SEʻI faapea ua faia e sau uō mamae se gaoioiga e te leʻi malamalama i ai. Ua faitio ma faamasinoina e isi le uunaʻiga o ana gaoioiga ma faapea mai e sauā. Po o le a vave ona e talitonu iā i latou, pe e te faatali mo se manatu mai i lau uō? Afai e lē o i ai lau uō, pe e te onosaʻi ma aua le vave faamasinoina ana gaoioiga?

A o leʻi taliina na fesili, e ao ona e iloa atili e faatatau i lau uō. Ia fesili ifo, ʻPe ou te iloa lelei ona uiga, ma aiseā ou te fiafia ai iā te ia?’ I se tulaga talitutusa, a o e leʻi fesiligia le Atua, iloilo po o le ā le tele o lou iloa o ia, faapea le māfuaaga e te fiafia ai iā te ia.

Atonu e faigatā ona e malamalama i nisi o mea ua faia e le Atua, pe lē mautonu foʻi i le māfuaaga ua ia lē taofia ai mea o loo tutupu. E toʻatele tagata e faapea mai e sauā le Atua, ma uunaʻia oe ina ia faamasinoina ana gaoioiga. Po o le a e vave faamasinoina le Atua, pe e te onosaʻi seʻi e malamalama atili e faatatau i ana gaoioiga? E manaʻomia ona e iloa lelei le Atua a o e leʻi faia se faaiʻuga. Ia fesili ifo, ʻO ā mea lelei ua fai e le Atua mo aʻu?’

E te ono faapea mai e lē o se uō lelei le Atua, pe a tele faigatā i lou olaga. Ae faamata o le Atua ua māfua ai tulaga faigatā i lou olaga, po o ia ua ala mai ai faamanuiaga? Ua tatou iloa o Satani o “le pule o lenei lalolagi,” ae lē o Ieova. (Ioane 12:31) O Satani le pogai o le tele o puapuaga ma amiolētonu o loo tutupu i le lalolagi. Pe e te lē ioe, o le tino lē lelei atoatoa ma mea e tutupu faafuaseʻi ua māfua ai foʻi le tele o faafitauli?

Ae faapefea Ieova le Atua? Ua faapea mai le Tusi Paia, o ia “o Lē na faia le lagi ma le lalolagi.” (Salamo 124:8) Ua faamanatu mai iā i tatou, o o tatou tino na “faia . . . i se auala mataʻutia ma ofoofogia.” (Salamo 139:14) Ua faasino atu foʻi Ieova i “le Atua o lē ua i lona aao lau mānava.” (Tanielu 5:23) O le ā le uiga o nei manatu?

Talu ai o Ieova na foafoaina i tatou, o lea ua tatou nofo aitalafu ai iā te ia. (Galuega 17:28) O le ola o loo tatou ola ai, o mea matagofie o loo i le lalolagi, fiafiaga e maua mai i le alofa o le tasi i le isi, o le tofo, le paʻi, faalogo ma le sogisogi, o meaalofa uma ia e mai i le Atua. (Iakopo 1:17) Pe e lē tatau ai ea la ona avea le Atua o se Uō e maufaatuatuaina?

O le mea moni, e ono faafaigatā ona e maufaatuatuaina le Atua. Atonu e te lagona e lē o lava sou iloa ina ia avea ai o ia ma au uō. E lē o taʻua uma i lenei lomiga māfuaaga ua faamasino ai e nisi le Atua. Pe e lē sili ai ona faia ni au taumafaiga ina ia iloa lelei le Atua? * Matou te mautinoa o lou faia faapea o le a e iloa ai le upu moni e uiga i le Atua. Pe e sauā o ia? E leai, auā ua faapea mai le Tusi Paia: “O le Atua o le alofa lava ia.”​—1 Ioane 4:8.