Ieremia 7:1-34
7 O le afioga lenei a Ieova na oo mai iā Ieremia e faapea:
2 “Ia e tū i le faitotoʻa o le fale o Ieova ma folafola atu i inā lenei fe‘au, ‘Ia outou faalogo mai i le afioga a Ieova, o outou uma Iuta o ē o ulu mai i nei faitotoʻa e ifo atu iā Ieova.
3 O le mea lenei ua fetalai mai ai Ieova o ʻau, o le Atua o Isaraelu: “Ia suia o outou ala ma a outou amio, ona ou tuu pea lea o outou e nonofo i lenei mea.+
4 Aua tou te faatuatua i upu taufaasesē ma faapea mai, ‘O le malumalu lenei* o Ieova, o le malumalu o Ieova, o le malumalu o Ieova!’+
5 Auā afai e tou te matuā suia o outou ala ma a outou amio; afai e tou te matuā tausisi i le faamasinogatonu o le tagata ma lona tuaoi;+
6 afai foʻi tou te lē faasauā i tagata ese ua aumau iā te outou, o tama ua mātuaoti,* ma fafine ua oti a latou tane;+ afai e tou te lē sasaa le toto o lē ua lē sala i lenei mea; ma afai e tou te lē mulimuli atu foʻi i isi atua e malaia ai outou;+
7 ona ou tuu ai pea lea o outou e nonofo i lenei mea, i le nuu na ou foaʻiina atu i o outou augātamā e oo i le faavavau.”’”*
8 “Peita‘i, ua outou tuu lo outou faatuatuaga i upu taufaasesē,+ ma e matuā lē aogā lava.
9 Pe e tou te gāoi+ ea, fasioti tagata, faia le mulilua, tautō pepelo,+ faia taulaga* iā Paala,+ ma mulimuli atu i atua e tou te lē iloaina,
10 ma outou ō mai ma tutū i oʻu luma i lenei fale ua taʻua ai loʻu igoa ma faapea mai, ‘E laveaʻiina i matou,’ e ui ina outou faia o nei mea inosia uma?
11 Po ua avea ea lenei fale ua taʻua ai loʻu igoa ma ana o ē e faomea i la outou vaai?+ O aʻu lava ua ou vaai i ai,” ua fetalai mai ai Ieova.
12 “‘Peitaʻi, inā outou ō ia i le nofoaga na ou iai i Sailo,+ o i inā na ou tuu muamua ai loʻu igoa,+ ma vāai i le mea na ou faia i ai ona o le leaga o loʻu nuu o Isaraelu.+
13 Ae na outou faia pea nei mea uma,’ ua fetalai mai ai Ieova, ‘ma e ui ina ou tautala atu pea lava pea iā te outou,* ae e tou te leʻi faalogo mai.+ Na ou valaau atu pea iā te outou, ae e tou te leʻi tali mai.+
14 O le mea lea ou te faia i le fale ua taʻua ai loʻu igoa,+ lea e tou te faatuatua i ai,+ ma lenei nofoaga na ou avatu iā te outou ma o outou augātamā, e pei lava ona ou faia i Sailo.+
15 Ou te lafoaʻi outou mai i oʻu luma, e pei lava ona ou lafoaʻia o o outou uso uma, o ē uma na tupuga mai iā Efaraima.’+
16 “A o oe, aua neʻi e tatalo mai mo lenei nuu. Aua e te ʻaiʻoi mai pe tatalo pe ōle mai foʻi iā te aʻu mo i latou,+ auā ou te lē faalogo atu lava iā te oe.+
17 Pe e te lē o vaai atu ea i mea o loo latou faia i aai o Iuta ma auala o Ierusalema?
18 Ua aoaoina e atalii fafie, ua faaola e tamā le afi, ua lomi e avā le paluga falaoamata e fai ai keke o taulaga i le Tupu Fafine o le Lagi,*+ ma ua latou liligi foʻi taulaga o meainu i isi atua ina ia faatigā mai ai iā te aʻu.+
19 ‘Ae po o aʻu ea lea ua latou faatigā* mai i ai?’ ua fetalai mai ai Ieova. ‘Pe e lē o i latou lava, ina ia latou māsiasi ai?’+
20 O le mea lea ua fetalai mai ai Ieova le Alii Pule Silisili Ese, ‘Faauta! Ou te sasaa atu loʻu ita ma loʻu to‘asā i lenei mea,+ i luga o tagata ma manu, i luga o laau o le fanua ma fua o le laueleele; e susunuina lava e lē mafai foʻi ona tineia.’+
21 “O le mea lenei ua fetalai mai ai Ieova o ʻau, o le Atua o Isaraelu, ‘Inā faaopoopo atu ia a outou taulaga mū i isi a outou taulaga, ma ia aai ai lava outou.+
22 Auā i le aso na ou aumaia ai o outou augātamā mai i le nuu o Aikupito, ou te leʻi tautala pe poloaʻi atu iā i latou e faatatau i taulaga mū ma isi taulaga.+
23 Ae o le poloaʻiga lenei na ou avatu iā i latou: “Ia outou faalogo mai i loʻu leo, ona avea ai lea o aʻu ma o outou Atua, ma e avea foʻi outou ma oʻu nuu.+ Ia outou savavali i le ala uma ua ou poloaʻi atu ai, ina ia manuia ai outou.”’+
24 Ae e latou te leʻi faalogo pe uaʻi mai foʻi o latou taliga;+ nai lo o lea, ua latou savavali i a latou lava faufauga,* ma savavali e tusa ma le maaa o o latou loto ua leaga,+ ua latou solomuli ai ae lē agaʻi i luma,
25 talu mai le aso na ō mai ai o outou augātamā mai i le nuu o Aikupito seʻia oo mai i le aso nei.+ O lea, na ou aauina atu pea iā te outou o aʻu auauna uma o perofeta, na aauina atu pea lava pea i latou i aso taʻitasi.*+
26 Ae e latou te leʻi faalogo mai iā te aʻu, e leʻi uaʻi mai foʻi o latou taliga.+ Nai lo o lea, ua faauamaaa i latou, ma ua sili atu ona leaga a latou amio nai lo o o latou augātamā!
27 “E te fai atu nei upu uma iā i latou,+ ae e latou te lē faalogo mai iā te oe; e te valaau atu foʻi iā i latou, ae e latou te lē tali mai iā te oe.
28 E te fai atu iā i latou, ‘O le nuu lenei e leʻi faalogo i le siʻufofoga o Ieova lo latou Atua, ma na mumusu e talia aʻoaʻiga. Ua mavae atu le faamaoni, ma e lē ta‘ua lava iā i latou.’*+
29 “Inā sele ia lou lauulu uumi* ma lafoaʻi ese, ia e lagi foʻi se pese faanoanoa* i luga o aʻega taalaelae, auā ua teena ma o le a lafoaʻiina e Ieova lenei tupulaga ua faatupuina lona toʻasā.
30 ‘Auā ua faia e le fanauga a Iuta mea leaga i oʻu luma,’ ua fetalai mai ai Ieova. ‘Ua latou faatutū a latou tupua inosia i le fale ua taʻua ai loʻu igoa, ina ia faaleagaina ai.+
31 Ua latou faia mea maualuluga i Tofeta, o loo i le vanu o Hinoma,*+ ina ia susunu ai o latou atalii ma o latou afafine i le afi,+ o le mea ou te leʻi poloaʻi atu ai ma e leʻi alu aʻe foʻi i loʻu loto.’*+
32 “‘O le mea lea, faauta! o le a oo mai aso,’ ua fetalai mai ai Ieova, ‘e lē toe ta‘ua ai o Tofeta po o le vanu o Hinoma,* ae o le vanu o le Fasiotiga. E latou te tanumia foʻi i Tofeta se‘ia oo ina lē toe iai se avanoa.+
33 E avea tino oti o lenei nuu ma meaʻai a manufelelei o le lagi ma manu o le fanua, e leai foʻi se tasi e faamataʻu e tuliesea i latou.+
34 Ou te faamutaina le leo o le fiafia ma le leo o le olioli, o le leo o le alii faaipoipo ma le leo o le tamaʻitaʻi faaipoipo,+ i aai o Iuta ma auala o Ierusalema, auā o le a avea le laueleele ma faatafunaga.’”+
Faamatalaga Pito i Lalo
^ E faasino atu i fale uma o loo i le lotoā o le malumalu.
^ Po o “tama ua leai ni tamā.”
^ Po o le “e mai i le vavau e oo i le faavavau.”
^ Po o le “faamū taulaga.”
^ Epe., “ina ou alapō ma tautala atu.”
^ O le faalupega o se atua fafine na ifo i ai tagata Isaraelu na fulitua i le tapuaʻiga moni; atonu o se atua fafine o le fanautama.
^ Po o le “faaʻonoʻono.”
^ Po o “i o latou lava mafaufauga.”
^ Epe., “ma alapō i aso taʻitasi ma aauina atu.”
^ Epe., “ma ua te‘a ese mai i o latou gutu.”
^ Po o le “lauulu ua tuuina atu.”
^ Po o le “pese o auega.”
^ Epe., “le vanu o le atalii o Hinoma.” Tagaʻi i le Uiga o Upu, “Kena.”
^ Po o le “ma ou te leʻi manatu lava i ai.”
^ Epe., “le vanu o le atalii o Hinoma.” Tagaʻi i le Uiga o Upu, “Kena.”
