Mapisarema 22:1-31
Kumutungamiriri; mutinhimira unonzi, “Sheshe Yenondo Yemambakwedza.” Rwiyo rwaDhavhidhi.
22 Mwari wangu, Mwari wangu, mandisiyirei?+
Nei muri kure nekundiponesa,Kure nekuchema kwangu ndichirwadziwa?+
2 Mwari wangu, ndinoramba ndichishevedza masikati asi hamupinduri;+Uye usiku handinyarari.
3 Asi imi muri mutsvene,+Makapoteredzwa nekurumbidza kwaIsraeri.
4 Madzibaba edu aivimba nemi;+Aivimba nemi, uye mairamba muchianunura.+
5 Aichema kwamuri, uye aiponeswa;Aivimba nemi, uye haana kuodzwa mwoyo.*+
6 Asi ini ndiri honye, handisi munhu,Ndinotukwa* nevanhu uye ndinoshorwa nevanhu.+
7 Vese vanondiona vanondinyomba;+Vanondifinyamira vachidzungudza misoro yavo vachinditsvinyira vachiti:+
8 “Akazviisa kuna Jehovha. Ngaamununure!
Ngaamuponese, nekuti anomuda chaizvo!”+
9 Imi ndimi makandibudisa muchibereko,+Ndimi makandichengetedza ndiri pazamu raamai vangu.
10 Ndakaiswa mumaoko enyu kubvira ndichangoberekwa;Muri Mwari wangu kubvira ndiri muchibereko chaamai vangu.
11 Musagara kure neni, nekuti dambudziko riri pedyo+Uye handina mumwe mubatsiri.+
12 Nzombe diki zhinji dzakandikomba;+Nzombe dzine simba dzekuBhashani dzakandipoteredza.+
13 Dzakandishamira miromo,+Seshumba inodzvova, inobvambura-bvambura mhuka yayabata.+
14 Ndiri kudururwa semvura;Mapfupa angu ese asvodogoka.
Mwoyo wangu waita senamo;+Uri kunyunguduka mukati mangu.+
15 Simba rangu raoma sechaenga;*+Rurimi rwangu ruri kunamatira kumatadza angu;+Muri kundiisa muguruva rerufu.+
16 Nekuti imbwa dzakandikomba;+Dzakati name name neni sechikwata chevanhu vanoita zvakaipa,+Dziri kuda kuruma maoko angu nemakumbo seshumba.+
17 Ndinogona kuverenga mapfupa angu ese.+
Vanonditarisa voramba vakangoti nde-e.
18 Vanogovana nguo dzangu,Uye vanokandira zvipfeko zvangu mijenya.+
19 Asi imi, haiwa Jehovha, musaramba muri kure.+
Ndimi simba rangu; kurumidzai kuzondibatsira.+
20 Ndiponesei* pabakatwa,Ponesai upenyu hwangu hunokosha patsoka dzembwa;+
21 Ndiponesei pamuromo weshumba+ uye panzombe dzemusango;Ndipindurei mundiponese.
22 Ndichazivisa hama dzangu zita renyu;+Ndichakurumbidzai ndiri pakati peungano.+
23 Imi vanotya Jehovha, murumbidzei!
Imi mese vana* vaJakobho, mukudzei!+
Mirai muchishamiswa imi mese vana* vaIsraeri.
24 Nekuti haana kuzvidza kana kusema kutambura kwemunhu anodzvinyirirwa;+Haana kumuvanzira chiso chake.+
Paakachemera kwaari achida kubatsirwa, akamunzwa.+
25 Ndichakurumbidzai ndiri muungano yakakura;+Ndicharipa mhiko dzangu ndiri pamberi pevaya vanomutya.
26 Vanyoro vachadya voguta;+Vaya vanotsvaga Jehovha vachamurumbidza.+
Nakidzwai neupenyu* nekusingaperi.
27 Vanhu vese vari kumigumo yenyika vachayeuka, vodzoka kuna Jehovha.
Mhuri dzese dzemarudzi dzichakotama pamberi penyu.+
28 Nekuti umambo ndehwaJehovha;+Anotonga marudzi.
29 Vapfumi* vese vepanyika vachadya uye vachakotama;Vese vari kudzika kuguruva vachamupfugamira;Hapana kana mumwe wavo anogona kuchengetedza upenyu hwavo.*
30 Vana vavo vachamushandira;Chizvarwa chinotevera chichaudzwa nezvaJehovha.
31 Vachauya votaura nezvekururama kwake.
Vachaudza vanhu vachazoberekwa zvaakaita.
Mashoko Emuzasi
^ Kana kuti “kunyadziswa.”
^ Kana kuti “Ndinozvidzwa.”
^ Ichi chimedu chemudziyo wevhu unenge waputsika.
^ Kana kuti “Ponesai mweya wangu.”
^ ChiHeb., “mbeu.”
^ ChiHeb., “mbeu.”
^ ChiHeb., “Mwoyo wenyu ngaurarame.”
^ ChiHeb., “Vakakora.”
^ Kana kuti “mweya yavo.”
