Psalm 33:1-22
33 Un ret’ati sma, un bari fu prisiri fu den sani di Yehovah du.
A fiti taki den krin-ati sma e gi en glori.
2 Prei poku tapu harpu fu taki Yehovah tangi.Meki poku gi en nanga bigi harpu.
3 Singi wan nyun singi gi en.Prei a harpu so bun leki un man èn bari fu prisiri,
4 bika den sani di Yehovah e taki de tru.Yu kan fertrow ala den sani di a e du.
5 A lobi retidu èn a lobi te sma e koti krutu na wan reti fasi.
Yu kan si a lobi fu Yehovah na ini ala sani di de na grontapu.
6 Na taki Yehovah taki nomo ne hemel kon de.Na bro a bro nomo ne ala den sani* na hemel kon de.
7 A e poti wan dan fu hori a watra fu se na wán.A e poti a watra fu a krasi se na ini maksin.
8 Meki ala den sma na grontapu frede Yehovah.
Meki den sma di e libi na grontapu abi bigi lespeki gi en.
9 Na taki a taki, ne ala sani kon de.Na taki a taki nomo, dan ala sani tnapu steifi na den presi.
10 Yehovah bruya den sma fu grontapu so taki den no man du san den abi na prakseri.A gens den pipel, so taki den no man du san den wani du.
11 Ma san Yehovah besroiti, na dati o psa ala ten.Ala ten a e du san a abi na prakseri.
12 Koloku fu den sma di abi Yehovah leki Gado.Iya, koloku fu a pipel di a teki leki a gudu fu en.
13 Yehovah e luku kmoto fu hemel.A e si ala libisma.
14 Kmoto fu a presi pe a e tan,a e luku ala den sma di e libi na grontapu.
15 Na Gado meki na ati fu libisma.A e ondrosuku ala den sani di den e du.
16 A no a bigi legre fu wan kownu o meki taki a kisi ferlusu.A no fu di wan tranga man abi furu krakti meki a o tan na libi.
17 No denki taki asi man tyari ferlusu kon.*Awinsi fa den tranga, tòg den no man yepi sma.
18 Luku, Yehovah e poti prakseri na den sma di e lespeki en.A e poti prakseri na den sma di e wakti en, fu sori den taki a lobi* den.
19 A e poti prakseri na den fu den no dedeèn fu hori den na libi na ini angriten.
20 Nanga wi heri ati wi e howpu tapu Yehovah.
En na wi yepiman èn a schild fu wi.
21 Na en e meki wi ati prisiri.Wi poti wi fertrow na ini en santa nen.
22 Tye Yehovah, sori wi taki yu lobi* wi.Na yu wi e wakti fu yepi wi.
