O le Tusi Muamua i le Faapotopotoga i Tesalonia 2:1-20
2 Ua outou iloa lelei le ʻauuso e, e leʻi iʻuvale la matou asiasiga iā te outou.+
2 Auā e ui ina muamua ona matou puapuagatia ma matuā faileagaina i Filipi,+ e pei ona outou iloa, ae na mafai ona matou lototetele ona o lo tatou Atua, ina ia taʻu atu iā te outou le tala lelei a le Atua+ a o feagai ma le tele o teteega.*
3 Auā o apoapoaʻiga e matou te avatu, e lē māfua mai i ni manatu sesē, po o amioga lē mamā, po o le faaʻoleʻole,
4 ae e pei ona faamaonia i matou e le Atua o ē e tatau ona tuuina mai i ai le tala lelei, o lea e matou te tautatala atu ai, e lē ina ia faafiafia ai tagata, a o le Atua o lē e suʻesuʻe i o matou loto.+
5 E moni, ua outou iloa e leai lava se taimi na matou faia ai ni upu taufaasee, pe e faafoliga atu e amiotonu ina ia natia ai lo matou mananaʻo tele;+ ua silafia e le Atua lenei mea!
6 E matou te leʻi saʻilia le mamalu mai i tagata, po o outou, po o isi foʻi, e ui ina mafai e i matou o ni aposetolo o Keriso ona faatigāina iā te outou.+
7 E leai, ae na matou faapelepele iā te outou, e pei ona tausi faapelepele e se failele o lana fanau.
8 O lea la, ona o le alofa māfana iā te outou, sa matou naunau* ai e avatu iā te outou e lē na o le tala lelei a le Atua, ae faapea foʻi ma o matou lava ola,+ auā ua matou matuā alolofa iā te outou.+
9 Le ʻauuso e, e mautinoa o loo outou manatua a matou galuega mamafa ma le tigā. Na matou galulue i le pō ma le ao, ina ia aua neʻi faatigāina so o se tasi o outou,+ a o matou talaʻia atu le tala lelei a le Atua iā te outou.
10 O outou o molimau, e faapena foʻi le Atua, i lo matou faamaoni, amiotonu, ma le lē taʻuleagaina, a o matou faatasi ma outou o ē e talitonu.
11 Ua outou iloa lelei sa matou apoapoaʻi atu pea, ma faamāfanafana ma fautua atu iā te outou taʻitoʻatasi,+ e pei ona faia e se tamā+ i lana fanau,
12 ina ia outou savavali e tusa ma le silafaga a le Atua,+ o lē na valaauina outou i lona Malo+ ma lona mamalu.+
13 O le mea lea ua matou faafetai ai e lē aunoa i le Atua,+ auā ina ua outou maua le afioga a le Atua, lea na outou faalogo ai mai iā i matou, ona outou talia lea e lē o le upu a tagata, a o le mea moni, o le afioga a le Atua, o loo galue foʻi iā te outou o ē e talitonu.
14 Auā o outou le ʻauuso e, sa outou faaaʻoaʻo i faapotopotoga a le Atua o loo i Iutaia, o ē ua autasi ma Keriso Iesu, auā na outou puapuagatia i lima o tagata o lo outou lava atunuu,+ o mea foʻi ia o loo puapuagatia ai i latou i lima o tagata Iutaia,
15 o ē na fasiotia e oo lava i le Alii o Iesu+ ma le ʻauperofeta, ma sauāina i matou.+ E latou te lē o faafiafiaina foʻi le Atua, ae ua latou faasagatau i mea e aogā i tagata uma,
16 a o latou taumafai e taofia i matou mai i le talaʻi atu i tagata o nuu ese ina ia faaolaina ai i latou.+ O le faia faapea, ua latou faateleina ai pea a latou agasala. Ae ua iʻu ai ina oo mai lona toʻasā i luga o i latou.+
17 Peitaʻi le ʻauuso e, ina ua vavaeesea i matou mai iā te outou mo sina taimi (i le tino, ae lē o le loto), na matou faia taumafaiga uma e toe feiloaʻi ma outou,* ona o lo matou naunautaʻiga lenā.
18 O le mea lea na matou mananaʻo ai e ō atu iā te outou, o aʻu lava o Paulo, e lē faatasi ae e faalua ona matou fia ō atu; ae na faasalavei e Satani la matou malaga.
19 O le ā lo matou faamoemoe, ma le olioli, ma le pale e mitamita ai i luma o lo tatou Alii o Iesu i lona faatasi mai? Pe e lē o outou ea?+
20 E moni lava, o outou o lo matou mamalu ma lo matou olioli.
Faamatalaga Pito i Lalo
^ Pe atonu “ma le finafinau tele.”
^ Ele., “matuā fiafia.”
^ Ele., “e toe vaai i o outou foliga.”
