Isaia 59:1-21
59 Faauta! E lē puupuu le aao o Ieova e lē mafai ai ona ia faaolaina,+E lē tutuli* foʻi ona taliga e lē mafai ai ona faafofoga.+
2 E leai, ae o a outou lava mea sesē, ua vavaeesea ai outou mai lo outou Atua.+
O a outou agasala ua māfua ai ona natia ona fofoga mai iā te outou,Ma ua musu ai e faafofoga mai iā te outou.+
3 Auā ua faaleagaina o outou alofilima i le toto+Ma ua faaleagaina o outou tamatamaʻilima i mea sesē.
Ua tautatala o outou laugutu i pepelo+ ma ua magamagagū o outou laulaufaiva i mea lē tonu.
4 E leai se isi ua valaau atu mo le amiotonu,+E leai foʻi se isi ua alu i le faamasinoga ma le faamaoni.
Ua latou faatuatuaina mea e lē moni,*+ ma tautatala i mea e lē aogā.
Ua latou faufau i mea leaga ma ua fanau mai ai mea e tigā ai.+
5 Ua latou fofoa mai fua o le gata uogo,Ua latou lalaga foʻi le faamoega o le apogaleveleve.+
O so o se tasi e ʻaina fua o le gata uogo o le a oti,Ma o le fua na solia, e fofoa mai ai le gata feʻai.
6 E lē avea ia faamoega e fai ma ofu,Pe latou te oofu foʻi i mea e latou te faia.+
O a latou galuega, o galuega ia e tigā ai,Ma ua iai gaoioiga sauā i o latou lima.+
7 Ua taufetuli o latou vae ina ia faia mea leaga,Ua televavave foʻi i latou e sasaa le toto o ē e lē sala.+
O o latou manatu o manatu ia e tigā ai;Ua i o latou ala le faatafunaina ma le puapuagatia.+
8 Ua latou lē iloa le ala o le filemu,Ua leai foʻi se faamasinotonu i o latou ala.+
Ua latou faapiʻopiʻoina o latou ala;E leai se isi e savali ai e iloa le filemu.+
9 O le mea lea ua mamao ai le faamasinotonu mai iā i matou,Ua lē maua mai foʻi i matou e le amiotonu.
Ua matou faamoemoe pea mo le malamalama, ae vaai! o le pogisa;Ua matou faamoemoe foʻi mo le pupula, ae ua matou savavali pea i le pōuliuli.+
10 Ua matou tautagotago mo le pā e pei o tagata tauaso;Ua matou tautagotago atu pea e pei o ē ua leai ni mata.+
Ua matou tau sūsūlu i le aoauli e pei ua afiafipō;Ua pei i matou o ni tagata feoti pe a faatasi ma ē ua malolosi.
11 O i matou uma ua gū e pei o ni pea,Ma ua tagi faanoanoa e pei o le olo a le lupe.
Ua matou faamoemoe pea mo le faamasinotonu, ae ua leai;Ua matou faamoemoe mo le faaolataga, ae ua mamao ese ma i matou.
12 Auā ua tele a matou fouvalega i ou luma;+Ua molimau a matou agasala taʻitasi faasaga iā i matou.+
Ua matou iloa lelei a matou fouvalegaFaapea foʻi a matou mea sesē.+
13 Ua matou agasala ma faafitia Ieova;Ua matou fulitua i lo matou Atua.
Ua matou tautatala e uiga i le sauā ma le fouvale;+Ua matou fafau tala pepelo mai i le loto+ ma magamagagū ai.
14 Ua tuu i tua le faamasinotonu,+Ua tū mamao foʻi le amiotonu;+Ua tautevateva le upu moni* i nofoaga faitele,Ua lē mafai ona ulu atu i ai le mea saʻo.
15 Ua mou atu le upu moni,*+Ma o so o se tasi e liliuese mai i le leaga e faoa ana mea.
Ua silasila mai Ieova i lenei mea ma ua leaga i lana silafaga,Ona ua leai se faamasinotonu.+
16 Ina ua ia silafia ua leai se tagata e fesoasoani mai,Ma ua ofo o ia ona ua leai se isi e faalaa ane,Ona faia ai lea e lona lava aao le faaolataga,*Ma na lagolagoina fo‘i o ia e lana amiotonu.
17 Ua ofu o ia i le amiotonu e pei o se ofutau ‘apamemea,Ma tuu le puloutau o le faaolataga* i lona ulu.+
Ua laʻei o ia i le tauimasui e fai ma ona ofu,+Ma ua pulupulu i le maelega e pei o se ofu talaloa.*
18 O le a ia tauia i latou e tusa ma a latou galuega:+
O le toʻasā i ē o tetee mai, ma le faasalaga i ona fili.+
E na te taui atu i motu e tusa ma mea ua tatau iā i latou.
19 E matataʻu i le suafa o Ieova i latou mai i le itu e goto i ai le lā,E matataʻu foʻi i lona mamalu i latou mai i le itu e oso aʻe ai le lā,Auā o le a afio mai o ia e pei o se vaitafe ua tatafe malosi,Lea o loo uuna‘ia e le agaga o Ieova.
20 “O Lē e toe faatauina mai,+ o le a afio mai+ i SionaIā i latou o loo iā Iakopo ua liliuese mai i solitulafono,”+ ua fetalai mai ai Ieova.
21 “A o aʻu, o laʻu feagaiga lenei ma i latou,”+ ua fetalai mai ai Ieova. “O loʻu agaga o loo i ou luga ma aʻu upu ua ou tuu atu i lou gutu, e lē aveesea mai i lou gutu po o gutu o lau fanau, po o gutu o fanau a lau fanau, e amata atu nei e oo i le faavavau,” ua fetalai mai ai Ieova.
Faamatalaga Pito i Lalo
^ Epe., “mamafa.”
^ Po o le “mea e gaogao.”
^ Po o le “faamaoni.”
^ Po o le “faamaoni.”
^ Po o “le manumalo mo ia.”
^ Po o le “ofu talaloa lima pupuu.”
^ Po o le “manumalo.”
