Den brada di e teki fesi na ini na organisâsi fu wi no e kisi pai gi den sani di den e du. Na presi fu dati, neleki fa a ben de na a bigin fu a Kresten gemeente, den brada di doro den markitiki poti „leki skapuman fu teki fesi na ini a gemeente fu Gado” (Tori fu den apostel 20:28). Den owruman disi na lepi Kresten di e teki fesi na ini a gemeente leki skapuman èn den ’no e du dati neleki na dwengi sma dwengi den, ma den e du en nanga prisiri. Den no e du en tu fu di den lobi fu kisi wini na wan fasi di no fiti, ma den e du en fu di den e angri fu dini trawan’ (1 Petrus 5:1-3). San den e du gi wi?

Den e sorgu wi èn den e kibri wi. Den owruman e gi rai fu Bijbel èn den e yepi a gemeente fu tan abi wan bun matifasi nanga Yehovah. Fu di den owruman sabi taki na Gado gi den a prenspari wroko disi, meki den no e basi a pipel fu en. Na presi fu dati den e yepi wi fu meki sani waka bun nanga wi èn fu meki wi de nanga prisiri (2 Korentesma 1:24). Neleki fa wan skapuman e sorgu bun gi ibriwan fu den skapu fu en, na so den owruman e pruberi fu kon sabi ibri memre fu a gemeente.—Odo 27:23.

Den e leri wi fa wi musu du a wani fu Gado. Ibri wiki den owruman e teki fesi na den gemeente konmakandra fu tranga a bribi fu wi (Tori fu den apostel 15:32). Den brada disi di e dini Gado fayafaya e teki fesi tu na ini a preikiwroko èn den e wroko makandra nanga wi fu leri wi du a preikiwroko na difrenti fasi.

Den e gi ibriwan fu wi deki-ati. Fu man yepi wi fu tan abi wan bun matifasi nanga Yehovah, den owruman fu wi gemeente e kon luku wi na wi oso, noso den e taki nanga wi na a Kownukondre zaal fu gi wi trowstu nanga yepi fu Bijbel.—Yakobus 5:14, 15.

Boiti taki den owruman abi wroko fu du na ini a gemeente, furu fu den e wroko tu fu sorgu den osofamiri. Den e poti prakseri tu na den frantwortu dati èn disi e teki furu fu den ten. Wi musu abi lespeki gi den brada disi di e wroko tranga.—1 Tesalonikasma 5:12, 13.

• Sortu wroko den gemeente owruman e du?

• Fa den owruman e sori taki den e broko den ede nanga ibriwan fu wi?