A MOI fu si taki moro nanga moro yongu Kotoigi e seti den libi na so wan fasi taki den man du moro na ini a Kresten diniwroko (Mat. 6:22). Sortu kenki den tyari kon fu man du dati? Sortu problema den kisi? Fu sabi disi, meki wi luku a libi fu wan tu sma di e dini now na ini Meksikow.

Dustin nanga Jassa fu Amerkankondre trow na ini yanuari 2007. Ala ten den ben wani abi den eigi seiriboto fu libi na ini. Syatu baka di den trow, den ben man bai wan fu den boto disi. Den ben poti a boto fu den krosibei fu a foto Astoria na ini Oregon, na Amerkankondre. A moi foto disi di no fara fu a Stille Oceaan de na mindri bergi di abi bigi busi nanga snew na tapu. Dustin taki: „Na ala sei pe yu ben e luku, a presi ben moi kefalek!” Den ben feni taki den no ben e libi wan gudu libi èn taki den ben e frutrow na tapu Yehovah. Den ben e prakseri: ’Wi e libi na ini wan pikin boto fu 7.9 meter, wi no e wroko ala dei, wi e go na wan gemeente pe sma e taki wan tra tongo èn wanwan leisi wi e du a yepi-pionierwroko.’ Ma baka wan pisi ten den kon si taki den ben e kori densrefi. Dustin taki: „Na presi fu horibaka gi a gemeente, wi ben e gebroiki furu fu wi ten fu meki sani na a boto. Wi ben sabi taki efu wi ben wani poti Yehovah na a fosi presi na ini wi libi trutru, wi ben o abi fu tyari kenki kon.”

 Jassa taki: „Fosi mi trow, mi ben e libi na ini Meksikow èn mi ben e go na wan Ingrisitongo gemeente. Mi ben lobi a preikiwroko drape èn mi ben wani drai go baka.” Te Dustin nanga Jassa ben e hori na Osofamiri Anbegi, den ben e leisi son ondrofenitori fu kisi moro deki-ati fu go dini na Meksikow. Di den leisi fa son brada nanga sisa froisi go dini na tra kondre pe furu sma wani sabi moro fu Bijbel, den bigin angri trutru fu du dati tu (Yoh. 4:35). Dustin taki: „Wi ben wani prisiri tu neleki den.” Di wan tu mati na Meksikow fruteri Dustin nanga Jassa taki wan nyun grupu preikiman ben abi yepi fanowdu, den bosroiti fu go. Den tapu nanga a wroko fu den, den seri a boto fu den èn den froisi go na Meksikow.

Na so Dustin nanga Jassa go tan na ini a foto Tecomán. A foto disi de krosibei fu a Stille Oceaan tu, ma a de sowan 4345 kilometer na zuidsei fu Astoria. Dustin taki: „Fosi, wi ben e tan na wan presi pe wan switi kowru winti ben e wai èn wi ben man si den moi bergi na wi lontu. Ma now wi de na wan presi pe a faya srefisrefi èn soso lemtyibon wi e si.” Biginbigin den no ben man feni wroko. Fu di den no ben abi furu moni, meki wan tu wiki langa den ben e nyan aleisi nanga pesi tu leisi wan dei. Jassa taki: „Pikinmoro wi no ben man teki en moro, ma dan den Bijbelstudie bigin gi wi manya, bakba, nanga papaya. Yu kan frustan taki wi ben e kisi wan lo lemtyi tu!” Bakaten den feni wroko na wan skoro fu Taiwan di de tapu Internet. Na a skoro disi sma kan leri fu taki tra tongo. Nanga a moni di den e kisi fu a wroko dati, den man bai san den abi fanowdu ibri dei.

Fa Dustin nanga Jassa feni a nyun libi fu den now? Den taki: „A moro bun sani di wi du, na fu froisi kon dyaso. Noiti wi ben denki taki wi ben kan de so krosibei fu Yehovah èn now wi e libi moro switi nanga makandra. Ibri dei wi e du someni sani makandra. Wi e go na ini a preikiwroko makandra, wi e taki nanga makandra fa wi kan yepi den Bijbelstudie fu wi èn wi e sreka den konmakandra makandra. Boiti dati wi no abi den broko-ede di wi ben abi fosi.” Den taki tu: „Now wi e frustan trutru san Bijbel wani sori wi na Psalm 34:8 pe skrifi: ’Tesi èn si taki Yehovah bun.’”

Moro leki 2900 brada nanga sisa froisi go dini na ini difrenti presi na Meksikow pe moro Kownukondre preikiman de fanowdu. Sonwan fu den trow, trawan no trow èn furu fu den abi sowan 20 noso 30 yari. Fu san ede den Kotoigi disi bosroiti fu du a muilek wroko disi? Di den aksi wan grupu fu den fu  san ede den du disi, den taki fu dri prenspari sani. San na den sani disi?

Den wani sori lobi gi Yehovah nanga tra sma. Leticia dopu di a ben abi 18 yari. A taki: „Di mi gi misrefi abra na Yehovah, mi ben frustan taki mi ben musu dini en nanga mi heri ati. Sobun, fu man sori taki mi lobi Yehovah nanga mi heri ati, mi ben wani gebroiki moro ten nanga krakti fu du a wroko di a gi wi fu du” (Mark. 12:30). Hermilo di trow now nanga Leticia, ben abi sowan 20 yari di a froisi go dini pe moro Kownukondre preikiman de fanowdu. A taki: „Mi ben frustan taki a moro bun fasi fu sori lobi gi tra sma, na fu yepi den fu sabi Gado” (Mark. 12:31). Dati meki a gowe libi a gudu foto Monterrey pe a ben abi wan switi libi èn pe a ben e wroko na wan bangi, dan a go tan na ini wan pikin foto.

Den wani abi trutru prisiri ala ten. Syatu baka di Leticia dopu, en nanga wan sisa di ben e pionier langa ten kaba go preiki na wan farawe foto. Den tan preiki drape wan mun so. Leticia e memre: „Mi ben e fruwondru trutru. Mi ben prisiri fu si fa den sma ben wani arki a Kownukondre boskopu di wi ben e tyari gi den. Na a kaba fu a mun dati, mi taigi misrefi: ’Disi na san mi wani du nanga mi libi!’” A srefi sortu sani pasa nanga Essly di abi sowan 20 yari now. Di a si fa sma e prisiri te den e go dini pe yepi de fanowdu, dan a ben wani du dati tu. Di a ben de na middelbaar skoro ete, a ben miti wan tu fayafaya Kotoigi di ben e dini na presi pe yepi de fanowdu. A taki: „Di mi si fa den brada nanga sisa ben e prisiri, mi ben wani abi so wan libi tu.” Furu sisa du san Essly du. Fu taki en leti, moro leki 680 sisa di no trow e dini na ini Meksikow na presi pe yepi de fanowdu. Disi na wan heri moi eksempre gi yonguwan nanga owruwan!

Den wani du wan bun sani nanga den libi èn den wani de koloku. Di Essly ben kaba nanga Mulo skoro, a skoro ben gi en deki-ati fu go na universiteit èn den ben o pai gi dati. Den tra pikin na skoro ben taigi en taki a ben musu teki na okasi disi, so taki a ben kan abi wan bun libi. Sobun, nanga en heiskoro papira a ben kan abi wan wroko di e pai bun, a ben kan abi wan wagi èn a ben kan go nanga fakansi na tra kondre. Ma Essly no teki a rai fu den pikin na skoro. A taki: „Wan tu fu den Kresten mati fu mi suku fu abi den sani disi, ma mi kon si taki den no ben e si na anbegi fu den leki a moro prenspari sani na ini den libi moro. Mi si tu taki o moro den ben e poti prakseri na grontapu sani, o moro den ben e kisi broko-ede nanga problema. Mi ben wani gebroiki mi yongu yari fu dini Yehovah someni leki mi man.”

 Essly ben go teki wan tu lès, so taki a ben kan feni wan wroko pe a ben kan pionier na a srefi ten. Baka dati a froisi go na wan presi pe Kownukondre preikiman de fanowdu trutru. Boiti dati a go leri taki wan tu muilek Ingitongo di den Otomisma nanga den Tlapanecosma e taki. Te a e prakseri fa a e preiki dri yari kaba na farawe presi, a e taki: „Now di mi e dini pe moro preikiman de fanowdu, mi e firi koloku èn mi e firi taki mi e du wan bun sani nanga mi libi trutru. A moro moi sani fu disi, na taki Yehovah tron wan moro bun mati fu mi.” Phillip nanga Racquel na wan trowpaar fu Amerkankondre di abi sowan 30 yari. Den taki: „Grontapu e kenki so esi, taki furu sma e bruya fu di den no sabi fa den libi o de tamara. Ma fu di wi e yepi na wan presi pe furu sma wani arki a boskopu fu Bijbel, meki wi e si krin taki wi e du wan bun sani nanga wi libi. Disi e meki wi firi koloku trutru!”

A no de fu taki dati a no makriki fu go dini pe moro Kownukondre preikiman de fanowdu. Wan fu den problema di yu kan kisi, na fa yu o feni moni fu bai den sani di yu abi fanowdu. Fu man lusu a problema disi, yu musu kon gwenti a fasi fa sma e libi na a presi pe yu go. Verónica di e pionier wan pisi ten kaba, taki: „Na wan fu den presi pe mi ben go dini mi ben e seri nyanyan-sani bunkopu. Na wan tra presi mi ben e seri krosi èn mi ben e koti sma wiwiri. Now mi e krin wan sma oso èn mi e gi leri na sma di kisi pikin. Mi e leri papa nanga mama fa den musu taki nanga den pikin fu den.”

Son leisi a kan muilek fu kon gwenti a kulturu nanga den gwenti fu den sma fu a kondre pe yu e go. Disi de so spesrutu te yu o go na den farawe ingi dorpu na ini Meksikow. Na so a ben de tu gi Phillip nanga Racquel di go dini pe sma e taki Nahuateltongo. Phillip taki: „A kulturu fu den sma drape ben de heri tra fasi leki a di fu wi.” San yepi den fu kon gwenti a libi drape? Phillip taki: „Wi luku den bun sani fu den Nahuatelsma. Den lobi den famiri, den no e bedrigi sma èn den lobi fu gi sma sani.” Racquel taki: „A libi drape leri wi furu èn wi leri tu fa fu wroko makandra nanga den brada nanga sisa na ini den ingi dorpu.”

Fa yu kan sreka yusrefi fu man dini na farawe presi pe yepi de fanowdu? Brada nanga sisa di e du disi wan pisi ten kaba, taki: Fosi yu froisi, bigin leri fu libi nanga wan tu sani nomo èn leri fu de koloku nanga den sani di yu abi (Fil. 4:11, 12). Sortu tra sani yu kan du? Leticia taki: „Mi no ben e teki wroko pe mi ben o abi fu tan na wán presi fu wan langa ten. Mi ben musu man froisi na iniwan ten èn na iniwan presi te dati ben de fanowdu.” Hermilo taki: „Mi leri bori, wasi krosi èn triki krosi.” Verónica taki: „Di mi ben e tan nanga mi famiri ete, mi ben yepi fu krin na oso èn mi ben leri fu bori gosontu nyanyan nanga wan tu sani nomo. Mi leri fu kibri moni tu.”

Levi nanga Amelia na wan trowpaar fu Amerkankondre di trow aiti yari kaba. Den fruteri fa begi yepi den fu sreka densrefi fu go dini na ini Meksikow. Levi taki: „Wi luku omeni moni wi ben o abi fanowdu fu dini wán yari langa na ini wan tra kondre, dan wi aksi Yehovah fu yepi wi wroko a moni dati.” Baka wan tu mun den ben abi a moni di den aksi Yehovah èn den froisi wantewante. Levi taki: „Wi aksi Yehovah wan spesrutu sani èn a gi wi dati. Sobun, wi ben musu du now san wi pramisi fu du.” Amelia taki: „Wi ben denki taki wi ben o man tan wán yari nomo, ma now wi de dya seibi yari kaba èn wi no wani gowe srefisrefi! Te wi e luku a libi fu wi dyaso, wi man si krin fa Yehovah e yepi wi trutru. Ibri dei wi e si fa a e sori wi bun-ati.”

Adam nanga Jennifer na wan trowpaar fu Amerkankondre di e preiki gi den sma na ini Meksikow di e taki Ingrisitongo. Den srefi taki dati begi yepi den trutru. Den e gi a rai disi: „No tan wakti te sani o go moro bun gi yu. Taigi Yehovah na ini begi taki yu wani go yepi na ini wan tra kondre èn bigin seti sani fu du disi trutru. Pruberi fu libi soso nanga den sani di yu abi fanowdu trutru, skrifi go na a bijkantoro fu a kondre pe yu wani go dini èn luku fa yu o man sorgu yusrefi te yu de drape. Te yu du ala den sani disi, dan yu go!” * Efu yu du disi, yu o ondrofeni furu moi sani èn yu o man du furu gi Yehovah.