Galuega a le ʻAuaposetolo 21:1-40
21 Ua matou faamavae atu iā i latou ma loimata, ona matou tuuvaa lea ma folau saʻo atu i Ko. I le aso e sosoo ai, ua matou ō atu ai i Roto, ona ō atu ai lea i Patara.
2 Ina ua matou maua le vaa e malaga atu i Foinie, ona matou ō lea i ai, ma folau atu loa.
3 Ua matou vaaia le motu o Kuperu i le itu tauagavale, ae ua matou folau loa ma agaʻi atu i Suria, ona matou taula lea i Turo, auā o i inā e laʻu ese ai le uta a le vaa.
4 Ua matou saʻili, ona maua ai lea o soo ma matou nonofo ai i inā mo aso e fitu. Peitaʻi, ua latou fai atu pea iā Paulo e aua neʻi alu atu i Ierusalema, ona o mea na faailoa atu e le agaga iā i latou.+
5 Ina ua uma ia aso, ona matou ō lea ma faaauau la matou malaga, ae ua momoli i matou e i latou uma faatasi ma fafine ma tamaiti, seʻia matou oo atu i fafo o le aai. Ona matou tootutuli lea i le matafaga ma tatalo,
6 ma faatofā le tasi i le isi. Ona matou ō lea i luga o le vaa, ae ua toe foʻi i latou i o latou aiga.
7 Ona faaiʻu lea o la matou folauga mai i Turo, ma taunuu atu i Tolumai, ua matou feiloaʻi ma le ʻauuso ma nonofo ma i latou mo le aso e tasi.
8 I le aso e sosoo ai, ua matou malaga atu ai ma taunuu i Kaisareia. Ona matou ō atu lea ma nonofo i le fale o Filipo, o le faievagelia, ma o se tasi o tane e toʻafitu+ na uluaʻi filifilia.
9 O lenei tamāloa, e toʻafā ona afafine e leʻi faaipoipo,* ma e latou te faia valoaga.+
10 A o matou nonofo ai i inā mo ni aso, ona malaga ifo ai lea o se perofeta e igoa iā Akapo+ mai i Iutaia.
11 Ua sau o ia iā i matou ma tago i le fusi o Paulo, ua saisai ai ona lava vae ma ona lima ma faapea mai: “Ua faapea mai le agaga paia, ‘O le tagata e ana lenei fusi, o le a faapea ona saisaia o ia e tagata Iutaia i Ierusalema,+ ma tuuina atu o ia i lima o tagata o nuu ese.’”+
12 Ina ua matou faalogo i lenei mea, ona matou matuā ʻaiʻoi atu lea faatasi ma i latou i lea nuu, ia aua lava neʻi alu aʻe o ia i Ierusalema.
13 Ua tali mai Paulo: “Aiseā ua outou fetagisi ai ma faavaivai mai i loʻu loto? Ia outou matuā mautinoa, ua ou nofosauni e lē gata e saisaia aʻu, ae ia ou oti foʻi i Ierusalema ona o le suafa o le Alii o Iesu.”+
14 Ina ua lē mafai ona taofia o ia, ona matou lotomalilie lea* ma faapea atu: “Ia faia le finagalo o Ieova.”*
15 Ua mavae ia aso, ona matou sauni lea mo le malaga ma ō i Ierusalema.
16 Ua matou ō foʻi ma nisi o soo mai i Kaisareia, ina ia momoli i matou i le tagata lea e talimālō iā i matou, o Nasona mai i Kuperu, o se tasi o uluaʻi soo.
17 Ina ua matou taunuu i Ierusalema, ona talia fiafia lea o i matou e le ʻauuso.
18 I le aso na sosoo ai, ona matou asiasi lea ma Paulo iā Iakopo,+ ma o loo iai i inā toeaina uma.
19 Ona faafeiloaʻi lea o i latou e Paulo, ma faamatala auʻiliʻili atu mea ua faia e le Atua i nuu ese e ala i lana talaʻiga.
20 Ina ua latou faalogo i lenei mea, ona latou faamamaluina lea o le Atua. Peitaʻi, ua latou faapea atu iā te ia: “Lo matou uso e, ua e iloa o loo iai le faitau afe o tagata Iutaia o ē talitonu, ma ua maelega i latou uma i le Tulafono.+
21 Ae ua latou faalogo i tala feaveaʻi e uiga iā te oe e faapea, ua e aʻoaʻo tagata Iutaia uma o loo i nuu ese e fulitua iā Mose, ma taʻu atu iā i latou e aua neʻi peritomeina a latou fanau, pe faia foʻi tū masani.+
22 O le ā la se mea e ao ona fai i ai? E mautinoa lava e faalogo i latou ua e taunuu mai.
23 O lea la, ia e faia le mea e matou te fai atu ai: E toʻafā tamāloloa ua iā i matou ua faia ni a latou tautoga.
24 Ia ave nei tamāloloa ma faamamāina oe faatasi ma i latou, ma totogi a latou tupe faaalu, ina ia mafai ai ona sele mamā o latou lauulu. Ona iloa ai lea e tagata uma, e sesē tala feaveaʻi ua latou faalogo i ai e uiga iā te oe, ae ua saʻo lava lau amio ma ua e tausia foʻi le Tulafono.+
25 Ae mo tagata talitonu i nuu ese, ua matou auina atu i ai la matou faaiʻuga e ala i se tusi e faapea, e tatau ona latou ʻaloese mai i mea ua faataulagaina mo tupua,+ ma taumamao mai i le toto,+ ma mea titina,*+ ma amioga lē mamā taufeusuaʻiga.”*+
26 I le aso ua sosoo ai, ona ave lea e Paulo o tamāloloa, ua faamamāina o ia lava faatasi ma i latou,+ ma ua ulu atu o ia i le malumalu e faailoa atu le taimi e faaiʻuina ai aso mo le faamamāina, ma le taimi e ao ai ona fai le taulaga mo i latou taʻitoʻatasi.
27 Ua lata ina faaiʻuina aso e fitu, ona faavevesi ai lea e tagata Iutaia mai i Asia o le motu o tagata, ina ua latou vaaia o ia i le malumalu, ma ua latou puʻe iā te ia
28 ma alalaga atu: “Tagata o Isaraelu e, fesoasoani mai ia! O le tagata lenei ua aʻoaʻoina tagata uma i so o se mea e tetee ai i o tatou tagata, ma la tatou Tulafono, ma lenei nofoaga. Ua ia aumaia foʻi tagata Eleni i lenei malumalu, ma ua faaleagaina ai lenei nofoaga paia.”+
29 Auā na latou vāai iā Tofimo+ mai i Efeso, o faatasi ma ia i le aai, ma na latou manatu ua aumai o ia e Paulo i le malumalu.
30 Ua matuā vevesi le aai uma, ma ua lolofi ane tagata uma, ua latou puʻe iā Paulo ma toso mai o ia i fafo mai i le malumalu. Ona tapuni loa lea o faitotoʻa.
31 A o latou taumafai e fasioti o ia, ae ua oo atu le faamatalaga i le alii e pule i ʻau e faapea, ua matuā vevesi le aai atoa o Ierusalema;
32 ona taufetuli ifo lea o ia ma fitafita ma taʻitaʻiʻau iā i latou. Ina ua latou vāai atu i le alii e pule i ʻau ma fitafita, ona tuu loa lea o le fasiga o Paulo.
33 Ona faalatalata mai lea o le alii e pule i ʻau ma puʻe o ia, ma faatonuina ina ia saisaitia o ia i ni filifili se lua;+ ua fesili foʻi le alii e pule i ʻau po o ai lenei tagata, ma po o le ā foʻi se mea ua ia faia.
34 Ae ua feʻei atu nisi o le motu o tagata i le tasi mea, a o isi i le isi mea. Talu ai ua lē mafai ona ia iloa le mea tonu ona o le pisapisaō, ona ia faatonuina lea ina ia avatu o ia i le nofoaga o le ʻaufitafita.
35 Ae ina ua oo atu Paulo i le faasitepu, ua iʻu ina ave o ia e fitafita ona o le sauā tele o le motu o tagata,
36 auā ua mulimuli atu pea le motu o tagata e toʻatele ma feʻei atu: “Ia fasioti o ia!”
37 Ina ua lata i le taimi e taʻitaʻi atu ai o ia i le nofoaga o fitafita, ona fai atu lea o Paulo i le alii e pule i ʻau: “Pe e mafai ona fai atu saʻu tala iā te oe?” Ua fai mai o ia: “Faapea aʻu e te lē iloa tautala i le gagana Eleni!
38 Pe e lē o oe ea la le tagata Aikupito lea na māfua ai se fouvalega i aso ua mavae, ma taʻitaʻia le toʻa 4,000 o ē fasioti tagata i le toafa?”
39 Ona fai atu lea o Paulo: “O le mea moni, o aʻu o le Iutaia,+ na ou fanau i Taso+ i Kilikia, o aʻu o se tagatānuu o se aai lauiloa. O lea, ou te ʻaiʻoi atu iā te oe, e tuu mai aʻu seʻi oʻu tautala atu i tagata.”
40 Ina ua aumai le faatagaga, ona tū lea o Paulo i le faasitepu ma talo atu lona lima i tagata. Ona matuā fifilemu lea o tagata uma, ae ua ia tautala atu iā i latou i le gagana Eperu+ e faapea:
Faamatalaga Pito i Lalo
^ Ele., “o ni taupou.”
^ Ele., “ona matou fifilemu lea.”
^ Po o “mea ua tapē e aunoa ma le faaaluina o le toto.”
^ O le upu Eleni, o le por·nei′a. Tagaʻi i le Uiga o Upu.
