi (e tai pei ona foliga o se apa eleni.) O nei ipu omea, e pe ā ma le fā inisi le uumi (10 senitimita), ma o loo tusia ai ni faaupuga. I tusitusiga i se tasi o ipu omea, o loo aofia ai se tatalo ina ia faaumiumi le ola o Naponita le tupu o Papelonia ma lona atalii ulumatua o Pelesara. O lea, na ioe tagata na faitio i lenā manatu. O nei ipu omea ua faamaonia ai na soifua moni lava Pelesara.

Peitaʻi, o loo taʻua i le Tusi Paia e lē gata o Pelesara o se tagata moni, ae na avea foʻi o ia ma tupu. Na lē talitonu foʻi tagata faitio. O se faaaʻoaʻoga, na faapea mai William Talbot o se saienitisi i le senituri 19, ua fai mai nisi tagata, “O Pelesarusa [Pelesara] na pule faatasi ma Naponita lona tamā. Ae e matuā leai lava ma se faamaoniga o lenā manatu.”

Na mafai ona foʻia lenā finauga ina ua faaalia i tusitusiga i isi ipu omea, na toesea mai i le aai o Papelonia le tamā o Pelesara le tupu o Naponita mo ni tausaga. O le ā na tupu a o toesea o ia? Ua taʻua i le Encyclopaedia Britannica e faapea, “A o ave faapagota Naponita, na ia tuuina atu iā Pelesara e pule i lona malo ma le vaega tele o lana ʻautau.” O lea la, na auauna Pelesara o se isi tupu o Papelonia i lenā taimi. O le māfuaaga lea, na faapea mai ai Alan Millard, o se tagata e suʻesuʻeina toega mea i le eleele ma o ia o se tagata atamai i gagana, na talafeagai “ona taʻua i le Tusi o Tanielu Pelesara o le ʻtupu.’”

Ae mo auauna a le Atua, o faamaoniga sili o le maufaatuatuaina ma le faagaeeina e le Atua o le tusi o Tanielu, e maua i le Tusi Paia lava ia.​—2 Timo. 3:16.