O le Tusi Muamua iā Timoteo 3:1-16
3 E maufaatuatuaina lenei faamatalaga: Afai e fia aapa atu se tane e avea o se ovasia,*+ e naunau o ia i galuega lelei.
2 E tatau i le ovasia ona lē taʻuleagaina, o se tane e toʻatasi lana avā, e pulea lana amio, e mafaufau lelei,+ e fai mea maopoopo, e talimālō,+ e agavaa e aʻoaʻo atu,+
3 e lē o sē e onā,+ e lē sauā,* ae e magafagafa o ia,+ e lē faamisa,+ e lē o sē e manaʻo tele i tupe,+
4 o se tane e pule lelei i lona lava aiga, e gauaʻi ma e faaaloalo lana fanau+
5 (auā afai e lē iloa e se tane ona pule i lona lava aiga, e faapefea la ona ia tausia le faapotopotoga a le Atua?),
6 e lē o se tane faatoʻā liliu mai i le faatuatua,+ ina neʻi faafefeteina o ia i le faamaualuga, ma paʻū ai i le faasalaga lea foʻi e oo i le Tiapolo.
7 E tatau foʻi ona taʻuleleia o ia e tagata o i tua,*+ ina ia lē faifai mai ai tagata iā te ia ma paʻū ai i le mailei a le Tiapolo.
8 E tatau foʻi i auauna o le faiva ona matutua i o latou mafaufau, e lē faagutugutulua,* e lē inu tele i le uaina, e lē matapeʻapeʻa i mea e maua e ala i faiga faapiʻopiʻo,+
9 ae e taofi i le mea lilo paia o le faatuatua ma se lotofuatiaifo mamā.+
10 Ia muamua foʻi ona tofotofoina i latou po ua agavaa; ona avea ai lea o i latou o ni auauna, auā ua lē taʻuleagaina i latou.+
11 E tatau foʻi i fafine ona matutua i o latou mafaufau, e lē taufaaleaga,+ e pulea a latou amio, ma e faamaoni i mea uma lava.+
12 O auauna o le faiva, ia taʻitasi a latou avā, ia pule lelei foʻi i a latou fanau ma o latou lava aiga.
13 Auā o tane o ē e auauna lelei, e taʻuleleia i latou ma e matuā saʻoloto e tautala atu i le faatuatua iā Keriso Iesu.
14 Ua ou tusi atu iā te oe i nei mea, e ui o loo oʻu faamoemoe e toeitiiti ona ou alu atu lea iā te oe,
15 ae afai ou te tuai atu, ia e iloa lau amio e tatau ona iai i le aiga o le Atua,+ o le faapotopotoga lea a le Atua soifua, o le poutū ma le lagolago o le upu moni.
16 O le mea moni, e matuā sili lava lenei mea lilo paia o le faamaoni i le Atua: ‘Na faaalia mai o ia i le tino,+ na taʻuamiotonuina i le agaga,+ na faailoa atu i agelu,+ na talaʻiina atu foʻi i nuu,+ na talitonu tagata o le lalolagi iā te ia,+ ma na aveina aʻe i le mamalu i le lagi.’
Faamatalaga Pito i Lalo
^ Tagaʻi i le Uiga o Upu.
^ Po o le “e lē o sē e fasi tagata.”
^ Po o “ē e lē o i totonu o le faapotopotoga Kerisiano.”
^ Po o le “e lē faia ni faamatalaga taufaasesē.”
