A de so taki sabiman feni sani di e sori taki den tori na ini Bijbel tru? Na ini 2014, wan artikel na ini wan tijdschrift ben poti na aksi disi: „Omeni sma di kari na ini den Hebrew Buku fu Bijbel ben libi trutru soleki fa sabiman kon si baka di den ondrosuku owruten sani?” Na artikel ben taki: „Sowan 50 sma!” (Biblical Archaeology Review) Wan man di no kari na ini na artikel dati na Tatenai. Suma ben de Tatenai? Meki wi go luku san Bijbel e taki fu en.

Fosi, Yerusalem ben de na ondro a makti fu a Gran Kownukondre Persia. A foto ben de na ini a kontren di den Persiasma ben e kari ’abrasei fu a Gran Liba’. Dati na a west-sei fu Eufraat-liba. Baka di den Persiasma teki Babilonia abra, den fri den Dyu di ben de na ini katibo èn den gi den primisi fu go bow a tempel fu Yehovah na ini Yerusalem (Esra 1:1-4). Feanti fu den Dyu ben wani gens a wroko. Dati meki den lei gi a kownu fu Persia taki den Dyu e bow a foto fu di den wani opo densrefi teige en (Esra 4:4-16). Na a ten di Darius I ben e tiri (522-486 Fosi Krestes), wan heihei man fu Persia di nen Tatenai, go ondrosuku a tori. Bijbel e kari en „a granman fu a kontren na abrasei fu a Gran Liba”.—Esra 5:3-7.

Sabiman feni furu pisi klèidoti pe a nen Tatenai skrifi na tapu. Kande den klèidoti disi ben de fu famiri Tatenai. Wan fu den klèidoti e taki fu a man Tatenai di kari na ini Bijbel. Tapu a klèidoti disi wan brifi skrifi pe sma ben pramisi fu pai wan moni. A brifi disi ben de fu a di fu 20 yari di Darius I ben e tiri. Dati na 502 Fosi Krestes. A brifi e sori taki wan fu den sma di ben sabi fu a bisnis tori disi, ben de wan futuboi fu „Tattannu, granman fu a kontren na abrasei fu a Gran Liba”. Na a man disi na a Tatenai di kari na ini a Bijbel buku Esra.

Sortu posisi a man disi ben abi? Na ini 535 Fosi Krestes, Sirus a Bigiwan orga a kontren fu en na ini distrikt. A ben e kari wan fu den distrikt disi Babilon nanga a kontren na abrasei fu a Gran Liba. Bakaten a distrikt disi ben prati na ini tu pisi. Wan fu den pisi den ben e kari ’abrasei fu a Gran Liba’. Na ini a kontren disi yu ben abi Coele-Siria, Fenisia, Samaria nanga Yuda. Den ben e tiri a kontren disi komoto fu Damaskus. Fu 520 te go miti 502 Fosi Krestes, Tatenai ben e tiri a kontren disi.

Baka di Tatenai go na Yerusalem fu go ondrosuku a tori fu den Dyu, a fruteri Darius taki den Dyu taigi en taki na Sirus ben gi den primisi fu bow a tempel fu Yehovah. Di a kownu meki sma ondrosuku a tori, dan den si taki na dati ben skrifi na ini den lantibuku (Esra 5:6, 7, 11-13; 6:1-3). Dati meki Kownu Darius taigi Tatenai fu libi den Dyu fu den bow go doro èn Tatenai arki a kownu.—Esra 6:6, 7, 13.

Furu sma no sabi „Tatenai, a granman fu a kontren na abrasei fu a Gran Liba”, fu di a no du so wan bigi sani. Ma a moi fu si taki Bijbel e taki fu en èn a e taki soifri sortu posisi a ben abi. Disi na ete wan pikin buweisi di e sori taki den sani di skrifi na ini Bijbel pasa trutru. Ibri tron baka sabiman e feni sani di e horibaka gi den tori na ini Bijbel.