O le Tusi a Iakopo 1:1-27
1 O aʻu o Iakopo,+ o le pologa a le Atua ma le Alii o Iesu Keriso, o le tusi lenei i ituaiga e 12 o loo nonofo solo:
Talofa!
2 Oʻu uso e, ia outou manatu o se mea e olioli tele ai, pe a outou fesagaʻi ma tofotofoga eseese.+
3 Ua outou iloa, o le tofotofoina o lo outou faatuatua e iʻu ina outou tumau ai.+
4 Ae ia atoatoa galuega o lo outou tumau, ina ia atoatoa ma lelei ai outou i mea uma, ma ia leai se mea e mativa ai.+
5 O lea, pe afai ua leai se atamai i se tasi o outou, inā ōle atu pea ia i le Atua,+ auā o ia na te foaʻi tele mai e aunoa ma le faifai mai,*+ ona foaʻiina mai lea iā te ia.+
6 Peitaʻi, ia ōle atu pea iā te ia i le faatuatua+ ae aua le masalosalo.+ Auā o lē e masalosalo, ua pei o ia o peau o le sami ua fesouaʻiina ma felafoa‘iina e le matagi.
7 O le mea moni, aua neʻi manatu lenā tagata e na te maua se mea mai iā Ieova;*
8 o ia o le tagata faalotolotolua+ e femoumouaʻi i ona ala uma.
9 Ia olioli* le uso faatauvaa ina ua faaeaina o ia,+
10 o le tagata mauʻoa foʻi ina ua faamaulaloina o ia,+ auā o le a mavae atu o ia e pei o se fugālaau o le fanua.
11 Auā e pei ona oso aʻe o le lā ma faasolo ina vevela tele ma mamae ai le laau, e toʻulu ai ona fugālaau ma mavae ai lona matagofie, e faapena ona mou atu le tagata mauʻoa a o tuliloa ana ʻoa.+
12 E fiafia le tagata e tumau e ui lava i tofotofoga,+ auā pe a uma ona tofotofoina o ia, ona maua ai lea e ia o le pale o le ola,+ lea na folafola mai e Ieova* iā i latou o ē e alolofa pea iā te Ia.+
13 Pe a faaosoosoina se tasi, aua neʻi faapea ane: “Ua faaosoosoina aʻu e le Atua.” Auā e lē mafai ona faaosoosoina le Atua i mea leaga. E lē faaosooso atu foʻi o ia i se tasi.
14 Ae ua faaosoosoina tagata taʻitoʻatasi ona ua tosina ma maileia i ona lava tuʻinanau.+
15 Pe a tō le tuʻinanau, ona fanau mai ai lea o le agasala; pe a matua* le agasala, ona fanau mai ai lea o le oti.+
16 Oʻu uso pele e, aua neʻi faasesēina outou.
17 O meaalofa lelei uma ma mea uma e atoatoa ona lelei, e mai i lugā,+ auā e sau mai i le Tamā o le malamalama,+ e lē liliu pe fesuisuia‘i o ia e pei o se ata lafoia.+
18 O lona finagalo ia avea i tatou ma ana fanau ona o le upu moni,+ ina ia avea ai i tatou ma nisi o uluaʻi fua o mea na ia faia.+
19 Ia outou iloa lenei mea oʻu uso pele e: Ia faalogologo lelei* tagata uma, ae aua le vave ona tautala,+ ma aua foʻi le vave ona ita,+
20 auā o le ita o le tagata e lē tupu mai ai le amiotonu mai le Atua.+
21 O lea, inā lafoaʻi ia o mea eleelea uma ma amioga leaga uma,*+ ae ia talia ma le agamalu le upu ua aʻoaʻoina, lea ua mafai ai ona faasaoina outou.
22 Ia avea outou ma ē e usiusitaʻi i le upu+ ae e lē na o le faalogologo i ai, ma faasesēina ai outou i o outou lava manatu sesē.
23 Auā afai e na o le faalogologo o se tasi i le upu ae e lē usiusitaʻi i ai,+ ua pei lava o ia o se tagata ua vaavaai i le faata i ona lava foliga.
24 Ua vaavaai o ia iā te ia lava, ona alu ese lea o ia ma ua galo loa ona foliga.
25 A o lē e vaavaai totoʻa i le tulafono lelei atoatoa+ o le saʻolotoga, ma tausisi i ai, ua avea o ia ma lē e faia le galuega ae e lē o sē e faalogologo ma faagalogalo; o le a fiafia foʻi o ia i lona faia faapea.+
26 Afai e manatu se tasi o ia o sē e tapuaʻi i le Atua* ae lē pulea* lona laulaufaiva,+ ua faasesēina e ia lona lava loto, ma ua lē aogā lana tapuaʻiga.
27 O le tapuaʻiga lenei e mamā ma lē taʻuleagaina i le silafaga a le Atua lo tatou Tamā: ia tausi i tamaiti ua mātuaoti+ ma fafine ua oti a latou tane+ i taimi o o latou puapuaga,+ ma ia puipuia le tagata lava ia neʻi pisia mai i le lalolagi.+
Faamatalaga Pito i Lalo
^ Po o le “vaavaai masei.”
^ Ele., “mitamita.”
^ Po o le “faatinoina.”
^ Ele., “vave ona faalogologo.”
^ Pe atonu “ma le tele o amioga leaga.”
^ Po o le “o sē e to‘aga i le tapua‘iga.”
^ Po o le “lē taofiofi i se faagutu.”
