NA AMATA le tausaga a tagata Eperu na nonofo i le Nuu Folafolaina i le vaitaimi e suatia ai le fanua ma lūlūina fatu, lea e faasino atu i aso nei i se vaega o Setema ma Oketopa.

E faitau e nisi tagata le uumi o masina e 12 o le tausaga e fua i le masina (moon) faatoʻā vaaia i le isi masina faatoʻā vaaia, lea e 29 po o le 30 aso le uumi. Ae e faitau e isi le umi o le tausaga e fua i le la. Peitaʻi, e puupuu atu le tausaga e fua i le masina nai lo le tausaga e fua i le la. O lea, e manaʻomia ona faafetaui nei auala e lua e faitau ai le umi o se tausaga. Na faia faapea e ala i le faaopoopo o ni aso po o se masina mai lea taimi i lea taimi, atonu a o leʻi amata le tausaga e sosoo ai. O lenā faiga e fetaui lelei ai le kalena ma le tau e totō pe selesele ai laau.

Peitaʻi i le taimi o Mose, na fetalai atu ai le Atua i Ona tagata e amata le tausaga faaletapuaʻiga i le masina o Apipa po o Nisani, i le tau e totogo ai mea. (Eso. 12:2; 13:4) O le tausamiga e fai i lenā masina e aofia ai le seleselega o karite.​—Eso. 23:15, 16.

Ua faapea mai se tagata atamai e igoa iā Emil Schürer i lana tusi The History of the Jewish People in the Age of Jesus Christ, (175 B.C.–A.D. 135): “Na faigofie ona iloa le taimi e faaopoopo ai se masina i le kalena. O le tausamiga o le Paseka e tatau ona faamanatuina pe a atoa le masina i le aso 14 o Nisani, po o le aso e sosoo ai ma le aso lea e tutusa ai le umi o le ao ma le po i le tau e totogo ai mea . . . Pe a oo i le faaiʻuga o le tausaga ma iloa ai e paʻū le Paseka i le tausaga e sosoo ai ae leʻi oo i le tau e totogo ai mea, na faaopoopo ai e tagata Iutaia le masina lona 13 i luma mai o le masina o Nisani.”

E faaaogā e Molimau a Ieova lenei tulafono e iloilo ai le aso tonu o le Talisuaga Afiafi a le Alii, lea e paʻū i le tau e totogo ai mea ma e fetaui lelei ma le aso 14 o Nisani i le kalena faa-Eperu. E faailoa mamao atu i faapotopotoga i le lalolagi aoao lenei aso. *

Ae e faapefea ona iloa e tagata Iutaia le aso e uma ai se masina, ma le aso e amata ai se masina fou? I aso nei e faigofie lava ona tatou vaai i se kalena ua uma ona lolomiina, po o se kalena i lau masini faaonapōnei. Peitaʻi, e leʻi faigofie i aso o le Tusi Paia.

E taʻi 30 aso le uumi o masina i le taimi o le Lolo. (Kene. 7:11, 24; 8:3, 4) Mulimuli ane, i kalena a tagata Eperu e iai masina e taʻi 29 aso a o isi masina e taʻi 30 aso le uumi. I le kalena faa-Eperu e amata se masina o le tausaga pe a faatoʻā vaaia le masina (moon). O i ina e fua i ai le 29 po o le 30 o aso o se masina, pe a uma le amataga o le masina muamua atu.

I se tasi o mea na tupu, na faasino atu ai Tavita ma Ionatana i se masina ina ua la faapea mai: “O a taeao o le masina faatoʻā vaaia.” (1 Samu. 20:5, 18) E foliga mai i le senituri lona 11 T.L.M., na muamua lava fuafua le faitauina o se masina. Na faapefea ona iloa e se tagata Isaraelu le aso e amata ai se masina fou? O loo taʻua i le Mishnah, o se tusi o loo tuufaatasi ai tulafono tuugutu a tagata Iutaia ma a latou tū ma aga. O loo faamatala ai, na aofia le Saniterini po o le faamasinoga sili a Iutaia i le faitauina o masina, ina ua toe foʻi tagata Iutaia na ave faapagota i Papelonia. I masina e fitu lea na fai ai tausamiga, na feiloaʻi ai le Saniterini i le aso 30 o le masina. O le matafaioi a na tamāloloa o le iloilo lea o le aso e amata ai le masina fou. O le ā na faavae aʻe ai a latou iloiloga?

Na tofia ni tamāloloa i nofoaga maualuluga i Ierusalema e vaavaai i le lagi i le po, i le taimi e oso aʻe ai se masina faatoʻā vaaia. Na vave ona latou taʻuina atu i le Saniterini. Pe a manatu le Saniterini ua lava faamaoniga o le vaaia o se masina fou, ona latou taʻuina atu lea o le aso e amata ai le masina (month) o le a sosoo ai. Ae faapefea pe a puaoa ma lē mafai ona vaaia le oso aʻe o se masina faatoʻā vaaia? I lenā tulaga, e 30  aso e tau mo le masina o loo faagasolo, ona amata ai lea o le masina fou i le aso e sosoo ai.

Na taʻua e le Mishnah, na faailoa atu le faaiʻuga a le Saniterini e ala i le tutuina o ni afi faailoilo i le Mauga o Olive e latalata i Ierusalema. Na faasalalau atu lenā tala e ala i le fai o ni afi tetele i nofoaga maualuluga i Isaraelu atoa. I tausaga mulimuli ane ai, na faaaogā ni avefeʻau e taʻu atu lenei feʻau. O lea, na iloa e tagata Iutaia i Ierusalema, Isaraelu uma ma nofoaga tūtū solo le amataga o se masina fou. Na mafai ai e tagata uma ona faamanatu tausamiga faaletausaga i le taimi e tasi.

Atonu e fesoasoani iā te oe le siata o loo iai i lenei mataupu, e malamalama ai i le fesootaʻiga o masina faa-Eperu, o a latou tausamiga ma tau.