Nono. Bijbel e taki dati wi musu begi Gado wawan, na ini a nen fu Yesus. Yesus ben taigi den disipel fu en: „Fu dati ede un musu begi so: ’Wi Tata na hemel, meki yu nen de santa” (Mateyus 6:9). Noiti a taigi den disipel fu en fu begi den santawan, den engel, noso wan tra gado.

 Yesus ben taigi den bakaman fu en tu: „Mi na a pasi, mi na san tru, èn mi na a libi. Nowan sma kan kon na a Tata sondro mi” (Yohanes 14:6). Na Yesus wawan abi a reti fu kon na fesi Gado fu taki gi wi.​—Hebrewsma 7:25.

Ma fa a de efu mi e begi Gado nanga den santawan?

 Na ini wan fu den Tin Komando di Gado ben gi Moses, a taki: „Mi, Yehovah un Gado, na wan Gado di wani taki sma musu anbegi en wawan” (Eksodes 20:5). Sobun, Gado wani taki wi musu dini en wawan èn a wani taki na en wawan wi musu begi.​—Yesaya 48:11.

 Wi o meki Gado atibron, te wi o begi iniwan tra sma, awinsi na den santawan noso den engel. Di na apostel Yohanes ben wani boigi gi wan engel, na engel tapu en èn a taigi en: „No du dati! Mi na wan srafu nomo neleki yu èn neleki den brada fu yu di kisi a wroko fu preiki fu Yesus. Anbegi Gado.”​—Openbaring 19:10.