NA INI Bijbel ten, wan trowmasra noso a famiri fu en ben e gi a famiri fu a trowmisi wan gudu. A gudu dati ben kan de meti, moni, noso wan tra sani di ben abi waarde. Son leisi a trowmasra ben e wroko gi a famiri fu a trowmisi neleki fa a ben de nanga Yakob di ben wroko seibi yari langa gi Rakel en papa fu man trow nanga Rakel (Gen. 29:17, 18, 20). Fu san ede sma ben abi a gwenti disi?

A Bijbel sabiman Carol Meyers e taki: „Na ini famiri [pe sma ben e prani gron] a wroko fu wan umapikin ben prenspari srefisrefi. Sobun, a gudu di a trowmasra ben e gi a famiri ben de wan bigi yepi te na umapikin no ben o de nanga den moro.” A gudu disi ben kan meki tu taki den tu famiri disi ben o libi moro bun nanga makandra. Na so den ben o man yepi makandra na ini muilek ten. Boiti dati, a gudu disi ben e sori taki na uma ben meki mofo fu trow èn taki a ben o libi na oso fu en papa fu go tan nanga en masra.

Ma a gudu disi no ben wani taki dati sma ben e bai noso seri a trowmisi. Wan buku e taki: „A gi di sma ben e gi a famiri fu a trowmisi moni noso wan tra sani di ben abi waarde, ben kan meki sma denki taki wan Israel man di ben wani trow ben e bai wan frow. Ma a [gudu disi] no ben de fu pai gi na uma. A ben de fu yepi a famiri fu di na umapikin fu den no ben o wroko moro gi den.” (Ancient Israel​—Its Life and Institutions)

Na ini a ten disi, sma na ini son kondre e hori densrefi na a gwenti disi ete. Te Kresten papa nanga mama e aksi wan gudu fu a man di wani trow nanga na umapikin fu den, dan den no musu aksi tumusi furu (Fil. 4:5; 1 Kor. 10:32, 33). Na so den e sori taki den a no sma di gridi noso „di lobi moni” (2 Tim. 3:2). Boiti dati, te Kresten papa nanga mama no e aksi tumusi furu, dan a man di o trow nanga na umapikin fu den, no o abi fu wakti fu trow teleki a meki nofo moni fu man pai gi a frow fu en. Èn efu a trowmasra na wan pionier, dan a no o abi fu tapu nanga a pionierwroko fu go suku wan wroko fu man pai gi a frow fu en.

Na son presi fu grontapu, lanti e bosroiti sortu gudu sma musu gi fu man trow. Na den kondre dati, Kresten papa nanga mama e hori densrefi na den wet dati. Fu san ede? Fu di Gado Wortu e taki dati Kresten musu „saka densrefi na ondro den tiriman” èn den musu gi yesi na den wet, solanga den no de teige den wet fu Gado.​—Rom. 13:1; Tori 5:29.