O le Tusi Muamua iā Timoteo 5:1-25
5 Aua le soona faitio i se toeaina.+ Ae ia ʻaiʻoi atu iā te ia e pei o sou tamā, o tane talavou foʻi e pei o ni ou uso,
2 o fafine matutua e pei o ni ou tinā, o fafine talavou e pei o ni ou tuafāfine i le amio mamā uma.
3 Ia manatu mamafa* i fafine ua oti a latou tane, ae e leai nisi e tausia i latou.+
4 Ae afai e iai se fanau a se fafine ua oti lana tane, po o fanau a lana fanau, ia muamua ona aʻoaʻoina i latou ia faamaoni i le Atua i o latou lava aiga,+ ma taui atu le mea e tatau ai i o latou mātua, ma mātua o o latou mātua,+ auā o le mea lelei lea i le silafaga a le Atua.+
5 O le fafine mativa ua oti lana tane o loo matuā manaʻomia le fesoasoani, ua faamoemoe o ia i le Atua,+ ma ua finafinau o ia i talosaga ma tatalo i pō ma ao.+
6 A o le fafine e na te faamalieina ona tuʻinanauga o le tino, e oti o ia e ui ina ola.
7 O lea ia tuuina atu pea nei faatonuga,* ina ia lē taʻuleagaina i latou.
8 O le mea moni, afai e lē tausi e se tasi i ē e tatau ona ia tausia, aemaise lava tagata o lona aiga, ua faafitia e ia le faatuatua, ma e sili atu lona leaga nai lo o le tagata e lē faatuatua.+
9 Ia faitaulia se fafine ua oti lana tane, ua silia i le 60 ona tausaga, sa toʻatasi foʻi lana tane,
10 e iai sona talaaga o le faia o galuega lelei,+ pe afai na ia tausia se fanau,+ pe afai na ia faaalia pea le talimālō,+ pe afai na ia fufuluina vae o le ʻaupaia,+ pe afai foʻi na ia fesoasoani i ē na puapuagatia,+ ma pe afai na ia filigā i galuega lelei uma.
11 Peitaʻi, aua le faitauliaina fafine talavou ua oti a latou tane, auā afai e oso aʻe o latou tuʻinanauga i feusuaʻiga ma faalavelavea ai la latou faiā ma Keriso, ona fia faaipoipo ai lea o i latou.
12 O le a faasalaina foʻi i latou auā ua latou lafoaʻia mea na latou uluaʻi faatuatua i ai.*
13 E lē na o lea, e masani foʻi ona leai ni a latou mea e fai, ae e feoaʻi solo i fale; ioe, e lē na o le leai o ni mea e fai, ae ua faitatala foʻi ma isuisu fua i mataupu a isi tagata,+ ma tautatala fua i mea e lē tatau ona latou tautatala i ai.
14 O le mea lea, ou te manaʻo ai ia faaipoipo fafine talavou ua oti a latou tane,+ ia fai ni a latou fanau,+ ia tausia se aiga, ma lē tuuina atu ai i lē e tetee mai se avanoa e faitio ai iā i tatou.
15 O le mea moni, ua liliuese nisi ma mulimuli iā Satani.
16 Afai e iai se fafine talitonu e aiga i ni fafine ua oti a latou tane, ia fesoasoani o ia iā i latou, ina ia aua neʻi avea ai ma avega mamafa i le faapotopotoga. Ona mafai ai lea ona fesoasoani atu le faapotopotoga i fafine ua oti a latou tane, ae e leai nisi e tausia i latou.+
17 O toeaina o loo avea ma taʻimua lelei,+ e tatau ona faaluaina i ai le āva,+ aemaise i latou e galulue mamafa i le upu ma le aʻoaʻo atu.+
18 Auā ua fai mai tusitusiga paia, “Aua e te fusi le gutu o le povi poʻa a o solisolia le saito,”+ ma, “E tatau le totogi i le tagata faigaluega.”+
19 Aua neʻi talia se tuuaʻiga faasaga i se toeaina, seʻi vaganā ua faamaonia i molimau a se toʻalua po o se toʻatolu.+
20 Ia aʻoaʻi+ i luma o tagata uma o ē e faia pea le agasala,+ ina ia fai ma lapataʻiga mo isi uma lava.*
21 Ou te matuā fai atu iā te oe i luma o le Atua ma Keriso Iesu, ma agelu ua filifilia, ina ia tausia nei faatonuga e aunoa ma le mua‘i faia o se faai‘uga po o le faailoga tagata.+
22 Aua lava neʻi vave faaee atu ou lima i se tagata;*+ aua foʻi e te aafia i agasala a isi; ia tausia lou tulaga mamā.
23 Aua neʻi e toe inu i se vai,* ae ia inu sina uaina itiiti mo lou manava ma lou maʻi e tupu soo.
24 Ua faaalia i luma o tagata agasala a nisi, ma faamasinoina ai loa, ae o isi tagata ua faaalia mulimuli ane a latou agasala.+
25 E faapea foʻi ona faaalia galuega lelei i luma o tagata,+ e tusa lava pe e lē iloa e tagata, ae e lē mafai lava ona natia na galuega lelei.+
Faamatalaga Pito i Lalo
^ Ele., “āva.”
^ Po o “poloaʻiga.”
^ Po o “la latou folafolaga sa fai muamua.”
^ Ele., “ina ia matataʻu ai isi uma lava.”
^ E faasino atu i le aua le vave ona tofia o se tagata.
^ Po o le “Aua neʻi e toe inuina na o le vai.”
