O le Tusi Lona Lua o Nofoaiga a Tupu 36:1-23
36 Ona ave lea e tagata o le nuu o Ioasasa+ le atalii o Iosia, ma fai o ia ma tupu i Ierusalema e sui ai lona tamā.+
2 E 23 tausaga o Ioasasa ina ua fai o ia ma tupu, ma e tolu masina na ia pule ai mai i Ierusalema.
3 Peitaʻi, na aveesea o ia e le tupu o Aikupito mai i Ierusalema, ma faasalaina le nuu i taleni* siliva e 100 ma le taleni auro.+
4 E lē gata i lea, ua tofia e le tupu o Aikupito le uso o Ioasasa o Eliakimo e fai ma tupu o Iuta ma Ierusalema, ma suia lona igoa iā Ioakima; ae ua ave e Neko+ o Ioasasa le uso o Eliakimo, ma avatu i Aikupito.+
5 E 25 tausaga o Ioakima+ ina ua fai o ia ma tupu, ma e 11 tausaga na pule ai o ia mai i Ierusalema; ua faia pea e ia o mea leaga i le silafaga a Ieova lona Atua.+
6 Ua alu aʻe Nepukanesa+ le tupu o Papelonia e tau ma ia, ina ia saisai o ia i faamau ʻapamemea e lua ma ave o ia i Papelonia.+
7 Ua ave e Nepukanesa nisi o ipu o le fale o Ieova i Papelonia, ma tuu i lona maota i Papelonia.+
8 A o le olaga uma o Ioakima ma mea inosia na ia faia, ma mea leaga uma e faatatau iā te ia, ua tusia ia i le Tusi o Tupu o Isaraelu ma Iuta; ona avea lea o Ioakina lona atalii ma tupu e sui iā te ia.+
9 E 18 tausaga o Ioakina+ ina ua fai o ia ma tupu, ma e tolu masina ma aso e sefulu na pule ai o ia mai i Ierusalema; na ia faia pea mea leaga i le silafaga a Ieova.+
10 I le amataga o le tausaga,* na alu atu ai le feʻau a le tupu o Nepukanesa, ma ave o ia i Papelonia+ faatasi ma mea tautele o le fale o Ieova.+ Ua faia foʻi e Nepukanesa o Setekaia le uso o le tamā o Ioakina, ma tupu o Iuta ma Ierusalema.+
11 E 21 tausaga o Setekaia+ ina ua fai o ia ma tupu, ma e 11 tausaga na pule ai o ia mai i Ierusalema.+
12 Ua ia faia pea mea leaga i le silafaga a Ieova lona Atua. E leʻi faamaulalo o ia i luma o le perofeta o Ieremia,+ o lē na lapata‘ia o ia e tusa ai ma le faatonuga a Ieova.
13 Na fouvale foʻi o ia i le tupu o Nepukanesa,+ o lē na faatautōina o ia i le Atua, ma ua faauamaaa pea o ia, ua faamaaa lona loto ma musu e usitaʻi iā Ieova le Atua o Isaraelu.
14 Ua matuā lē faamaoni foʻi taʻitaʻi uma o le ʻauositaulaga ma le nuu, ua latou faia mea inosia uma a nuu ese, ma latou faaleagaina ai le fale o Ieova+ lea na ia faapaiaina i Ierusalema.
15 Ua auina mai pea lava pea e Ieova le Atua o o latou augātamā, o lapataʻiga iā i latou e ala i ana avefeʻau, auā ua alofa mutimutivale o ia i lona nuu, atoa foʻi ma lona malumalu.*
16 Ae ua faaauau pea ona latou ula i avefeʻau a le Atua moni,+ ma ʻinoʻino i ana afioga,+ ua tauemu foʻi i ana perofeta+ seʻia oo mai le toʻasā o Ieova i lona nuu,+ ma ua oo ai ina matuā lē mafai ona latou maua se fesoasoani.
17 Ona ia auina mai lea o le tupu o tagata Kaletaia+ e tau ma i latou, o lē na fasiotia o latou tauleleʻa i le pelu+ i le malumalu;+ e leʻi alofa mutimutivale o ia i le tauleʻaleʻa po o le taupou, o le tagata matua po o lē e ma‘i.+ Ua tuuina atu e le Atua mea uma lava i le lima o le tupu o Kaletaia.+
18 O ipu uma o le fale o le Atua moni, o ipu lapopoʻa ma lāiti, faapea ʻoa o le fale o Ieova, ma ʻoa a le tupu ma ona perenise, ua ia aumaia mea uma i Papelonia.+
19 Ua ia susunu le fale o le Atua moni,+ talepe le pā o Ierusalema,+ susunu i le afi ʻolo malolosi uma, ma faatamaʻia mea tautele uma lava.+
20 Ua ia ave faapagota i Papelonia i latou uma na sao mai i le pelu,+ ua fai foʻi i latou ma auauna mo ia+ ma ona atalii seʻia oo ina pule le malo o Peresia,+
21 ina ia taunuu ai le afioga a Ieova na ala mai iā Ieremia,+ se‘ia uma ona totogi e le laueleele ona sapati.+ O aso uma lava na tuufua ai le laueleele, na mapu ai le laueleele* ina ia atoa le 70 tausaga.+
22 I le tausaga muamua o le nofoaiga a Kuresa+ le tupu o Peresia, na faatupu ai e Ieova i le loto o Kuresa ina ia faaoo atu se feʻau i lona malo uma, ina ia faataunuu ai le afioga a Ieova na fai mai ai Ieremia.+ Na tusia foʻi e Kuresa le feʻau+ e faapea:
23 “O le mea lenei ua fai mai ai Kuresa le tupu o Peresia, ‘Ua foaʻi mai e Ieova le Atua o le lagi o malo uma o le lalolagi+ iā te aʻu, ua ia tofia foʻi aʻu e fausia se fale mo ia i Ierusalema, lea o loo i Iuta.+ O so o se tasi o outou uma e mai i lona nuu, ia faatasi Ieova lona Atua iā te ia. Inā alu aʻe ia o ia.’”+
Faamatalaga Pito i Lalo
^ Atonu i le tau e totogo ai mea.
^ Epe., “afioaga.”
^ Po o le “na tausia ai e le laueleele le sapati.”
