Te yu abi warti sani soleki wan oso noso wan wagi, dan yu musu sorgu den bun. Na so a de tu nanga a matifasi di yu abi nanga Gado. Fa yu kan tan de wan mati fu Gado baka te yu dopu?

Na ini a artikel disi

•  Tan studeri Gado Wortu

•  Tan begi Yehovah

•  Tan fruteri tra sma san yu e bribi

•  Tan go na den Kresten konmakandra

 Prenspari Bijbeltekst: „Un musu tan du muiti fu abi bun bakapisi nanga ala san unu e du èn fu kon sabi den finifini tori fu Gado moro nanga moro.”​—Kolosesma 1:10.

 San disi wani taki: Baka te yu dopu, yu musu tan leisi Bijbel èn denki dipi fu san yu leri.​—Psalm 25:4; 119:97.

 San yu kan fruwakti: Son leisi yu no o firi fu studeri. Kande yu e denki „mi a no stukaman”.

 San yu kan du: Kon sabi moro fu den Bijbel tori di yu lobi. Meki yu eigi schema fu studeri Bijbel èn meki en na so wan fasi taki a no e hebi gi yu. A prenspari sani na taki yu wani taki a lobi di yu abi gi Yehovah èn gi en Wortu, kon moro tranga. Te yu e studeri na a fasi dati, dan a o bun gi yu èn yu o du en nanga prisiri tu.​—Psalm 16:11.

 Tip: Efu yu wani studeri bun, dan pruberi fu du dati na wan presi pe babari no de èn pe nowan sani o puru yu prakseri.

 Yu abi moro yepi fanowdu?

•   Leisi na artikel:

   „Fa Bijbel kan yepi mi?​—Pisi 2: Meki Bijbel leisi tron wan span sani gi yu”

   „Hoe kan ik leren me beter te concentreren?

•   Luku a video:

   San yonguwan e taki​—Leisi Bijbel

•   Download a Bijbel-leisi schema:

   „Fa wi kan leisi Bijbel”

 Prenspari Bijbeltekst: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en.”​—Filipisma 4:6.

 San disi wani taki: Yu e arki Gado te yu e leisi en Wortu èn yu e taki nanga en te yu e begi. Te yu e begi, yu kan aksi Gado fu yepi yu èn yu kan taki en tangi gi den blesi di yu kisi fu en.

 San yu kan fruwakti: Son leisi yu e kon si taki yu e begi fu den srefi sani ibri tron baka. Kande yu e bigin tweifri srefi efu Yehovah e arki yu trutru, noso efu a wani yere yu.​—Psalm 10:1.

 San yu kan du: Tapu difrenti momenti fu a dei yu kan denki fu wan tu sani di yu kan begi fu en. Efu yu no man begi langa wantewante, dan poti na yu ede taki yu o du dati na wan tra ten a srefi dei ete. Boiti taki yu e begi gi yusrefi, begi gi trawan tu.​—Filipisma 2:4.

 Tip: Te yu kon si taki yu e begi fu den srefi sani ibri tron baka, dan taki nanga Yehovah fu dati. A wani taki yu fruteri en ala den sorgu fu yu, srefi te a abi fu du nanga den begi fu yu.​—1 Yohanes 5:14.

 Yu abi moro yepi fanowdu?

•   Leisi na artikel:

   „Fu san ede mi musu begi?”

•   Download a werkblad:

   „Hoe kan ik beter leren bidden?”

 Prenspari Bijbeltekst: „Tan poti prakseri na yusrefi èn na den sani di yu e leri sma. . . . Te yu du disi, dan yu o frulusu yusrefi nanga den sma di e arki yu.”​—1 Timoteyus 4:16.

 San disi wani taki: Te yu e fruteri tra sma san Bijbel e leri, dan dati o meki yu bribi kon moro tranga tu. Na a fasi dati yu kan yepi den sma di e arki yu èn yu kan frulusu yusrefi tu.

 San yu kan fruwakti: Son leisi a kan taki yu no firi fu taki nanga tra sma fu yu bribi. Kande yu frede srefi fu du dati, spesrutu te yu de na skoro.

 San yu kan du: Taigi yusrefi taki yu no o meki noti frede yu fu du san yu musu du. Na apostel Paulus ben skrifi: „Ma efu mi e [preiki a bun nyunsu] aladi mi no wani, toku a frantwortu de na mi tapu fu du a wroko.”​—1 Korentesma 9:16, 17.

 Tip: Efu yu papa nanga mama no abi trobi nanga dati, dan aksi wan tra Kotoigi di sabi du a preikiwroko, fu leri yu du a wroko disi moro bun.​—Odo 27:17.

 Yu abi moro yepi fanowdu?

•   Leisi na artikel:

   „Waarom is het zo moeilijk anderen over mijn geloof te vertellen?”

 Prenspari Bijbeltekst: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra.”​—Hebrewsma 10:24, 25.

 San disi wani taki: A moro prenspari reide fu go na den konmakandra na fu anbegi Yehovah. Ma te yu e go na den konmakandra, dan tu bun sani e pasa. Den brada nanga sisa drape e gi yu deki-ati. Èn den srefi e kisi deki-ati tu fu di yu de na den konmakandra èn yu e teki prati na den.​—Romesma 1:11, 12.

 San yu kan fruwakti: A kan taki son leisi yu e sidon denki tra sani aladi a konmakandra e hori. Dati kan meki taki yu no e yere den prenspari sani di wi e leri drape. Noso kande yu no firi fu go ala leisi na den konmakandra, noso yu e meki tra sani soleki skorowroko kon na ini a presi fu dati.

 San yu kan du: A tru taki yu musu du yu skorowroko, ma du ala san yu man fu go na ala den konmakandra èn fu leri someni leki yu man. Teki prati na den konmakandra èn meki muiti fu gi piki. Baka a konmakandra, fruteri wan sma, awinsi na wán sma nomo, taki yu ben feni a piki noso a lezing fu en moi.

 Tip: Sreka yusrefi na fesi. Download a JW Library® app èn klik tapu „Meetings” fu si san wi o du na ibri konmakandra.

 Yu abi moro yepi fanowdu?

•   Leisi na artikel:

   „Waarom zou ik naar de vergaderingen gaan?”