Sa ou fanau i Moundsville, o se taulaga filemu e lata i le vaitafe o Ohio, i le itu i mātū o Virginia i Sisifo. Ou te lona lua i la matou fanauga e toʻafā, ma o le toʻatolu o i matou o tama. O lea, e tele ina pisapisaō lo matou fale. O oʻu mātua o ni tagata e faigaluega mamafa, faamaoni, ma alolofa. E lē tele ni a matou tupe, ae sa maua lava mea na manaʻomia. I le avea ai ma Molimau a Ieova, sa taumafai oʻu mātua e aʻoaʻo i matou i mataupu silisili o le Tusi Paia mai lava a o matou lāiti.

Ina ua ou tuputupu aʻe, sa tosina ese loʻu loto mai i mea na aʻoaʻoina ai aʻu. Na ou fesiligia pe e aogā ma faamalieina se olaga e taʻitaʻia e mataupu silisili o le Tusi Paia. Na ou manatu o le auala sili e maua ai le fiafia moni, o le iai o le saʻolotoga e faia ai so o se mea ou te manaʻo i ai. E leʻi umi ae ou fouvale ma lē toe auai i sauniga faa-Kerisiano, ma sa faapena foʻi loʻu uso matua ma loʻu tuafafine. Na taumafai malosi o matou mātua e fesoasoani mai, ae na matou teena a la taumafaiga.

Ou te leʻi iloa o le saʻolotoga lea sa ou naunau i ai, ou te iʻu ai i se olaga leaga. I se tasi o aso ina ua tuua le aʻoga, na tuu mai ai e saʻu uō se sikareti, ma na ou taliaina. Talu mai lenā aso na ou lolo atu ai i so o se masaniga leaga, ma na iʻu ina ou faaaogāina fualaau faasāina, ʻava malosi, ma ola i se olaga lē mamā. Mulimuli ane, na pulea aʻu i fualaau faasāina mo le tele o tausaga, ma na amata ona ou faatauina atu ina ia ou ola ai.

Po o le ā lava loʻu taumafai e lē amanaʻia loʻu lotofuatiaifo, ae e faamanatu mai pea e loʻu loto iā te aʻu, e sesē mea o loo ou faia. Peitaʻi, na ou manatu e lē mafai ona toe suia le olaga matuā leaga lea ua ou oo i ai. E ui ina matou faatasitasi ma tagata i patī ma koneseti, ae sa ou lagona pea le tuua toʻatasi ma le faanoanoa. O nisi taimi ou te fesili ai pe faapefea ona ou oo i lenei tulaga, ae o oʻu mātua o ni tagata lelei.

E ui sa ou manatu e lē mafai ona toe suia loʻu olaga, ae e leʻi faapena manatu o isi. I le 2000, na valaaulia ai aʻu e oʻu mātua i se tauaofiaga itumalo a Molimau a Ieova, ma na ou alu e tau lava ina faataunuu. Na faateʻia aʻu ona sa auai ai foʻi loʻu uso ma loʻu tuafafine ia na fouvale.

A o iai i le tauaofiaga, na ou manatua ai o le nofoaga foʻi lea na ou auai ai i se koneseti. Ae na matuā pāʻia oʻu faalogona i le eseesega na ou vaaia. I le koneseti, sa otaotā le nofoaga, tumu i tagata ulaula e lē faaleuō o latou uiga, ma na lē mamā foʻi musika. Ae i le tauaofiaga, na siʻomia aʻu e tagata e fiafia moni, o ē na faafeiloaʻia ma le māfana aʻu, e ui ua tele tausaga ou te leʻi toe feiloaʻi i ai. Sa mamā le nofoaga, ma na momoli mai i lauga se faamoemoe mo le lumanaʻi. O loʻu mātauina o aafiaga lelei o upu moni o le Tusi Paia, na ou taumānatu ai pe aiseā na ou teena ai!​—Isaia 48:17, 18.

E leʻi leva ona uma le tauaofiaga, ae ou filifili loa ou te toe foʻi i le faapotopotoga Kerisiano, ma o le filifiliga foʻi lenā sa faia e loʻu uso ma loʻu tuafafine. Na matou talia uma le faia o ni suʻesuʻega faale-Tusi Paia.

Na mātua faamalosia aʻu i upu o le Iakopo 4:8: “Ia outou mafuta vavalalata atu i le Atua, ona mafuta vavalalata mai lea o ia iā te outou.” Na ou manatu, afai ou te fia mafuta vavalalata atu i le Atua, e manaʻomia la ona faamamā loʻu olaga. O nisi o suiga sa ou faia, o le tuua lea o le ulaula, faaaogāina o fualaau faasāina, ma le ʻava malosi.​—2 Korinito 7:1.

Na motusia aʻu faauōga sa iai, ae faauō atu i tagata tapuaʻi o Ieova. Sa telē se fesoasoani a le toeaina Kerisiano na ma suʻesuʻe i le Tusi Paia iā te aʻu. E masani ona vili mai pe e asiasi mai foʻi po o ā mai aʻu, ma o loo avea pea o ia ma aʻu uō mamae.

I le tau māfanafana i le 2001, na faailogaina ai loʻu tuuina atu i le Atua e ala i le papatisoga i le vai, ma e faapena foʻi loʻu uso ma loʻu tuafafine. Seʻi manatu i le olioli o oʻu mātua ma loʻu uso laʻitiiti lea sa faamaoni, ina ua toe autasia lo matou aiga i le tapuaʻiga iā Ieova!

Sa ou manatu ua faasāsā naʻuā mataupu silisili o le Tusi Paia, ae o lea ua ou iloa nei o se puipuiga tāua tele mo aʻu. Na uunaʻia aʻu e le Tusi Paia e taofia le faaaogāina ma le faatau atu o fualaau faasāina, ae avea ma tagata lelei.

Ua ou maua le faaeaga e avea ai o se vaega o tagata tapuaʻi o Ieova i le lalolagi aoao. O nei tagata e alolofa le tasi i le isi, ma e autasi i le auaunaga i le Atua. (Ioane 13:34, 35) Ua ou maua mai i na tagata tapuaʻi se faamanuiaga sili, o laʻu avā lea o Adrianne, o lē ou te alofa ma faapelepele i ai. Ua ma maua le olioli i le auauna faatasi atu i Lē na Foafoaina mea uma.

Nai lo o le ola i se olaga manatu faapito, ua avea nei aʻu ma faifeʻau talaʻi faataimi atoa, e aʻoaʻo tagata ina ia maua foʻi ni aogā mai le Tusi Paia. O lenei galuega ua aumaia ai se fiafiaga sili. Ou te faailoa atu ma le mautinoa ua suia e le Tusi Paia loʻu olaga. Ua ou maua le saʻolotoga moni.