O se aiga e iai ni mātua e alolofa ma faaaloalo le tasi i le isi, o se siʻomaga lea e sili ona lelei e ola aʻe ai se tamaitiiti. (Kolose 3:14, 19) O mātua lelei, e alolofa ma faamālō atu i a latou fanau, e pei foʻi ona faamālō atu Ieova le Atua i lona Alo.​—Faitau le Mataio 3:17.

E faafofoga mai lo tatou Tamā i le lagi i ana auauna, ma uaʻi mai i o latou faalogona. E ao i mātua ona faaaʻoaʻo iā Ieova, ma uaʻi atu i manatu o a latou fanau. (Iakopo 1:19) E tatau i mātua ona amanaʻia faalogona o a latou fanau, e aofia ai ma ni manatu lē saʻo e fai mai.​—Faitau le Numera 11:11, 15.

I le avea ai o oe ma matua, ua iā te oe le pule e faia ai tulafono. (Efeso 6:1) Ia aʻoaʻoina ni lesona mai i le faaaʻoaʻoga a le Atua. E faaalia lona alofa i lana fanau e ala i le faamanino mai o tulafono, ma iʻuga e oo i ai pe a lē usitaʻia na tulafono. (Kenese 3:3) Peitaʻi e na te lē faamalosia tagata ia usiusitaʻi. Nai lo o lea, e na te aʻoaʻo i latou i aogā e maua pe a fai le mea saʻo.​—Faitau le Isaia 48:18, 19.

Ia fai ma ou sini le fesoasoani i lau fanau ia alolofa i le Atua. O le iʻuga, o le a latou gaoioi ma le atamamai e tusa pe e te lē o faatasi ma i latou. Ia aʻoaʻo lau fanau ia alolofa i le Atua e ala i lau faaaʻoaʻoga, e pei foʻi ona aʻoaʻo mai le Atua e ala i lana faaaʻoaʻoga.​—Faitau le Teuteronome 6:5-7; Efeso 4:32; 5:1.