O le Tusi Muamua i le Faapotopotoga i Korinito 5:1-13
5 E moni ua logo mai le tala, ua faia e se tasi o outou amioga lē mamā taufeusuaʻiga,*+ ina ua faiavā se tasi tagata i le avā a lona tamā,+ ma o amioga lē mamā faapea e lē o faia e nuu ese.
2 Po ua outou mitamita ai ea? Pe e lē tatau ea ona outou faanoanoa+ ma faate‘aese mai iā te outou le tagata na faia lenei agasala?+
3 E ui ina ou lē faatasi ma outou i le tino, ae ua tatou faatasi i le agaga, ma ua ou faamasinoina le tagata ua faia lenei mea, e pei lava ua ou faatasi ma outou.
4 Pe a outou faapotopoto faatasi i le suafa o lo tatou Alii o Iesu, ma ua outou iloa ua tatou faatasi i le agaga atoa ma le mana o lo tatou Alii o Iesu,
5 e tatau ona outou tuuina atu lea tagata iā Satani+ e faaumatia ai le tino, ina ia faaolaina ai le agaga i le aso o lo tatou Alii.+
6 E lē lelei le mea ua outou mitamita ai. Pe e tou te lē iloa ea, o se fefete itiiti e faafefeteina ai le paluga atoa?+
7 Ia aveese le fefete tuai ina ia avea ai outou ma paluga fou, ona ua leai se mea faafefete iā te outou.* Auā o Keriso o la tatou mamoe+ o le Paseka lea na faataulagaina.+
8 O le mea lea ia tatou tausia ai le tausamiga,+ e lē i mea faafefete tuai po o mea faafefete o le amioleaga ma le agasala, ae o areto e lē faafefeteina o le lotolelei ma le faamaoni lea.
9 Na ou tusi atu iā te outou, ia aua le toe faifaimea faatasi ma tagata e faia amioga lē mamā taufeusuaʻiga.*
10 Ou te lē o uiga atu i le vavaeese atoatoa mai i tagata o le lalolagi+ e faia amioga lē mamā taufeusuaʻiga,* po o ē e matapeʻapeʻa, po o ē e gāoi, po o ē e ifo i tupua. Auā afai o lea, e tatau ona outou ō ese mai i le lalolagi.+
11 A o lenei ua ou tusi atu e aua neʻi outou toe faifaimea faatasi+ ma sē ua taʻua o se uso ae e faia amioga lē mamā taufeusuaʻiga,* pe e matapeʻapeʻa,+ pe e ifo i tupua, pe e fai upu masoā, pe e onā,+ pe e taufaavalea,+ aua foʻi neʻi aai faatasi ma se tagata faapena.
12 Aiseā o le a ou faamasinoina ai i latou e lē o i le faapotopotoga? Pe e lē o outou ea e faamasinoina i latou i totonu o le faapotopotoga,
13 a o le Atua e faamasinoina i latou e lē o i le faapotopotoga?+ “Ia faateʻaeseina lenā tagata amioleaga mai iā te outou.”+
Faamatalaga Pito i Lalo
^ O le upu Eleni, o le por·nei′a. Tagaʻi i le Uiga o Upu.
^ Ele., “ua lē faafefeteina outou.”
^ Tagaʻi i le Uiga o Upu.
^ Tagaʻi i le Uiga o Upu.
^ Tagaʻi i le Uiga o Upu.
