Tori fu den apostel 16:1-40
-
Paulus teki Timoteyus fu go nanga en (1-5)
-
Fisyun fu a man fu Masedonia (6-10)
-
Lidia teki a Kresten bribi na Filipi (11-15)
-
Den poti Paulus nanga Silas na straf’oso (16-24)
-
A waktiman fu a straf’oso nanga ala den sma na ini en oso dopu (25-34)
-
Paulus wani taki den hei lantiman aksi en pardon (35-40)
16 Ne a doro na Derbe èn na Listra. Wan disipel ben de drape di ben nen Timoteyus. En mama ben de wan Dyu di ben tron wan disipel, ma en papa ben de wan Grikisma.
2 Den brada na Listra nanga Ikoniyum ben e taki soso bun sani fu Timoteyus.
3 Paulus ben taki dati a ben wani Timoteyus kon nanga en. Ma a besnèi en fosi, fu di ala den Dyu na ini den kontren dati ben sabi taki a papa fu en ben de wan Grikisma.
4 Te den ben go na den foto, dan den ben e ferteri den brada drape sortu besroiti den apostel nanga den owruman na ini Yerusalem ben teki, so taki den ben kan du san den apostel taki.
5 A sani dati tranga a bribi fu den gemeente trutru èn dei fu dei moro nanga moro sma ben e tron bribiman.
6 Den ben waka psa tu na ini Frigia èn na ini a kontren fu Galasia, fu di a santa yeye ben tapu den fu preiki a wortu fu Gado na ini a distrikt Asia.
7 Di den doro na Misia, den pruberi fu go na Bitinia. Ma Yesus meki a yeye tapu den fu go drape.
8 Fu dati ede den psa na ini Misia èn den go na Trowas.
9 Wan neti Paulus kisi wan fisyun: Wan man fu Masedonia ben e tnapu na en fesi èn a begi en: „Abra kon na Masedonia fu yepi wi.”
10 Baka di a kisi a fisyun, wi seti sani fu go na Masedonia, fu di wi kon ferstan taki na Gado ben taigi wi fu go preiki a bun nyunsu gi den sma drape.
11 Fu dati ede wi gwe libi Trowas èn wi teki wan sipi fu go langalanga na Samotrasa. A dei baka dati wi go na Neyapolis.
12 Fu drape wi go na Filipi, a moro prenspari foto fu a distrikt Masedonia di den Romesma ben e tiri. Wi tan wan tu dei na ini a foto disi.
13 Na Sabat-dei wi waka psa a portu fu a foto go na libasei, fu di wi ben denki taki wan presi ben de drape pe sma ben gwenti begi. Wi go sdon èn wi bigin taki nanga den uma di ben kon makandra drape.
14 Wan uma di nen Lidia ben e arki. A ben de fu a foto Tiatira, a ben e seri diri paars krosi èn a ben abi bigi lespeki gi Gado. Yehovah* opo en ati bradi, so taki a ben kan poti prakseri na den sani di Paulus ben e taki.
15 Baka di en nanga den tra sma na ini en oso dopu, a begi wi: „Efu unu feni taki mi na wan sma di e du san Yehovah* taki, dan kon tan na ini mi oso.” A ben wani nomonomo taki wi kon tan na en.
16 Di wi ben de na pasi fu go na a presi pe sma e begi, wan umasrafu kon na wi. A ben abi wan ogri yeye na en tapu di ben e meki a taki na fesi san ben o psa. Den basi fu en ben e meki furu moni nanga a lukuman-wroko di a ben e du.
17 A meisje disi tan waka baka wi nanga Paulus èn a ben e bari: „Den man disi na srafu fu a Moro Hei Gado. Den e ferteri unu fa unu kan kisi ferlusu.”
18 A tan du dati furu dei langa. Te fu kba Paulus kon weri fu a sani disi èn a drai taigi a yeye: „Na ini a nen fu Yesus Krestes mi e taigi yu fu kmoto na en tapu.” Wantewante a yeye kmoto na tapu a meisje.
19 Di den basi fu en si taki a no ben man meki moni gi den moro, den grabu Paulus nanga Silas èn den srepi den go na a w’woyo pe den tiriman fu a foto ben e sdon.
20 Di den tyari den go na fesi den hei lantiman disi, den taigi den: „Den man disi e tyari wan lo dyugudyugu kon na ini a foto. Den na Dyu
21 èn den e leri sma tra gwenti di wi no kan teki abra. Wi na Romesma, wi no kan du den sani dati.”
22 Ne ala den sma ati bron nanga Paulus nanga Silas. Den hei lantiman priti den krosi fu den brada puru na den skin èn den taigi sma fu fon den nanga tiki.
23 Baka di den gi den brada wan steifi fonfon, den poti den na straf’oso èn den taigi a waktiman fu a straf’oso fu hori wakti gi den.
24 Fu dati ede a waktiman poti den te na bakasei fu a straf’oso èn a fasi den futu na ini wan udu.*
25 Na mindrineti, Paulus nanga Silas ben e begi èn den ben e singi prèisesingi gi Gado, aladi den strafman ben e arki den.
26 Wantronso wan bigi gronseki kon di seki a fundament fu a straf’oso. Na a srefi ten ala den doro opo èn den bui fu den alamala lusu.
27 Di a waktiman fu a straf’oso wiki èn a si taki den doro fu a straf’oso opo, a hari en fet’owru fu kiri ensrefi, fu di a ben denki taki den strafman ben lowe.
28 Ma Paulus bari nanga wan tranga sten: „No kiri yusrefi, wi alamala de dya!”
29 A waktiman aksi sma fu tyari faya kon gi en èn a lon go na insei pe den ben sroto Paulus nanga Silas. A ben e beifi di a saka kindi na fesi Paulus nanga Silas.
30 Ne a tyari den go na dorosei èn a taki: „Mi e begi unu, taigi mi san mi musu du fu kisi ferlusu.”
31 Den taigi en: „Bribi na ini Masra Yesus, dan yu nanga den sma na ini yu oso o kisi ferlusu.”
32 Ne den ferteri en nanga ala den sma di ben de na ini en oso a wortu fu Yehovah.*
33 A srefi neti dati a waktiman tyari den go na wan presi pe a krin den soro fu den. Dan en nanga ala den sma fu en oso dopu wantewante.
34 Ne a tyari den brada go na ini en oso èn a poti n’nyan gi den. A ben breiti taki a ben e bribi na ini Gado now èn ala den sma na ini en oso ben breiti tu.
35 Di dei broko, den hei lantiman seni den skowtu fu kon taigi a waktiman: „Lusu den man.”
36 Ne a waktiman fu a straf’oso taigi Paulus: „Den hei lantiman seni man fu kon taigi wi taki wi musu lusu unu. Sobun, unu kan gwe. Unu tan bun.”
37 Ma Paulus taigi den: „Den wipi wi na fesi ala sma sondro fu tyari wi na fesi krutu èn den poti wi na straf’oso aladi wi na Romesma. Now den wani puru wi na straf’oso sondro fu sma sabi? Nôno, kwetkweti! Meki den srefi kon puru wi na straf’oso.”
38 Ne den skowtu go ferteri den hei lantiman san Paulus taki. Di den yere taki den man na Romesma, den kon frede.
39 Fu dati ede den kon begi den pardon èn baka di den tyari den go na dorosei, dan den aksi den fu gwe libi a foto.
40 Ma di den kmoto na ini a straf’oso, den go na a oso fu Lidia. Di den si den brada drape, den gi den dek’ati, dan den gwe.
Futuwortu
^ Luku „Tra prenspari sani” A5.
^ Luku „Tra prenspari sani” A5.
^ Disi ben de wan udu sani di sma ben e gebroiki fu fasi den futu, den anu nanga a neki fu wan strafman.
^ Luku „Tra prenspari sani” A5.
