Gi den Kolosesma 2:1-23
2 Mi wani taki un sabi sortu bigi strei mi e strei gi a bun fu unu, gi a bun fu den wan di de na Laodisea èn gi a bun fu ala den sma di noiti no si mi.
2 Na so den kan kisi trowstu èn lobi kan bondru den kon na wán, so taki den kisi ala den gudu di sma e kisi te den e frustan sani krin èn te den no e tweifri. Den o kon sabi soifri san na a santa kibritori fu Gado. A kibritori disi na Krestes.
3 Ala koni nanga sabi di warti srefisrefi kibri na ini en.
4 Mi e taki disi, so taki nowan sma kori unu nanga moi wortu.
5 A tru taki mi no de drape nanga unu, ma mi e prakseri unu. Mi e prisiri fu si taki unu orga bun èn taki unu e bribi tranga na ini Krestes.
6 Sobun, now di unu kon bribi na ini Masra Yesus Krestes, dan tan tyari unsrefi na wan fasi di e sori taki unu e gi yesi na en.
7 Neleki fa rutu e meki wan bon tanapu steifi na ini a gron, na so un musu tanapu steifi èn bribi na ini Yesus, soleki fa wi ben leri unu. Sori taki a bribi fu unu tranga te unu e taki Gado tangi.
8 Sorgu taki nowan sma kisi unu nanga a koni fu grontapu èn nanga soso takitaki di e bedrigi sma. Den sani disi no abi noti fu du nanga den leri fu Krestes, ma nanga den gwenti fu libisma èn nanga den sani di e tiri grontapu,
9 bika ala den fasi fu Gado de fu si na ini Krestes, iya, nowan e mankeri.
10 Sobun, a sma di de na ede fu ala tirimakti èn fu ala den tra makti, e sorgu taki unu no e mankeri noti.
11 Fu di unu na bakaman fu en, meki unu besnèi. A no sma besnèi unu, ma unu besnèi di unu puru den sondu fasi fu a skin, bika dati na a fasi fa futuboi fu Krestes musu besnèi.
12 Di unu teki dopu, dan Gado beri unu makandra nanga Krestes. Fu di unu na bakaman fu en, meki Gado gi unu wan opobaka makandra nanga en, bika unu bribi den sani di Gado du nanga a krakti fu en. Na Gado gi en wan opobaka.
13 Boiti dati, aladi unu ben de leki dede sma, fu di unu ben abi fowtu èn fu di unu no ben besnèi, toku Gado meki unu kisi libi baka, makandra nanga Yesus. Gado ben de klariklari fu gi wi pardon fu ala den sondu fu wi.
14 A figi ala sani puru di ben skrifi na ini a Wèt di ben abi den komando na ini èn di ben e krutu wi. Gado spikri a Wèt na a pinapostu èn na so a puru en na pasi.
15 Nanga a pinapostu disi, a wini den tirimakti nanga ala den tra makti, èn a meki den tron den strafuman fu en. Dan a meki den waka pasa na fesi ala sma fu gi den syen èn fu sori taki a wini den.
16 Sobun, no meki nowan sma krutu unu fu san unu e nyan noso e dringi. Iya, no meki den krutu unu fu di unu no e hori wan fesadei, a Nyunmun-fesa, noso wan Sabat-dei,
17 bika den sani dati na soso wan prenki fu san musu kon ete. Ma a trutru sani na Krestes.
18 No meki nowan sma di lobi fu du leki a abi sakafasi èn di lobi na anbegi fu den engel, tapu unu fu kisi a pai fu unu. Den sortu sma disi e „hori nomo na”* san den si èn fu di den e denki leki fa libisma e denki, meki den abi bigimemre, aladi den no abi a reti fu du dati.
19 Den sortu sma disi no e tai hori na a ede, sobun, na a sma di e meki taki a heri skin kan kisi san a abi fanowdu èn di e meki taki den skrufu nanga den titei fu a skin, kan hori ala pisi fu a skin na makandra, so taki a kan de wán. Na so a heri skin man gro, fu di Gado e gi en krakti fu gro.
20 Efu unu dede makandra nanga Krestes fu di unu no abi noti moro fu du nanga den sani di e tiri grontapu, dan fu san ede unu e du neleki unu de wan pisi fu grontapu ete, fu di unu e hori den komando
21 di e taki: „No teki. No tesi. No fasi”?
22 Te yu luku en bun, dan ala den sani disi o lasi gowe. Sma e gebroiki den teleki den kaba. Boiti dati, den na komando nanga leri di komopo fu libisma.
23 Den sani disi e kon de fu si na ini a fasi fa sma e anbegi Gado soleki fa densrefi wani, te den e du leki den abi sakafasi èn te den e pina den skin hebi, so taki a gersi leki den koni. Ma den sani dati no man yepi den kwetikweti fu feti nanga den lostu fu a skin.
Futuwortu
^ Noso: „Go tanapu/go na ini.” Den wortu disi abi fu du nanga sani di sma di ben anbegi falsi gado ben e taki te wan sma ben e gi ensrefi na a gado dati.
