1. Aiseā e tilofaʻia ai se lisi o vaega eseese o se vaalele a o leʻi alu se faigāmalaga?

E TILOFAʻIA e se ave vaalele se lisi o vaega eseese o se vaalele e manaʻomia ona siaki, a o leʻi alu se faigāmalaga. Pe a lē faia lenā mea, e mafai ona tulaʻi mai ai se faalavelave. E masani ona faalaeiauina i latou ua leva ona avea ma ave vaalele, e faia lenā gaoioiga a o leʻi alu se faigāmalaga. O le māfuaaga, e faigofie ona latou faalagolago i lo latou poto masani.

2. O le ā e tatau ona faia e se Kerisiano?

² E iai foʻi se lisi faaleagaga e tatau ona tatou tilofaʻia e faamautinoa ai o loo malosi lo tatou faatuatua, aemaise lava i taimi faigatā. Po o le ā lava lo tatou tulaga i le upu moni, e tāua tele ona faamautinoa o loo malosi lo tatou faatuatua. Pe a lē tilofaʻia i tatou lava mai lea taimi i lea taimi, e mafai ona lamatia lo tatou itu faaleagaga. Ua lapataʻi mai le 1 Korinito 10:12 e faapea, “o lē ua manatu o loo tū o ia, ia faaeteete neʻi paʻū.”

3. O le ā sa tatau ona faia e Kerisiano i Kalatia?

³ Sa tatau i Kerisiano i Kalatia ona faamautinoa o loo malosi lo latou faatuatua, ma talisapaia lo latou saʻolotoga faaleagaga. O le faatuatua i le togiola a Iesu, na tatala ai le avanoa mo i latou e avea ai ma atalii o le Atua, ma iloa lelei ai o Ia. (Kala. 4:9) Ina ia maua lenā faaeaga tautele, na tatau ona latou teena manatu o Kerisiano Iutaia na maumauaʻi e tausisi pea i le Tulafono faa-Mose. E leʻi toe faaaogāina e Ieova lenā Tulafono, ma e leʻi ola Kerisiano o Nuu Ese i lalo o le Tulafono. Sa tatau ona latou agaʻigaʻi i luma faaleagaga ma malamalama, e lē mafai ona  taʻuamiotonuina i latou i le tausisi pea i le Tulafono faa-Mose.

4, 5. O le ā le fautuaga a Paulo na avatu i Kalatia, ma aiseā e tāua ai mo i tatou?

⁴ Na fautua atu Paulo i Kerisiano i Kalatia, ina ia aua neʻi liliuese mai le upu moni ma toe foʻi i le lalolagi. Na faagaeeina e Ieova le aposetolo e faalaeiau i latou i Kalatia, faapea Kerisiano uma ina ia tutumau.

⁵ Pe e te manatua le auala na e saʻoloto ai faaleagaga, ma avea ai oe ma Molimau a Ieova? Ina ia faia lenā mea, e tatau ona e manatunatu i fesili nei: Pe e te manatua laasaga na e uia ina ia agavaa ai mo le papatisoga? Pe e te manatua le auala na aʻoaʻoina ai oe e faatatau iā Ieova? Ae faapefea le auala na iloa ai oe e Ieova, ma e olioli ai i le saʻolotoga faaleagaga?

6. O le ā e tatau ona tatou tilofaʻia?

⁶ O loo i le pusa  “Laasaga mo le Papatisoga ma le Tuputupu Aʻe Faaleagaga,” laasaga na tatou uia e agavaa ai mo le papatisoga. E pei na laasaga o se lisi faaleagaga, e manaʻomia ona tilofaʻia pea, e faamalosia ai i tatou ina neʻi o tatou toe foʻi i le lalolagi. E tulaueleele ma le manuia se faigāmalaga, pe a faamautinoa e le ave vaalele o loo saogalemu le vaalele. E faapena foʻi ona tatou tumau faamaoni i le auaunaga, pe a faaauau pea ona tilofaʻia la tatou lisi faaleagaga.

7. O le ā e tatau ona tatou taofimau i ai, ma aiseā?

⁷ A o leʻi alu se faigāmalaga, e tilofaʻia ma le faaeteete e se ave vaalele le lisi mo le saogalemu o le vaalele. E tatau foʻi ona iloiloina i tatou, faapea a tatou gaoioiga talu ona tatou papatiso. Na tusi Paulo iā Timoteo e faapea: “Ia e taofimau pea i le faaaʻoaʻoga [o “mamanu” po o “le ata”] o upu aogā na e faalogo ai mai iā te aʻu i le faatuatua ma le alofa e tusa ai ma Keriso Iesu.” (2 Timo. 1:13) O na “upu aogā” o loo maua i le Tusi Paia. (1 Timo. 6:3) O le ata o se fale e tusia e se tufuga faufale, e mafai ona tatou iloa ai foliga o se fale. E faapena ona tatou iloa mea e faafinagaloina e Ieova, e ala mai i ʻmamanu po o ata o upu aogā.’ O lea, seʻi o tatou iloiloina laasaga na tatou uia mo le papatisoga, ina ia iloa le auala o loo tatou mulimuli ai i ʻmamanu po o ata o upu aogā.’

8, 9. (i) Aiseā e tatau ai ona tuputupu aʻe lo tatou poto ma le faatuatua? (ii) Faataʻitaʻi le auala e tatou te tuputupu aʻe ai faaleagaga.

⁸ E muamua i la tatou lisi faaleagaga le ave i fale o le poto, ona tuputupu aʻe lea o lo tatou faatuatua. Peitaʻi, e tatau ona tuputupu aʻe pea lo tatou poto ma le faatuatua. (2 Tesa. 1:3) O le “tuputupu aʻe” e uiga atu i le faatuputupulaʻia o se mea, ma e aofia ai le tele o suiga. O lea pe a māeʻa ona tatou papatiso, e tatau ona tatou tuputupu aʻe pea faaleagaga.

⁹ E faatusa lo tatou tuputupu aʻe faaleagaga i le ola aʻe o se laau. E ola lauusiusi se laau pe a mauaa ona aa. O se faataʻitaʻiga, e mafai ona oo le maualuga o laau arasi o Lepanona i le 120 futu (37 m) ma le telē o le ogālaau i le 40 futu (12 m). (Pese 5:15) E vave le ola aʻe o se laau. Ae pe a telē le laau, e faasolosolo ona tuputupu pea, e ui e faigatā ona iloa atu. A o faagasolo tausaga, e faasolosolo ina telē le ogālaau ma sosolo pea ona  aa, ma atili ai lava ona malosi le laau. E faapena le tuputupu aʻe o se Kerisiano. Atonu e vave lona agaʻigaʻi i luma faaleagaga seʻia oo ina papatiso, ma e faigofie ona mātaulia e le faapotopotoga. Atonu e avea i tatou ma paeonia, ma maua foʻi isi faaeaga. Ae a o faagasolo tausaga, atonu e lē faigofie ona mātauina lo tatou agaʻigaʻi i luma faaleagaga. E ui i lea, o loo tuputupu pea lo tatou poto ma le faatuatua, seʻia oo ʻina avea ma tagata matua, ina ia atoatoa ona matua e pei o Keriso.’ (Efe. 4:13) E tatau ona tatou tuputupu aʻe pea seʻia oo ina avea ma Kerisiano taʻumatuaina, e pei lava o le tuputupu aʻe o se laau.

10. Aiseā e tāua ai le tuputupu aʻe pea faaleagaga, e oo lava i Kerisiano taʻumatuaina?

¹⁰ E lē tatau ona gata mai lo tatou tuputupu aʻe faaleagaga. O lo tatou poto ma le faatuatua e tatou te mausalī ai e pei o aa o le laau. O lea, e tatau ona tuputupu pea lo tatou poto ma faamalosia lo tatou faatuatua. (Faata. 12:3) E toʻatele uso ma tuafāfine i faapotopotoga o loo faaauau pea ona faia lenā vala. Na faapea mai se uso ua silia ma le 30 tausaga o avea ma toeaina: “E faalolotoina pea loʻu talisapaia o le Tusi Paia. Ou te mauaina pea avanoa e faatatau ai mataupu silisili ma tulafono o le Tusi Paia i loʻu olaga. E tuputupu pea loʻu talisapaia o laʻu faiva.”

11. E faapefea ona tatou iloa lelei Ieova?

¹¹ E aofia i le tuputupu aʻe faaleagaga, le faalatalata atu i la tatou Uō ma lo tatou Tamā o Ieova. E malu se tamaitiiti i le tausiga alofa a ona mātua. E tatou te lagona foʻi le malupuipuia pe a faatasi ma se uō faamaoni. E finagalo foʻi Ieova e tatou te lagona le alofa ma le malupuipuia, i la tatou faauōga ma ia. Peitaʻi, e lē faavavega ona tupu lenā mea. E tatau ona lava se taimi e tatou te iloa lelei ai Ieova, ona tuputupu aʻe lea o lo tatou alofa mo ia. Ina ia iloa lelei Ieova, e tatau ona sema se taimi i aso taʻitasi e faitau ai lana Afioga. E lē gata i lea, ia faitau lomiga o le Olomatamata ma le Ala Mai!, faapea isi lomiga faale-Tusi Paia.

12. Aiseā e tāua ai le iloa lelei e Ieova o i tatou?

¹² I le avea ma uō a le Atua, e mafai ona tatou tuputupu aʻe faaleagaga e ala  i le tatalo faatauanau, faapea faauōga lelei. (Faitau le Malaki 3:16.) Ua faapea mai le 1 Peteru 3:12 e faatatau iā Ieova, ʻe faafofoga ona taliga i la tatou talosaga.’ E pei o se matua alofa, e liuliualo mai Ieova pe a tatou faatagisia lana fesoasoani e ala i le tatalo. O lea, ia tatou “finafinau i le tatalo.” (Roma 12:12) E faigatā i so tatou lava malosi ona taulima ai popolega ma faafitauli o lenei soifuaga. O le māfuaaga lea e lē mafai ai ona malosi faaleagaga se Kerisiano pe a aunoa ma le fesoasoani a Ieova. E naunau Ieova e foaʻi mai le fesoasoani ma le malosi iā i tatou. Peitaʻi, e lē mafai ona tatou maua lenā fesoasoani, pe a lē finafinau i le tatalo. Po o manaʻomia ona faaleleia a tatou tatalo?​—Iere. 16:19.

13. Aiseā e tāua ai sauniga i lo tatou tuputupu aʻe faaleagaga?

¹³ E fiafia Ieova iā i latou e “sulufaʻi atu iā te ia” mo le fesoasoani. (Nau. 1:7) E tusa pe tatou te iloa lelei Ieova, e tatau ona tatou faifaimea faatasi ma isi i le faapotopotoga, o ē e alolofa foʻi iā Ieova. O se mea atamai le faifaimea faatasi ma i latou, a o tatou iai i lenei lalolagi leaga. O le māfuaaga, e maua i le faapotopotoga i latou e uunaʻia i tatou e faaalia “le alofa” ma faia “galuega lelei.” (Epe. 10:24, 25) O le fealofani lea na taʻua e Paulo, e maua i se ʻauuso e tutusa o latou manatu i le tapuaʻiga. E tatau ona faaalia lenā alofa i a tatou feutagaʻiga ma isi uso. O lea, e tatau ona tatou auai e lē aunoa ma faia se sao i sauniga.

14. Aiseā e avea ai le salamō ma le liliuese mai agasala o se gaoioiga e faaauau pea ona fai?

¹⁴ E faalagolago le avea o i tatou ma Kerisiano i le salamō, ma liliuese mai i a tatou agasala. O le salamō o se gaoioiga e faaauau pea, ona e tatou te faia pea mea sesē ona o lo tatou tulaga lē lelei atoatoa. (Roma 3:9, 10; 6:12-14) E tatou te faafetaia le onosaʻi mai pea o Ieova, a o tatou tauivi ma o tatou vaivaiga, ma faia suiga i o tatou olaga. O lea, e lē tatau ona faatuatuanaʻi i a tatou mea sesē. (Fili. 2:12; 2 Pete. 3:9) O le faaaogā lelei o le taimi ma meafaitino, ma liliuese mai tuʻinanauga manatu faapito, e mafai ona fesoasoani iā i tatou. Na faapea mai se tuafafine: “Na ou ola aʻe i le upu moni, peitaʻi sa sesē laʻu vaaiga e faatatau iā Ieova. Na ou mafaufau e lē mafai ona ou faafiafiaina o ia.” Na faasolo ina vaivai faaleagaga le tuafafine ona o le tele o ona faafitauli. Na ia toe faapea mai: “E leʻi māfua lenā tulaga ona ou te leʻi alofa iā Ieova, peitaʻi ona ou te leʻi iloa lelei o ia. Na suia oʻu manatu, ina ua ou tatalo faatauanau atu pea iā Ieova. Na ia taʻitaʻia aʻu e pei o se tamaitiiti. Na ia fesoasoani foʻi i oʻu faafitauli, ma aumaia le fesoasoani manaʻomia.”

15. O le ā e mātauina ma talisapaia e Ieova ma Iesu?

¹⁵ Ia “taʻutaʻu atu pea i tagata” le tala lelei. O upu na a le agelu iā Peteru ma isi aposetolo, ina ua māeʻa ona faasaoina faavavega i latou mai le falepuipui. (Galu. 5:19-21) E tāua le faia o so tatou sao i le talaʻiga mai lea vaiaso i lea vaiaso. E mātauina e Ieova ma Iesu lo tatou faatuatua, ma talisapaia la tatou auaunaga. (Faaa. 2:19) E tatau ona avea le faiva ma vala autū o o tatou olaga.

16. Aiseā e tāua ai ona manatunatu i lo tatou tuuina atu iā Ieova?

¹⁶ Ia manatunatu i lo tatou tuuina atu. E silafia e Ieova o i tatou o ana auauna, ma e sili ona tāua iā i tatou la tatou faiā  ma ia. (Faitau le Isaia 44:5.) Ia tatalo ma iloilo po o le ā le loloto o la tatou faiā ma Ieova. Ina ia faia lenā mea, e tāua ona manatua le aso na tatou papatiso ai. O le faia faapea, e tatou te iloa ai o le papatisoga, o le filifiliga sili lea na tatou faia.

17. Aiseā e tāua ai le tumau ina ia mafuta ai iā Ieova?

¹⁷ I le tusi a Paulo i Kalatia, na faamamafa ai le tāua o le tumau. (Kala. 6:9) E tāua tele lenā vala mo Kerisiano i aso nei, ona e tatou te feagai ma le tele o faigatā. Peitaʻi, e tatou te maua le fesoasoani mai iā Ieova. O lea, e tāua ai ona tatalo mo le agaga paia. E foaʻi mai e Ieova le olioli ma le filemu, a o tatou feagai pea ma faafitauli. (Mata. 7:7-11) Afai e manatu mamafa Ieova i manulele, pe e lē sili ea la ona ia manatu mamafa i ē alolofa ma tuuina atu o latou ola iā te ia? (Mata. 10:29-31) Po o ā faigatā e tatou te fesagaʻia, e lē tatau ona tatou toe foʻi i tua, pe faavaivai foʻi. E tele faamanuiaga e tatou te maua, ona e silafia e Ieova i tatou.

18. O ā laasaga e sosoo ai ma le ʻiloaina o Ieova’?

¹⁸ Afai ua tatou iloa Ieova ma tuuina atu i le papatisoga, o le ā le isi laasaga e sosoo ai? E tāua ona tatou aʻoaʻoina atili e faatatau iā te ia, ma tuputupu aʻe pea i le itu faaleagaga. Ae faapefea pe afai ua leva ona tatou papatiso? E tatau ona faalolotoina lo tatou poto e faatatau iā Ieova, ma aua le soona mautinoa naʻuā i la tatou faiā ma ia. O lea, ia tilofaʻia pea la tatou lisi faaleagaga, e faamautinoa ai o loo tatou tuputupu aʻe i la tatou faiā ma lo tatou Tamā, Uō, ma lo tatou Atua o Ieova.​—Faitau le 2 Korinito 13:5, 6.