Jezui u mësoi dishepujve të tij vetëm një fe, fenë e vërtetë. Ajo është si një rrugë që të çon në jetën e përhershme. Jezui tha se «pak e gjejnë» atë rrugë. (Mateu 7:14) Perëndia e pranon adhurimin tonë vetëm nëse bazohet në Fjalën e tij të së vërtetës. Gjithë adhuruesit e vërtetë janë të bashkuar në një besim të vetëm.​—Lexo Gjonin 4:23, 24; 14:6; Efesianëve 4:4, 5.

Shih videon A i pranon Perëndia të gjitha fetë?

Jezui paralajmëroi se krishterimi do të korruptohej nga profetë të rremë. Në pamje të parë, ata duken si besimtarë të vërtetë. Kishat e tyre pretendojnë se janë të krishtere. Megjithatë, mund ta njohësh fytyrën e vërtetë të të krishterëve të rremë. Ata mund të dallohen nga cilësitë dhe sjellja e tyre. I njëjti parim vlen edhe për të dalluar të krishterët e vërtetë. ​—Lexo Mateun 7:13-23.

Mendo për këto pesë shenja identifikuese.

• Besimtarët e vërtetë e respektojnë Biblën si Fjalën e Perëndisë. Ata përpiqen me gjithë shpirt të jetojnë sipas parimeve të saj. Kështu, feja e vërtetë ndryshon nga fetë që bazohen në ide njerëzore. (Mateu 15:7-9)  Besimtarët e vërtetë nuk thonë një gjë dhe pastaj bëjnë një tjetër.​—Lexo Gjonin 17:17; 2 Timoteut 3:16, 17.

• Dishepujt e vërtetë të Jezuit nderojnë emrin e Perëndisë, Jehova. Jezui e nderoi emrin e Perëndisë duke e bërë të njohur. I ndihmoi njerëzit të njihnin Perëndinë dhe u mësoi të luteshin që të shenjtërohet emri i Tij. (Mateu 6:9) Aty ku jeton ti, cila fe e bën të njohur emrin e Perëndisë?​—Lexo Gjonin 17:26; Romakëve 10:13, 14.

• Besimtarët e vërtetë predikojnë për Mbretërinë e Perëndisë. Perëndia e dërgoi Jezuin të predikonte lajmin e mirë për Mbretërinë. Mbretëria e Perëndisë është e vetmja shpresë e njerëzimit. Jezui nuk reshti së foluri për të deri ditën që vdiq. (Luka 4:43; 8:1; 23:42, 43) Ai tha se dishepujt e tij do të predikonin për Mbretërinë. Nëse dikush vjen e të flet për Mbretërinë e Perëndisë, cilës fe ka shumë të ngjarë t’i përkasë? ​—Lexo Mateun 24:14.

• Dishepujt e Jezuit nuk janë pjesë e kësaj bote të ligë. Mund t’i dallosh ngaqë nuk përzihen në politikë a konflikte shoqërore. (Gjoni 17:16; 18:36) Gjithashtu, nuk imitojnë veprimet dhe qëndrimet e dëmshme të kësaj bote.​—Lexo Jakovin 4:4.

• Besimtarët e vërtetë kanë dashuri të pashoqe për njëri-tjetrin. Ata mësojnë nga Fjala e Perëndisë t’i respektojnë të gjitha grupet etnike. Edhe pse fetë e rreme shpesh kanë përkrahur fuqimisht luftërat e kombeve, besimtarët e vërtetë nuk pranojnë ta bëjnë këtë. (Mikea 4:1-3) Madje, ata janë vetëmohues dhe i përdorin pa u kursyer kohën e gjithçka kanë, që të ndihmojnë e të inkurajojnë të tjerët.​—Lexo Gjonin 13:34, 35; 1 Gjonit 4:20.

Cila fe i bazon të gjitha mësimet te Fjala e Perëndisë, nderon emrin e Perëndisë dhe shpall se Mbretëria e Tij është e vetmja shpresë e njerëzimit? Cili grup fetar e tregon me vepra dashurinë dhe nuk përzihet në luftëra? Si mendon?​—Lexo 1 Gjonit 3:10-12.