“E na ona taʻu mai lava o le mea e te manaʻo ai, faitalia aʻu ma fai.” Pe e te faia lenā faamatalaga i se tagata e te lē masani lelei i ai? E leai. Peitaʻi, e leai se faalētonu o lou fai atu o lenā faamatalaga i sau uō mamae. O se faigāuō lelei, e faigofie ona fai e le tasi se mea lelei mo le isi.

Ua faailoa mai i le Tusi Paia, e faia e lē aunoa e le Atua mea lelei ina ia faafiafia ai ona tagata tapuaʻi. O se faataʻitaʻiga, na faapea mai le tupu o Tavita, o lē na iai sa laʻua faiā māfana ma le Atua: “E tele lava mea ua e faia, Ieova e, loʻu Atua, e oo lava i au galuega ofoofogia ma ou manatunatuga iā i matou; . . . ua matuā tele lava, ua lē mafaitaulia.” (Salamo 40:5) Ae e sili atu i lenā, o loo faia foʻi e Ieova mea lelei e faafiafia ai ē e lē o iloa o ia, e ala i le ʻfoaʻi mai o le anoanoaʻi o meaʻai ma ua tutumu ai o latou loto i le olioli.’​—Galuega 14:17.

Talu ai o loo faia e Ieova mea e faafiafia ai isi, ua alagatatau foʻi la ona ia faatalitalia ē e mananaʻo e avea ma ana uō, ia faia mea e ʻfaafiafia ai lona loto.’ (Faataoto 27:11) O ā la ni mea patino e tatau ona e faia ina ia faafiafia ai le Atua? Ua taʻua i le Eperu 13:16: “Aua neʻi galo le faia o mea lelei, ma le tufa atu o mea i isi, auā o taulaga faapena e matuā fiafia i ai le Atua.” Po o lona uiga e pau le auala e faafiafia ai le Atua, o le faia o mea lelei ma le tufa atu o mea i isi?

Ua taʻua i le Tusi Paia: ʻA aunoa ma le faatuatua e lē mafai ona faafiafiaina ai le Atua.’ (Eperu 11:6) Manatua, na muamua “faatuatua Aperaamo iā Ieova,” ae mulimuli ane “taʻua ai o ia o le ʻuō a Ieova.’” (Iakopo 2:23) Na faamamafa foʻi e Iesu le tāua o le “faatuatua i le Atua” pe afai e tatou te fia maua Ana faamanuiaga. (Ioane 14:1) O lea, e faapefea ona tatou maua le faatuatua lea e finagalo i ai Ieova? E amata i le suʻesuʻe e lē aunoa o lana Afioga. O le faia faapea, o le a e maua ai le “poto saʻo i lona finagalo,” ma iloa le auala e “matuā faafiafiaina ai o ia.” A o faatupulaʻia lenā poto saʻo e faatatau iā Ieova, ma e faatatauina mea e na te faafinagaloina, o le a tuputupu aʻe lou faatuatua ma e matuā vavalalata atu ai iā te ia.​—Kolose 1:9, 10.