O le Tusi Lona Lua a Peteru 1:1-21
1 O aʻu o Simona Peteru, o se pologa ma o se aposetolo a Iesu Keriso, o le tusi lenei i ē ua maua le faatuatuaga e matuā tautele e pei o lea ua iā i matou,* e ala i le amiotonu a lo tatou Atua ma le Faaola o Iesu Keriso:
2 Tau ina ia faateleina iā te outou le agalelei faifua ma le filemu, e ala i le mauaina o le poto saʻo+ i le Atua ma Iesu lo tatou Alii,
3 auā ua foa‘i* mai e le mana o le Atua iā i tatou o mea uma e manaʻomia e ola ai ma le faamaoni i le Atua, e ala i le poto saʻo e faatatau i Lē na valaauina i tatou+ i lona mamalu ma lona lelei silisili.
4 E ala i nei mea, ua ia foaʻi* mai ai iā i tatou folafolaga tāua ma le matagofie tele,+ ina ia avea ai outou o agaga e pei o le Atua e ala i nei mea,+ auā ua outou sao mai i mea leaga o i le lalolagi e māfua mai i tuʻinanauga sesē.*
5 O le mea lava lea, ia faia a outou taumafaiga filigā+ ina ia faaopoopo ai i lo outou faatuatua le amiolelei,+ ia faaopoopo i la outou amiolelei le poto,+
6 ia faaopoopo i lo outou poto le amio pulea, ia faaopoopo i la outou amio pulea+ le tumau, ia faaopoopo i lo outou tumau le faamaoni i le Atua,+
7 ia faaopoopo i lo outou faamaoni i le Atua le alofa i le ʻauuso, ia faaopoopo i lo outou alofa i le ʻauuso le alofa.+
8 Auā afai e iai nei mea iā te outou ma ua faateleina foʻi, e taofia ai outou mai i le paiē ma le lē fua mai,+ e tusa ai ma le poto saʻo i lo tatou Alii o Iesu Keriso.
9 Auā afai e lē o iai i se tasi nei mea, ua tauaso la ma punitia e ia ona lava mata mai i le malamalama,*+ ma ua oo ai ina galo lona faamamāina mai i ana agasala+ i aso ua mavae.
10 O le mea lea le ʻauuso e, ia outou saga finafinau ai ina ia faamautinoa le valaauina+ ma le filifilia o outou, auā a faaauau ona outou faia o nei mea, e tou te lē paʻuʻū lava.+
11 O le mea moni, o le faia faapea o le a faataga ai outou e ulufale atu ma le mamalu i le Malo e faavavau+ o lo tatou Alii ma le Faaola o Iesu Keriso.+
12 O le māfuaaga lea ou te nofosauni ai pea e faamanatu atu nei mea iā te outou, e ui lava ua outou iloa ma ua outou tutū mausalī i le upu moni lea ua iai iā te outou.
13 Ae ua tonu i loʻu manatu, a o oʻu iai pea i lenei faleʻie,*+ ia ou faamalosiau atu iā te outou e ala i loʻu faamanatu atu,+
14 auā ua ou iloa ua toeitiiti ona aveeseina lea o loʻu faleʻie, e pei lava ona faailoa manino mai iā te aʻu e lo tatou Alii o Iesu Keriso.+
15 Ou te faia le mea aupito i sili i taimi uma lava, ma pe a ou alu ese, e mafai ona manatua* e outou lava nei mea.
16 E lē o ni tala sesē na fatuina ma le poto na ala ai ona matou faailoa atu le mana ma le faatasi mai o lo tatou Alii o Iesu Keriso, ae ona na matou vāaitino i lona matagofie.+
17 Auā na ia maua mai i le Atua le Tamā le viiga ma le mamalu, ina ua tulei mai iā te ia o nei fetalaiga mai i le mamalu e sili ona matagofie: “O loʻu Atalii pele lenā, o lē ua malie i ai loʻu loto.”+
18 Ioe, o afioga nei na matou faalogo ai o tulei mai i le lagi a o matou faatasi ma ia i le mauga paia.
19 O lea la, ua atili ai ona matou mautinoa i upu faavaloaga, ma e lelei ona outou uaʻi atu i ai e pei o se molī+ o loo susulu i le mea pogisa i o outou loto (seʻia tafa mai ata ma oso aʻe le fetu ao).+
20 O le mea muamua lava lenei ia outou iloaina, e leai se valoaga o i Tusitusiga Paia e tupuga mai i manatu o tagata.
21 Auā e lē o loto o tagata na aumai ai valoaga,+ ae na tautatala tagata i mea na faailoa mai e le Atua e ala i le taʻitaʻiga a le agaga paia.+
Faamatalaga Pito i Lalo
^ Po o “le faatuatuaga, o se faaeaga e tutusa ma lea ua iā i matou.”
^ Po o le “foaʻifuaina.”
^ Po o le “foaʻifuaina.”
^ Po o “le soona tu‘inanau.”
^ Pe atonu “ua tauaso o ia; ua leaga lana vaai.”
^ E faasino atu i lona tino faaletino.
^ Po o le “taʻutaʻu atu.”
