O le Tusi Lona Lua o Tupu 1:1-18
-
Valoia e Elia le maliu o Aasaia (1-18)
1 Ina ua mavae le maliu o Aapo, ona fouvale lea o Moapi+ iā Isaraelu.
2 O le taimi lenā na paʻū ifo ai Aasaia mai i se pū na ufiufi i se mea valavala, lea na iai i lona potu pito i luga i Samaria, ma ua manu‘a ai. Ua ia aauina atu ni avefeʻau ma faapea atu: “Inā ō ia, ia fesili atu iā Paala-sepulo le atua o Ekerona,+ po ou te toe malosi mai i loʻu manu‘a.”+
3 Ae ua fai atu le agelu a Ieova iā Elia*+ le tagata Tisepi: “Inā tulaʻi ia, ia e alu e faafetaiaʻi avefeʻau a le tupu o Samaria, ma fai atu iā i latou, ‘Po ua leai ea se Atua i Isaraelu ua outou ō atu ai e fesili iā Paala-sepulo le atua o Ekerona?+
4 O le mea lea ua fetalai mai ai Ieova: “E te lē alu ese mai i le moega o loo e taoto ai, auā o le a e oti lava.”’” Ona alu ese ai lea o Elia.
5 Ina ua toe foʻi atu avefeʻau iā Aasaia, ona ia fai mai loa lea iā i latou: “Aiseā ua outou toe foʻi mai ai?”
6 Ona latou fai atu lea iā te ia: “Na iai se tagata na alu aʻe e faafetaiaʻi i matou, ua ia fai mai foʻi iā i matou, ‘Inā toe foʻi atu ia i le tupu na aauina mai outou, ma fai atu iā te ia: “O le mea lenei na fetalai mai ai Ieova, ‘Po ua leai ea se Atua i Isaraelu ua e aauina atu ai nisi e fesili iā Paala-sepulo le atua o Ekerona? O le mea lea, e te lē alu ese mai i le moega o loo e taoto ai, auā o le a e oti lava.’”’”+
7 Ona ia fai mai lea iā i latou: “E faape‘ī foliga o le tagata na alu aʻe e faafetaiaʻi outou, ma fai atu nei upu iā te outou?”
8 Ua latou fai atu iā te ia: “O se tagata na ofu i ofu e fai i fulufulu o manu,+ na fusi foʻi lona sulugātiti i le fusipa‘u.”+ Ona ia fai mai lea: “O Elia le tagata Tisepi.”
9 Ona aauina mai lea e le tupu iā Elia o le taʻitaʻiʻau o le taʻitoʻalima sefulu ma lana ʻautau e toʻa 50. Ina ua ia alu aʻe iā Elia, vaai, o loo nofo Elia i luga o le tumutumu o le mauga. Ona ia fai mai lea iā Elia: “Le tagata e o le Atua moni,+ na fai mai le tupu, ‘Inā alu ifo ia.’”
10 Ae ua tali atu Elia i le taʻitaʻiʻau o le taʻitoʻalima sefulu: “Ua lelei, afai o aʻu o le tagata o le Atua, ia alu ifo le afi mai i le lagi+ ma susunu ai oe ma lau ʻautau e toʻa 50.” Ona alu ifo lea o le afi mai i le lagi, ua faaumatia ai o ia ma lana ʻautau e toʻa 50.
11 Ona toe aauina mai lea e le tupu iā Elia o le isi taʻitaʻiʻau o le taʻitoʻalima sefulu ma lana ʻautau e toʻa 50. Ua sau o ia ma fai mai iā Elia: “Le tagata e o le Atua moni, o le mea lenei na fai mai ai le tupu, ‘Inā alu ifo faavave ia.’”
12 Ae ua tali atu Elia iā i latou: “Afai o aʻu o le tagata o le Atua moni, ia alu ifo le afi mai i le lagi ma susunu ai oe ma lau ʻautau e toʻa 50.” Ona alu ifo lea o le afi a le Atua mai i le lagi, ua faaumatia ai o ia ma lana ʻautau e toʻa 50.
13 Ona toe aauina mai lea e le tupu o le taʻitaʻiʻau lona tolu o le taʻitoʻalima sefulu, ma lana ʻautau e toʻa 50. Ae ua alu aʻe le taʻitaʻiʻau lona tolu o le taʻitoʻalima sefulu, ua tootuli i luma o Elia ma ʻaiʻoi atu iā te ia e faapea: “Le tagata e o le Atua moni, faamolemole ia e faasaoina loʻu ola, ma ola o au auauna nei e toʻa 50.
14 Na alu ifo le afi mai i le lagi ma susunu ai uluaʻi taʻitaʻiʻau e toʻalua o taʻitoʻalima sefulu, ma a la ʻautau e taʻitoʻalima sefulu, a o lenei, ia e faasaoina loʻu ola.”
15 Ona faapea mai lea o le agelu a Ieova iā Elia: “Ia oulua ō ifo i lalo. Aua e te fefe ona o ia.” Ona tulaʻi lea o ia, ua la ō ifo i le tupu.
16 Ona fai atu lea o Elia i le tupu, “O le mea lenei na fetalai mai ai Ieova: ‘Na e aauina atu avefeʻau e fesili iā Paala-sepulo le atua o Ekerona.+ Po ua leai ea se Atua i Isaraelu?+ Aiseā na e lē fesili ai mo lana afioga? O lea, e te lē alu ese mai i le moega o loo e taoto ai, auā o le a e oti lava.’”
17 Ona iʻu ai lea ina oti o ia, e tusa ma le afioga a Ieova na fai atu ai Elia; ae ona e leʻi iai sona atalii, o le mea lea ua avea ai Ioramo*+ ma tupu e sui iā te ia, i le tausaga lona lua o le nofoaiga a Ioramo+ le atalii o Iosefatu le tupu o Iuta.
18 A o le olaga uma o Aasaia+ ma mea na ia faia, po ua lē o tusia ea i le tusi o talafaasolopito o tupu o Isaraelu?
