“Ua lata mai le iʻuga!” O le ā e te mafaufau i ai pe a e faalogo i nei upu? Pe e te mafaufau e faapea e afio mai le Mesia e ave tagata lelei i le lagi ae susunu tagata amioleaga i seoli? Pe e te mafaufau o le a faaumatia uma tagata? Pe a faaāta i mafaufau nei vaaiga, e ono faapopoleina ai nisi tagata, ae atonu e lē mautonu pe tauemu ai isi.

Ua taʻua i le Mataio 24:14: ʻO le a oo mai le iʻuga.’ O isi taʻu o lenā aso, o le “aso tele o le Atua” po o “Amaketo.” (Faaaliga 16:14, 16) E anoanoaʻi talitonuga fou ma fenuminumiaʻi e faatatau i lenei mataupu, ma o le tele o lotu ua feteenaʻi o latou manatu. Peitaʻi, o loo faailoa manino mai i le Tusi Paia mea e uiga i ai ma mea e lē uiga i ai le iʻuga. Ua fesoasoani mai foʻi le Afioga a le Atua ina ia tatou manino pe faamata ua lata mai le iʻuga. A o le itu e sili ona tāua, o loo taʻu mai ai iā i tatou le auala e faasaoina ai! E ui i lea, seʻi o tatou faamanino muamua nisi o manatu sesē e faatatau i le iʻuga, ma vaai po o le ā tonu lava e faasino i ai “le iʻuga” pe a fua i le Tusi Paia.

1. LE SUSUNUINA AʻIAʻI O LE LALOLAGI.

   Ua taʻua i le Salamo 104:5: ʻUa faavaeina e le Atua le lalolagi i luga o ona faavae malolosi; e lē maluelue e faavavau, faavavau lava.’ Ua faamautinoa mai ai i lenei mau ma isi mau, o le a lē faaumatia ma e lē taitai ona faataga e le Atua le lalolagi ia faaumatia!​—Failauga 1:4; Isaia 45:18.

2. SE MEA E TEʻI LAVA UA TUPU.

   Ua taʻua i le Tusi Paia ua faatulaga e le Atua le taimi tonu e oo mai ai le iʻuga. Ua taʻua i le Mareko 13:32, 33: “E lē iloa e se tasi lea aso ma le itula, e oo lava i agelu i le lagi, po o le Atalii, ae ua na o le Tamā lava. Ia vaavaai pea, ia mataala pea, auā tou te lē iloa le taimi atofaina.” E manino mai, ua faatulaga e le Atua “le Tamā,” le “taimi atofaina” o le a oo mai ai le iʻuga.

3. SE MEA E FAAPOGAIA E TAGATA PO O MAA TETELĒ E TOʻULU MAI I LE VANIMONIMO.

   O le a faapefea ona oo mai le iʻuga? Ua taʻua i le Faaaliga 19:11: “Ona ou iloa lea o le lagi ua avanoa, faauta foʻi! o se solofanua paʻepaʻe. O lē o loo tiʻetiʻe ai e taʻua e Faamaoni ma Moni.” Ua taʻua atili i le fuaiupu e 19: “Ona ou iloa lea o le manufeʻai ma tupu o le lalolagi ma a latou ʻautau, ua faapotopoto e siitaua atu i lē o loo tiʻetiʻe i le solofanua ma lana ʻautau.” (Faaaliga 19:11-21) E ui lava e tele ina faafaatusa manatu o loo i lenei mau, ae ua tatou iloa mai ai, o le a auina mai e le Atua se ʻautau o agelu ina ia faaumatia ona fili.

1. LE MUTAAGA O PULEGA LĒ TAULAU A TAGATA.

   Ua taʻua i le Tanielu 2:44: ʻO le a faatūina e le Atua o le lagi o le malo e lē faaumatia lava. O lea  malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.’ Muamua atu, na taʻua i le manatu lona 3 o le a faaumatia “tupu o le lalolagi ma a latou ʻautau,” o ē o le a “faapotopoto e siitaua atu i lē o loo tiʻetiʻe i le solofanua ma lana ʻautau.”​—Faaaliga 19:19.

2. LE FAAIʻUINA O TAUA, FAIGA SAUĀ MA FAIGA LĒ TONU.

   ʻUa faaiʻuina e le Atua taua i tuluʻiga o le lalolagi.’ (Salamo 46:9) “O ē e amio saʻo e latou te mau i le lalolagi, ma o ē e lē ponā e faatotoeina i le lalolagi. Ae e faaumatia o ē e amioleaga mai i le lalolagi; e liaʻieseina foʻi o ē e amio faapiʻopiʻo.” (Faataoto 2:21, 22) “Faauta! Ou te faia ia fou mea uma lava.”​—Faaaliga 21:4, 5.

3. LE FAAUMATIAGA O LOTU UA TUULAFOAʻIA LE ATUA MA TAGATA.

   “O perofeta, ua vavalo i latou i mea pepelo; a o ositaulaga, ua latou pule e tusa ma lo latou malosi. . . . Ma o le ā se mea e tou te faia i lona iʻuga?” (Ieremia 5:31) “E toʻatele e fai mai iā te aʻu i lea aso, ʻLe Alii e, le Alii e, pe matou te leʻi faia ea ni valoaga ma tutuli temoni, ma faia le tele o galuega mamana i lou suafa?’ Ona ou taʻutino atu lea iā i latou: ʻOu te leʻi iloa lava outou! Inā ō ese ia iā te aʻu, o outou o ē faia mea leaga.’”​—Mataio 7:21-23.

4. LE FAAUMATIAGA O TAGATA E FAAPOGAIA MA LAGOLAGOINA MEA O LOO TUTUPU I LE LALOLAGI I ASO NEI.

   Na fetalai Iesu Keriso: “O le mea lea ua faamasinoina ai le lalolagi, auā ua oo mai le malamalama i le lalolagi, ae ua naunau tagata i le pōuliuli nai lo o le malamalama, auā e leaga a latou amio.” (Ioane 3:19) O loo faamatala i le Tusi Paia se faaumatiaga na tupu muamua i le lalolagi, i aso o le tane faamaoni o Noa. Ua taʻua i le 2 Peteru 3:5-7: ʻNa oo le faaumatiaga i le lalolagi i lenā taimi, ina ua lofia i le vai. O le afioga foʻi lea ua tuu ai le lagi ma le lalolagi o loo iai i le taimi nei mo le afi, ma ua taofia seʻia oo i le aso faamasino ma le faaumatiaga o tagata faalēmataʻu.’

Ia mātau, ua faatusaina le “aso faamasino ma le faaumatiaga” o loo faaloloʻi mai, i le faaumatiaga o “le lalolagi” i aso o Noa. O le ā le lalolagi lea sa faaumatia? Sa tumau le lalolagi paneta, ae o “tagata faalēmataʻu” po o fili o le Atua lea ʻna oo i ai le faaumatiaga.’ O le a faapena foʻi ona faaumatia i latou ua fai ma fili o le Atua, pe a oo mai le “aso faamasino” a le Atua. Ae o le a faasaoina uō a le Atua, e pei foʻi ona faasaoina Noa ma lona aiga.​—Mataio 24:37-42.

Seʻi faaāta i mafaufau le matagofie o lenei lalolagi pe a mavae ona tafiesea e le Atua mea leaga uma! O le mea moni, o le feʻau o loo i le Tusi Paia e faatatau i le iʻuga, e lē o se tala faanoanoa, ae o se tala lelei. Peitaʻi, atonu e te taumānatu pea: ʻPo o taʻua i le Tusi Paia le aso e oo mai ai le iʻuga? Po ua lata mai? E faapefea ona faasaoina mai ai aʻu?’